«Батыл өрт сөндірушілер» – қауіпсіздікке үйрететін квест ойын

Карашева Алтын Отызбековна

№81 «Әсемгүл» балабақшасы МКҚК

Аңдатпа

Мақалада мектепке дейінгі ұйым тәрбиеленушілеріне арналған «Батыл өрт сөндірушілер» атты квест ойынның мазмұны мен тәрбиелік маңызы сипатталады. Ойын барысында балалар өрт қауіпсіздігі ережелерімен танысып, өрт сөндіруші мамандығы туралы түсінік алады. Квест тапсырмалары балалардың логикалық ойлауын, ептілігін, ұйымшылдығын дамытып, төтенше жағдайда дұрыс әрекет ету дағдыларын қалыптастыруға бағытталған.

Түйін сөздер

Өрт қауіпсіздігі, квест ойын, өрт сөндіруші мамандығы, төтенше жағдай, мектепке дейінгі тәрбие, командалық жұмыс.

Негізгі бөлім

Балалардың өмір қауіпсіздігін қамтамасыз ету және қауіптің алдын алу дағдыларын қалыптастыру – мектепке дейінгі тәрбиенің маңызды бағыттарының бірі. Осы мақсатта «Батыл өрт сөндірушілер» атты квест ойын ұйымдастырылды. Іс-әрекет Таным, Қатынас, Әлеумет және Дене шынықтыру білім беру салаларын кіріктіру арқылы өткізілді.

Квест ойынының мақсаты – балаларды өрт қауіпсіздігі ережелерімен таныстыру, өрт сөндіруші мамандығы туралы түсінік беру, сондай-ақ логикалық ойлау, ептілік пен ұйымшылдық қабілеттерін дамыту.

Ойын дабыл дыбысымен басталып, тәрбиеші балаларға өрттің қауіпті екенін, отты дұрыс пайдаланудың маңызын түсіндірді. Жедел хабарлама арқылы бір үйде өрт шыққаны хабарланып, балалар кім көмекке келетінін анықтады. Осылайша балалар батыл өрт сөндірушілер рөліне еніп, арнайы каска киіп, квест тапсырмаларын орындауға кірісті.

Квест барысында бірнеше станция ұйымдастырылды.

«Қауіпті ме, қауіпсіз бе?» станциясында балалар суреттер арқылы қауіпсіз және қауіпті әрекеттерді ажыратып, өрт қауіпсіздігі туралы білімдерін көрсетті.

«Жалынды сөндір» станциясында шартты жалынды су бүріккіш немесе көк шар арқылы сөндіріп, дәлдік пен көзбен мөлшерлеу дағдыларын дамытты.

«Құралды тап» станциясында өрт сөндірушіге қажетті құралдарды таңдап, артық заттарды ажыратты.

«Кедергіден өт» тапсырмасы балалардың ептілігі мен шапшаңдығын арттыруға бағытталды.

Ал «101 нөмірін есте сақта» станциясында балалар өрт кезінде хабарласатын телефон нөмірін құрастырып, жаттап алды.

Қорытынды

Қорытынды бөлімде барлық тапсырмаларды сәтті орындаған балалар «Жас өрт сөндіруші» медальдарымен марапатталды. Рефлексия кезеңінде смайликтер арқылы балалар өз әсерлерін білдірді.

Қорыта айтқанда, «Батыл өрт сөндірушілер» квест ойыны балалардың өрт қауіпсіздігі туралы білімін арттырып, төтенше жағдайда дұрыс әрекет етуге үйретті. Ойын түріндегі тапсырмалар балалардың қызығушылығын оятып, қауіпсіздік ережелерін саналы түрде меңгеруіне ықпал етті.