Күні:

Сыныбы

Тақырыбы:

Баланың басты ұстазы - ата -анасы.

Мақсаты:

Ата-аналарға психологиялық тренинг өткізу , сауалнама жүргізу, бейнежазба көрсету арқылы пікірталас туғыза отырып, бала тәрбиесіндегі ата-ананың рөлін тереңірек ұғынуға ықпал ету.

Күтілетін нәтиже:

Ата-аналар бала тәрбиесіндегі өз рөлдерін теререңірек ұғынып, жауапкершіліктері артады.

Ресурстар:

Интернет материалдары, бейнежазба ,слайд , стикер,шарлар, маркерлер, А-4,А-3 парақтар,нақыл сөздер жазылған түрлі-түсті парақтар.

Бабалардан қалған нақыл сөздер:

1.Анасы бардың панасы бар,

Анасы жоқтың көз жасы бар.

2.Анасын сыйламаған, ел қамын ойламаған.

3.Әкенің « батырым», шешенің «құлыным » деген сөзін естіген балада жақсы сезім туып,дамиды.

4.Отбасынан басталған әділеттік, отау құрғанда да қалады.

5.Бала: атаға, анаға,әкеге,ағаға ,тіпті қала берді үйге келген қонаққа да қарап өседі.

6.Әке көрген оқ жонар, шеше көрген тон пішер.

7.Балалықтағы іздену ,есейгенде нақтылы іске әкеледі

Жиналыстың барысы

Мұғалімнің кіріспе сөзі:

Сәлеметсіздер ме, құрметті де,ардақты ата - аналар! Бұл жерге өз баласының тәрбиесіне немқұрайды қарамайтын, ұлының немесе қызының алып жатқан біліміне алаңдаушылық білдіретін ата-аналар жиналды деп ойлаймын.«Бала тәрбиесі тал бесіктен басталады » -деп , атам қазақ бекер айтпаған болар. Бала 6-7 жастан мектеп табалдырығын аттағаннан бастап тәрбиенің ұйытқысы ата - ана мен мектеп болмақ.Ал, мұғалім мен ата-ана тығыз қарым- қатынас орнатқан жағдайда ғана бала тәрбиесі өз жемісін берері хақ. Бала-біздің болашағымыз.Яғни біздің болашағымыз жас ұрпақтың қолында. Сол үшін , сіздер мен біздер бала тәрбиесі үшін мемлекетіміздің және қоғамның алдында жауаптымыз.Мектеп ұстаздары балаларымызды білім нәрімен сусындатып қана қоймай ,рухани адамгершілікке, кішіпейілдікке,ұлтжандылыққа және де басқа да құндылықтарға үйретіп келеді. Бала тәрбиесі – бір отбасының ғана емес, бүкіл қоғамның мемлекеттік абыройлы міндеті. Кезінде Әл Фараби бабамыз «Тәрбиесіз берілген білім-адамзаттың қас жауы!» - деп айтып кеткен.Бұл сөз осы уақытқа дейін өз құндылығын жоймай отыр. Осыған орай , ата-аналар ұрпақ тәрбиесіне мүдделі екендігін іс жүзінде дәлелдеп отырулары тиіс. Міне осындай ынтымақ бірлігінде ғана ойдағыдай нәтиже берері ақиқат.Қазіргі кезде халықтың хал-ахуалын жақсарту үшін түрлі реформалар қабылдануда. Соның бірі-білім саласы.Оқушыларға білім және тәрбие беруде басқаша көзқараспен қарау қажеттілігі туындап отыр.Соның айғағы бүгінгі өткізгелі отырған ата-аналар жиналысы.

Қызығушылығын ояту:

Жағымды ахуал туғызу мақсатында ата-аналарды шаттық шеңберіне тұрғызып ,өздерін таныстыра отырып қысқаша ыстық лебіздерін білдіреді. Нақыл сөздер мен мақал-мәтелдер жазылған парақ қиындыларын құрастыру арқылы 4 топқа бөлу. 1-топ «Балапан ұяда нені көрсе,ұшқанда соны іледі», 2-топ «Әкесіне қарап ұлын таны, анасына қарап қызын таны»,3-топ «Әке ақылы бұлақ, ана ақылы-шырақ», 4-топ «Балаңа көңілің толмаса,кемшілікті өз басыңнан іздей бер».Әр топ өздері құрастырған нақыл сөздердің мағынасын ашып, топта талқылап түйінді идеяларын айтады.

