Бір үзік
сыр.
Бесіктен белі шықпаған жас
сәби кезінен бастап,мектеп табалдырығына дейінгі тәрбие - тәрбиенің
негізі ,іргетасы деп ойлаймын. Осындай балаларды тәрбиелейтін өз
ата-анасынан,жанұясынан кейінгі ұйым ол балабақша. Сәбилердің
күлкісімен сусындаған балабақшалардың бірі Айнабұлақ ауданында
орналасқан №103 санаториялық балабақша. Осы ұжымда өздері де бала
сияқты жүректері ақ, жарқын ұстаздар еңбек етіп келеді.
Тәрбиеші-ұстаз қандай керемет мамандық. Қиындығы мен қызықты
сәттері көп тәрбиеші мамандығының майталманы Игібаева Несіпкүл
Оспанқызының еңбегін атап өтпей кету мүмкін емес. Балабақша
қабырғасына 1990 жылы тәрбиеші қызметіне орналасқан жас маман,
өрімдей қыз бала , 30 жылдан аса осы мекемеде еңбек етіп бала
тәрбиесімен айналысып келе жатқан әріптесіміз, аға ұстаз,аяулы ана,
қадірлі әже, бүгінгі күні құрметпен зейнеткерлікке шығып
отыр.
Ұстаздың жайын әрине ,ұстаздан
басқа кім біледі? Осы салада Несіпкүл Оспанқызымен бірге қызмет
атқарып жүріп, уақыттың зымырап өте шыққанын да байқамаппыз.
Адамның бойына біткен қасиет ,өзімен бірге мәңгі жасайтынын енді
аңғарғандаймын. Несіпкүл Оспанқызының өжет те, ер мінезін көргенде
ойланып та қаласың, ал сөйлесіп,пікір алысып немесе білмегеніңді
сұрай қалсаң ол кісіден жұмсақ, ақкөңіл, жүрегі таза, ізденімпаз
жан бар ма екен ?-деп қайран қаласың.
Бойындағы өз еліне деген
сүйіспеншілік, адалдық пен, қайсарлықты өскелең ұрпақ бойына
сіңіруде алдына жан салмайтын тәрбиеші екенін, өсіріп,тәрбиелеген
шәкірттерінің іздеп келіп құрметтеп жатқанынан ақ білуге болады. Өз
жұмысына аса жауапкершілікпен қарап, үлкенге құрмет,кішіге ізет
көрсетіп жүретін қарапайым, ойын үнемі ашық айта
білетін,шығармашылығын,ізденімпаздығын дамытып жүретін осы жанның
өзі ,артынан ерген әріптестері үшін үлгі тұтатын бір
тұлға.
Тәрбиеші мамандығын жете
меңгерген ұлағатты ұстазымыздың еңбегі еленіп ,білім саласына
қосқан үлесі үшін «Ұлағатты ұстаз» төсбелгісімен және бірнеше мәрте
құрмет грамоталарымен марапатталып, әріптестер арасында абыройға
қол жеткізді.
Ия, ең қиын және ең
жақсы ,үлкен жауапкершілікті талап ететін мамандық-тәрбиеші ұстаз
екені даусыз. Себебі болашақ ұрпақтарымыз сауатты, өнерлі,
жан-жақты,білімді болуы тәрбиеші-ұстазға байланысты. Сауатты
ұстаздан тәлім алған балалардың болашағы жарқын болады. Біз
Несіпкүл Оспанқызына осы күнге дейін жасаған еңбегіңнің жемісін
көре бер деп тілек айтқымыз келеді. Абай атамыздың «Ақырын жүріп
анық бас, еңбегің кетпес далаға» деген қағидасын әрдайым жүрегінің
түкпірінде ұстайтын Несіпкүл Оспанқызының денсаулығы мықты болып,
күш-қайраты таусылмасын деп тілейміз.