Білім беру саласы: Таным Бөлімі: Сенсорика Тақырыбы: « Көңілді пішіндер »

Ұйымдастырылған оқу қызметінің конспектісі

Білім беру саласы: Таным

Бөлімі: Сенсорика

Тақырыбы: « Көңілді пішіндер »

Мақсаты: Пішіндердің түстері мен көлемдерін ажыратуды және оларды топтастыра білуді жетілдіру.

Күтілетін нәтиже:

Жасайды: Пішіндердің түстері мен көлемдеріне қарай топтастырады.

Түсінеді: Пішіндерді салыстыра білу түсінігі болады.

Қолданады: Қоршаған ортадан пішіндереге ұксас заттарға қызығушылық танытады.

Керекті құрал-жабдықтар: Әртүрлі пішіндер, пішіндер бейнеленген сурет, картотека.

Сөздік жұмыс: Төртбұрыш , үшбұрыш , шеңбер, қызыл, сары, жасыл.

Билингвальды компонент: төртбұрыш- прямоугольник, үшбұрыш- треугольник, дөңгелек-круглый, қызыл-красный, сары-желтый, жасыл-зеленый.

ҰОҚ барысы

1.Ұйымдастыру бөлімі

Шаттық шеңбері (Балалар шеңбер болып тұрады)

Кел балалар күлейік!

Күлкіменен түлейік.

Күлкі көңіл ашады,

Күліп өмір сүрейік.

Балалар бүгін сондай ерекше күн.Далада жарқырап күн шығып тұр.Күн бізге көтеріңкі көңіл-күй , жылулық сыйлайды. (Балалар орындарына отырады)

2.Негізгі бөлім

-Балалар бүгін біз сендермен «Көңілді пішіндер» туралы айтып, қызықты ойындар ойнаймыз.

- Мен сендерге жұмбақ жасырғым келіп отыр, қане жауабын кім табар екен?

Әрі қызыл, әрі сары

Жеп көрсең тәтті дәмі

(Алма)

-Жарайсыңдар балалар !Алманың түсі қандай екен? –Қызыл.

Алманың пішіні қандай екен? –Домалақ.

-Бәрекелді! Олай болса балалар, бүгін біз сендермен түстері әртүрлі « Көңілді пішіндермен» танысамыз.

-Домалақ. Домалақтың бұрыштары болмайды, домалайды. Бәріміз домалатып көрейік. Домалақтың түсі сары.

-Сары домалақ неге ұқсайды?

-Күнге, допқа ұқсайды.

-Жарайсыңдар, келесі пішініміз үшбұрыш.

-Үшбұрыштың үш бұрышы бар. Үшбұрышты домалатып көрейік, домалады ма?

-Жоқ.

-Неге?

-Өйткені, үшбұрыштың бұрыштары бар, бұрыштары болғандықтан тіреліп қалады.

-Үшбұрыштың түсі қызыл.

-Мына суреттен үшбұрыштарды көріп тұсыңдарма?

-Әрине, үйлердің шатырлары , шатырлардың да үш бұрышы бар.

-Келесі пішініміз қандай?

-Жарайсындар, төртбұрыш. Бұл пішін неліктен төртбұрыш деп аталады? Бәрекелді, себебі бұл пішіннің төрт бұрышы бар.

-Төртбұрыштың түсі қандай? Жасыл.

-Айналамызға қарайықшы, төртбұрышты пішінге қандай заттар ұқсайды?

-Тақта, есік, терезе.

-Өте жақсы.

-Балалар қараңдаршы, бізге « Көңілді күлдіргіш» қонаққа келіп қалыпты.

-Сәлеметсің бе, «Көңілді күлдіргіш»

-Сәлеметсіңдер ме , балалар. Мен « Көңілді күлдіргішпін» , бәріміз бірге көңіл көтеріп, ойын ойнайық.

(Күлдіргіш музыкамен кіреді, балаларға түрлі қимылдар қайталатып,

күлдіреді)

-Балалар, мен сендерге «Кім жылдам?» деген қызыкты ойын алып келдім. Ойынның шарты: үшбұрыш, төртбұрыш, домалақ пішіндерін жылдам менің сиқырлы қораптарыма жинау керек. Кім тездетіп жинаса, сол балаға сыйлығым бар. Ол үшін үш баланы ортаға шақырамын. Ал, кім жылдам, жарыс басталды, бір, екі,үш!

Қалған балалар қол соғып отырады.

Тәрбиеші: Балалар жарайсыңдар! Сендерге ойын ұнадыма? Олай болса «Көңілді күлдіргіш» бәріміз бірге демалып алсақ қайтеді? Орнымыздан тұрайық.

Сергіту сәті

Ал балалар тұрайық,

Алақанды ұрайық.

Оңға қарап бұрылып,

Солға қарап бұрылып,

Бір отырып, бір тұрып

Бой сергітіп алайық.

«Көңілді күлдіргіш» сергіту сәтін жасап, сыйлыққа турлі түсті шарлар таратып, балалармен қоштасады.

Қорытынды бөлім

Тәрбиеші: Біз қандай пішіндермен таныстық? Олардың қандай қасиеттерін білдік?

Балалар: Үшбұрыш, төртбұрыш,домалақ. Үшбұрыш және төртбұрыштың бұрыштары бар, домалақ пішіннің бұрыштары жоқ, домалайды.

Тәрбиеші : Жарайсыңдар! Ол пішіндердің түстері қандай?

Балалар: Қызыл, жасыл , сары.

Тәрбиеші: «Кім жылдам?» ойыны ұнадыма?

Тәрбиеші балаларды мақтап, мадақтайды.