Баланы еңбекке баулу

Бала тәрбиесінің қай түрі болса да, оның жас кезінен өзінің өскен ұясында, яғни отбасында басталатыны белгілі. Сол сияқты баланы еңбекке баулу да ең алдымен отбасынан басталады. Сондықтан, әрбір ата-ана баланы еңбекке үйретуге баса көңіл бөлуге тиіс. Баланың есі кіріп,ананы әкел, мынаны апарға жарай бастағаннан-ақ, оны өзінің шамасы келетін жұмысқа жұмсап үйреткен жақсы. Ең алдымен баланы өзінің қолын жуып, киімдерін, ойыншықтарын жинауға үйреткен жөн. Мысалы: отбасындағы балалар істейтін негізгі жұмыстардың кейбіреулерін атап көрсететін болсақ: өзінің төсегін жинау, ойыншықтарын жинау, үйдің ішін жинауға көмектесу, үй гүлдеріне су құю, ас ішерде дастархан жасасу, ыдыс жуысу, кішкентай бөпесін күтуге көмектесу т.с.с.

Баланың жасы өскен сайын оның істейтін жұмысы да  көбейе түседі. Жұмысты талғамай, бәрін де істеп үйренгені жөн. Өйткені  бала әрнәрсеге бейім, өмір талабына сай азамат болып  өседі. Баланы еңбекке баулу жөнінде  халқымыздың «Істегенің маған жақсы, үйренгенің саған жақсы» деген нақыл сөзі  еңбектің қадірін білгендіктен айтылған болса керек. Өкінішке орай баланы жұмсамай жаман үйреткен  ата-аналар да бар. Бала жас кезінде үлкендермен бірге  жұмыс істеуге, тіпті қолынан келсе келмесе де анасына немесе әкесіне көмектесуге әуес келеді. Бірақ кейбір ата-аналар баланың талабын қайтарып, ешқандай жұмысқа араластырмай баланың ынтасын сөндіріп тастайды. Ондай бала   келешекте өзі жұмыс жасамайтын, өзгенің жұмысын бағаламайтын, қоғамдық жұмыстарға қатыспайтын болып өседі. Ал баланы еңбексүйгіштікке  тәрбиелеуде  балабақшаның да тигізер пайдасы мол. Еңбек, еңбексүйгіштік туралы түсініктер беріледі. Жас шамасына қарай  еңбек ету дағдылары дамытылады. Жақсы еңбектің бәрімізді бірлікке, жақсылыққа жетелейтінін түсіне бастайды, іскерлікке  талпынады. Бала  еңбек етумен қатар өзгенің еңбегін  сыйлауға үйренеді. Келешекте  үлкен азамат болып өседі.