Педагогико-психологиялық кезең.

Ата-аналарға «Әке мен бала»тақырыбындағы бейнежазбаны көрсету арқылы ой тастап, пікірталас туғызу.

1.Осы тамашалаған бейнежазба сіздерге қандай ой салды?

2.Бала тәрбиесіндегі әкенің ролі қандай деп ойлайсыздар?

3.Қазіргі кезде әкелер жеткілікті дәрежедеде бала тәрбиесіне көңіл бөледі ме?

4.Қалай ойлайсыздар бала тәрбиесінде ананың рөлі күшті ме,әлде әкенің рөлі күшті ме?

Осындай түрткі сұрақтарды қою арқылы ата-аналардың пікірлерін тыңдап,бір-бірімен ой бөлісуге жағдай жасау.

Слайд арқылы түсіндірме жұмыстарын жүргізу

(Сауалнама алу)

Қазақстанға белгілі психолог маман Нақыпбекова Райса Утебаевнаның «Бала тәрбиесіндегі он алтын қағида» деген кітабының негізінде, бала тәрбиесіне қатысты қағидалармен ата-аналарды таныстыру. 1.Балаға өз-өзіне деген сенімділік және өз-өзіне деген құрмет қалыптастыру.

2.Баланы айналасындағылармен қарым- қатынас жасай білуге үйрету.

3.Баланы терең тыңдауға үйрету.

4.Балаңыз әңгіме айтып жатқанда ,барынша мейіріміңізді төгіп, күлімсіреп отырып тыңдаңыз.

5.Үш нәрсені естен шығармау: еңбекқорлық, адалдық және табандылық.

6.Егер балаңыз қателік жіберсе, қорықпаңыз. Шешім шығарып,дұрыс қорытынды жасауға бағыттаңыз.

7. Өзіңіздің адамдармен қарым-қатынасыңызда соның ішінде балаңызбен қарым-қатынасыңызда критиканы алып тастаңыз.

8.Балаңызға дұрыс мақсат қоюды үйретіңіз.

9.Баланы ақшаны дұрыс жұмсауға үйрету.

10.Егер сіз балаңыз бақытты және табысты болсын десеңіз,әр күні сіз оған өзіңіздің жақсы көретініңізді айтыңыз Түсіндіру барысында ата-аналардан «Сіз қандай ата-анасыз?» деген тақырыпта сауалнама алынады. Қорытындысы бірден айтылып кетеді.(қосымша 1)

Қорытынды

Құрметті ата – аналар! Ұлтымыздың қанындағы ізеттілік – дөрекілікке, қайырымдылық - қатыгездікке, жомарттық - тоғышарлыққа, адалдық - арамдыққа, парасаттылық - парықсыздыққа ауыспасын деген үлкен үміт тұр.
Өмірдің өтпелі қиын кезеңінде ұл - қыздарымыздың саналы тәрбие мен нақты білім алуларына күш салайық. Балаға жауапкершілікпен қарап, оқыту мен адамгершілікке тәрбиелеуде отбасының басым рөлін мойындап, бірлесе, ынтымақтаса әрекет етуіміз қажет деп бүгінгі жиналысымызды аяқтағалы отырмыз.

Үйге тапсырма

Балаңызды жақсы көретініңізді күнделікті әрекетпен және сөзбен жеткізуге тырысыңыз .Оқудағы жетістіктеріне және басқа да жетістіктеріне бірге қуануды ұмытпаңыз!

Кері байланыс

Ата-аналар жиналысынан кейін бала тәрбиесіне қатысты көзқарасыңыз қалай болды?- деген сұраққа қысқаша жауап алу. Стикерге жазып, даналық ағашына жабыстыру.