«Бастауыш сынып – тұлға қалыптасуының алтын кезеңі»

Бастауыш сынып – баланың мектеп өміріне бейімделіп, білімге деген алғашқы қадамы жасалатын, оның болашақ тұлғалық болмысының негізі қаланатын ең маңызды кезең. Дәл осы уақытта оқушының оқу сауаттылығы, жазу мен есептеу дағдылары ғана емес, сонымен қатар ойлау қабілеті, қарым-қатынас мәдениеті, жауапкершілігі мен өзіне деген сенімі қалыптасады. Сондықтан бастауыш сынып мұғаліміне артылатын жауапкершілік те өте жоғары.

Қазіргі таңда білім беру саласында болып жатқан жаңашылдықтар ұстаздан үздіксіз ізденісті, кәсіби шеберлікті талап етеді. Сабақ барысында оқушылардың жас ерекшеліктерін ескере отырып, ойын технологияларын, шығармашылық тапсырмаларды, топтық және жұптық жұмыстарды тиімді қолдану арқылы олардың сабаққа деген қызығушылығын арттыруға ұмтыламын. Әр баланың бойындағы қабілетті байқап, оны дамыту – мұғалімнің басты міндеттерінің бірі.

Бастауыш сыныпта тәрбие жұмысы біліммен қатар жүргізілуі тиіс. Оқушыларды үлкенді сыйлауға, кішіге қамқор болуға, адалдық пен еңбекқорлыққа баулу – күнделікті сабақтың ажырамас бөлігі. Ұлттық құндылықтарды дәріптеу, ана тіліне, туған жерге деген сүйіспеншілікті қалыптастыру да бастауыш білімнің негізгі бағыттарының бірі деп есептеймін.

Хиуаз Доспанова атындағы №28 жалпы білім беретін мектебінде оқушылардың жан-жақты дамуына барлық жағдай жасалған. Мектеп ұжымы білім сапасын арттырумен қатар, оқушылардың рухани-адамгершілік тәрбиесіне де ерекше мән береді. Ұстаз бен ата-ана арасындағы өзара ынтымақтастық – баланың табысты білім алуының кепілі. Осы бағытта ата-аналармен тығыз байланыс орнатып, бірлесе жұмыс жүргізу маңызды деп санаймын.

Әрбір шәкірттің жетістігі – мұғалім еңбегінің айқын көрінісі. Оқушының кішкентай болса да алға жасаған қадамы, алған білімі мен жеткен жетістігі ұстазға үлкен шабыт береді. Бала жүрегіне жол тауып, оның болашағына бағыт-бағдар беру – мұғалім мамандығының ең басты әрі ең қастерлі тұсы.

Болашақта еліміздің білімді, саналы, отансүйгіш азаматтары бүгінгі бастауыш сыныптан қалыптасады. Сол себепті де бастауыш сынып мұғалімі өз ісіне үлкен жауапкершілікпен қарап, әр шәкірттің жарқын болашағы үшін аянбай еңбек етуі тиіс деп білемін.

Каримова Ақмарал Нуриддиновна,

Хиуаз Доспанова атындағы №28 жалпы білім беретін мектептің бастауыш сынып мұғалімі