Егер жұмысқа орналасқыңыз келсе

Жаңа жұмысқа орналассаңыз

Шексіз түйіндемелерді жіберіп, жұмыс іздестірген күндерді артқа тастап, уайым мен сан сұрақтарға толы сұхбаттасулардан өтіп, жұмысқа орналастыңыз. Арман-мақсаттарыңызға жеткенмен, жадыңыз үрейлі сұрақтар мен күдіктерге толы.

«Алғашқы жұмыс күнім қалай өтеді екен?», «Әріптестер жаңадан келген мына мені қалай қабылдар екен?», «Берілген тапсырманы ойдағыдай орындай аламын ба?», «Басшылық тарапынан сөз естимін бе?» т.с.с сұрақтар сізді жаңа қызметіңізге кіріспес бұрын мазалауы ғажап емес. Сондықтан жаңа жұмысқа орналасқанда «Ақырын жүріп, анық басқан абзал» деген Абай данышпан нақылын естен шығармаңыз.

Сабыр сақтаңыз!

Алғашқы күндері әріптестер жаңа қызметкерге жылы қабақ танытпай, ал жұмысыңыз өзіңіздің көңіліңізден шықпауы да мүмкін. Сондықтан да, барлығына түсіністікпен қарап, сабыр сақтаңыз. «Мына жұмыс ұнамай тұр», «Әлі де кеш емес, кетіп қалсам ба екен», «Мен мұндай жұмысты қаламап едім», «Берілген жұмыс үстелі мен орындығы ыңғайсыз» деген ойлардан арылыңыз. Бұл жұмысқа қалай орналасқаныңызды ұмытпаңыз, келісімді де өзіңіз бергеніңізді естен шығармаңыз.

Салыстырудың қажеті шамалы

Жаңа жұмыс орнын ескі жұмыс орнымен ешуақытта салыстырмаңыз. «Ескі жұмысымда компьютерлер жаңа еді», «Бізге ешкім қатал талап қоймайтын», «Бұрынғы әріптестерім бұл жұмысты өздері істейтін», «Жаңа бастығым ескі бастығым сияқты маған жылы қарамайды» деп салыстырып, жаңа жұмыс орнына жатырқай қараудың еш жөні жоқ. Бір жұмыс басқаға ұқсауы тиіс емес.

Ашық ауыз болмаңыз

Жаңа танысқан әріптестермен бірден сырласып, оларға ескі жұмысыңыздан не үшін кеткеніңізді айтып, кеңінен ашылудың қажеті жоқ. Сондай-ақ, жақсы таныс емес жандармен өзіңіздің жеке өміріңізбен, қызығушылықтарыңызбен, отбасылық жағдайлармен бөлісуге асықпаңыз. Өзгелермен ашық-жарқын әңгімелесетін адамға жұмыс орнында күдікпен қарайды. Себебі, «Ашық ауыз жандар өсек әңгімелерге, қызыл сөзге жақын келеді» деген түсінік бар.

Көмек сұрауға ұялмаңыз

Жаңа жұмыс орнында берілген тапсырманы түсінбей жатсаңыз я орындаған кезде кедергілерге ұшырасаңыз, әріптестеріңізден көмек сұрауға арланбаңыз. Жаңа келген қызметкердің тез үйреніп кетуіне ықпал етуге әріптестер қашанда дайын екенін ұмытпағайсыз.

Іс-әрекеттеріңізге мән беріңіз

Жаңа ортада өзіңізге сенімді болыңыз. Әріптестеріңіздің барлығымен сәлеміңізді түзу болғанын қадағалаңыз. Жұмыс уақытында бос әңгімелерге, жөнсіз мәселелерді талқылауға, өзгелермен қосылып, өзгені сөз етуге жол бермеңіз. Қызмет талаптарына сай киім киіңіз, жұмысқа кешікпей келіңіз, тапсырмаларды уақытылы орындаңыз.

Табысты адамдардың 7 әдеті

Табысты адам мен бейбақтың қандай айырмашылығы бар екенін білесіз бе? 99% айырмашылық біреуінің өз өмірін ұйымдастыра алмауында екен. Тиімді ұйымдастыру – уақытында кедергілерді жойып, нәтижелі қорытынды шығару үшін уақытты тиімді пайдалануға және нәтижесінде көп іс тындыруға бағытталған өте жеңіл стратегия.

Неге кейбір адамдарда бәрі оңай жүріп жатады, ал сіз күнделікті күйбің тірліктен бір қолыңыз босамай, кешкісін істелінбей қалған жұмыстарды ойлап, ұйқыға жығыласыз? Кейбір адамдардың құпиясы мынадай бір қарапайым ережелерді ұстануында.

Табысты, ұйымшыл адамдардың 7 әдеті:

1. Оларда әрбір заттың өз орны бар. Әрбір заттың қолжетімді, ыңғайлы өз орны болады. Кітаптар үшін кітап сөрелері қарастырылған. Конверттер мен құттықтау қағаздар түрлі-түсті бояулармен үстелдің жәшігінде жатады.

2. Олар алған затты қайта орнына қояды. Әрбір зат өз орнынан алынғаннан кейін, пайдаланылып болғаннан соң дәл сол орынға қайта қойылуы тиіс. Уақытша тұра тұратын ешқандай орын болмауы керек. Жай ғана затты пайдаланып болғаннан соң орнына қойыңыз. Бұның еш қиындығы жоқ.

3. Олар бәрін жазып жүреді. Табысты және ұйымшыл адамдар тізім жасайды, белгілейді, күн тәртібін жазады және мұның бәрін бір жерде – электронды жоспарлаушы немесе қағаз күнделікте сақтайды. Олар бәрін бастарында сақтауға тырыспайды, компьютер не қарындашқа олардың есте сақтап жүруіне көмектесуіне ықпал етеді.

4. Олар қағаздардың бума-бума болып жатқанына жол бермейді. Іс-қағаздар мен пошта күнделікті оқылады, қағаздардың бос кеңістікте шашылып жатқанына жол бермейді. Қағаздардың қозғалу жүйесі олардың толассыз жинала беруін қамтамасыз етеді. Қандай да бір қол қоятын мәселелер тезірек қол қойылып, тиісті жерге жіберіледі. Үйдегі коммуналдық қызметтер шоты әрдайым бір уақытта төленіп, арнайы бір папкаға салынады. Журналдар үйде 1-2 апта болады да, кейін қоқысқа тасталынады.

5. Олар кейінге қалдырмайды. Табысты адамдар істі өздері жоспарлаған уақытта жасайды. Істі кейінге шегере берген сайын жағымсыз жағдайға ұшырау мүмкіндігі артады және көптеген мүмкіндіктерге тосқауыл қойылады.

6. Олар алға мақсат қояды және оған арнайы мерзім тағайындайды. Табысты адамдар қандай да бір мақсаттарына қол жеткізу үшін олар нені көздейтіндерін және қай уақытқа дейін жете алатындығын толығымен түсінеді. Олар әрдайым сол мақсатты қайта қарастырып, күнделікті онымен жұмыс жасауға уақыт бөледі. Олар қорытындыны талдап, бақылайды және шешім шығарып отырады.

7. Олар тек пайдаланатын заттарды ғана сақтайды. Табысты адамдар өздеріне қажет емес заттармен өмірлерін үйіп тастамайды. Олар бос кеңістікте дем алудың, ойлаудың қаншалықты тиімді екенін біледі. Олар үйіне тек өздеріне ұнаған және пайдалы заттарды ғана кіргізеді.