«Баланы мектепке дайындауда мектепалды даярлық сыныбының маңызы»

«Баланы мектепке дайындауда мектепалды даярлық сыныбының маңызы»

Тәрбие мен білімнің алғашқы дәні – мектепалды даярлық сыныптарында беріледі. Мектепалды даярлық сыныбы – баланың мектеп өміріне қадам басар алдындағы маңызды кезең. Бұл уақыт аралығында бала тек әріп танып, санауды үйреніп қана қоймай, жаңа ортаға бейімделуді, тәртіп сақтауды және ұжыммен жұмыс істеуді меңгереді. Сондықтан мектепалды даярлық сыныбы – баланың жан-жақты дамуына негіз болатын маңызды баспалдақ болып табылады.

Мектепалды даярлық сыныбына қабылданған бала бірнеше даму кезеңдерінен өтеді, атай кетсек: зияткерлік даму, әлеуметтік даму, психологиялық дайындық, тәртіп пен жауапкершілікке үйрену, шығармашылық және тіл дамыту.

Зияткерлік дамудың негізі.

«Ойын арқылы баланың ойы ұшталады» дегендей даярлық сыныптарында оқу ойын түрінде ұйымдастырылады. Ойын әдісі арқылы баланың ойлау қабілеті, есте сақтау қабілеті, зейіні дамиды. Түрлі дидактикалық ойындар, логикалық тапсырмалар мен шығармашылық жұмыстар арқылы бала қоршаған ортаны танып, өз ойын жеткізуге үйренеді. Бұл оның бастауыш сыныптағы оқу үлгеріміне оң әсер ететін маңызды қадам.

Әлеуметтік бейімделу.

Мектепке дейінгі кезеңде бала көбіне отбасы аясында болады. Ал даярлық сыныбында ол жаңа ортаға түсіп, құрдастарымен қарым-қатынас орнатады. Топпен жұмыс істеу, кезек күту, ортақ ережелерді сақтау – баланың әлеуметтік дағдыларын қалыптастырады. Аталған дағдылар бала бойында толық қалыптасса, бала болашақта сыныпта өзін еркін әрі сенімді ұстайды.

Психологиялық дайындық.

Мектеп табалдырығын аттау кей балалар үшін стресс болуы мүмкін. Мектепалды даярлық сыныбы осы қорқынышты азайтады әрі . Бала мұғаліммен, сабақ құрылымымен, сынып тәртібімен алдын ала танысады. Нәтижесінде бірінші сыныпқа барғанда өзін сенімді сезінеді.

Тәртіп пен жауапкершілікке үйрету.

Даярлық кезеңінде бала күн тәртібін сақтауға, тапсырмаларды уақытында орындауға дағдыланады. Өзінің оқу құралдарына жауапкершілікпен қарауды, берілген жұмысты соңына дейін орындауды үйренеді. Бұл қасиеттер оның болашақ оқу процесінде табысты болуына ықпал етеді.

Шығармашылық және тіл дамыту.

Сурет салу, мүсіндеу, ән айту, әңгіме құрастыру сияқты әрекеттер баланың шығармашылық қабілетін арттырады. Сонымен қатар тіл байлығы дамып, ойын анық жеткізуге машықтанады. Бұл – оқу сауаттылығының негізі.

Қорытынды

Мектепалды даярлық сыныбы – баланың мектепке сәтті бейімделуінің кепілі. Ол баланың зияткерлік, әлеуметтік және психологиялық тұрғыдан дамуына мүмкіндік береді. Сонымен қатар бала бірінші сыныпқа барғанда қарапайым партада дұрыс отыруды, тақтаға жазуды, мәтіндерді әңгімелеп өз ойын ұжым алдында еркін жеткізуді меңгереді. Мектепалды даярлық сыныптарында меңгерілген қарапайым түсініктер баланың мектеп қабырғасында қиналмай жан – жақты білім алып дамуына негіз болады.

Алматы қаласы, Наурызбай ауданы,

№221 жалпы білім беретін мектептің даярлық сынып мұғалімі: Н.А.Токтыбаева