Еңбек қуанышы

Сабақ мақсаты: Еңбек етуге үйрете отырып, дұрыс әрекет құндылығының мағынасын ашу.

Міндеттері:

Оқушыларды уәдеде тұра білуге үйрету;

Өз көңіл күйін, эмоцияларын және сезімдерін басқара білу қабілеттері мен бағалау дағдыларын дамыту;

Өз жақындарының ішкі сезімдерін түсіне білуге, адамдарға тек жақсылық нұрын себе білуге тәрбиелеу.

Ресурстар:

оқулық, дәптер

(аудио,жазбалар дидактикалық материалдар)

Сабақ барысы:

1.Ұйымдастыру кезеңi: Жағымды көңіл күй. Сәлемдесу.

Оқу - құралдарына назар аудару. 5Т

2.Тыныштық сәтi.

«Күннің нұры» (3 - 4 мин)

Ыңғайланып отырыңыздар, денелеріңізді түзу ұстаңыздар. Аяқ-қолыңызды айқастырмаңыз. Қолыңызды тізеңізге немесе үстелге қоюға болады. Көздеріңізді жұмуларыңызды өтінемін.

Елестетіп көріңіз: Күн нұры сіздің төбеңізден өтіп, кеудеңізге қарай бойлап барады. Кеудеңіздің орта тұсында гүл түйнегі орналасқан. Гүлдің түйнегі нұрдан баяу ашылып келеді.

Нұр сәулесі сіздің бойыңызға ақырын тарай бастағанын елестетіңіз. Ол біртіндеп күшейе түсуде. Оймен осы нұрды қолдарыңызға түсіріңіз. Сіздің қолдарыңыз нұрға бөленіп, сәуле шашуда. Қолымыз тек жақсы, ізгі істер істейді және баршаға көмектеседі. Нұр аяқтарыңызға тарады. Аяқтарыңыз нұр сәулесін шашуда. Олар сізді тек жақсылық жасау үшін жақсы жерлерге апарады.

Одан әрі нұр сіздің аузыңызға, тіліңізге тарады. Тіліңіз тек шындықты және жақсы, ізгі сөздер ғана айтады. Нұрды құлақтарыңызға бағыттаңыз, құлақтарыңыз тек жақсы сөз бен әсем әуенді ғана естиді. Нұр көздерімізге де жетті, көзіміз тек жақсыға қарап, бәрінен жақсылықты ғана көреді. Сіздің басыңыз түгелдей нұрға бөленіп, басыңызға тек ізгі, сәулелі ой келеді.

Жаймен көзіңізді ашуға болады. Рахмет.

3.Үй тапсырмасын тексеру.

13 – сабақ. 58-59 бетке дейін оқып келу.

Еңбекке үйренудің қандай пайдасы бар?
· Қолғабыс ету, көмек беру дегенді қалай түсінесіңдер?
· Еңбек ету адамға не үшін қажет?
· Өзің отбасында қандай еңбекпен шұғылданасың? Айтып бер

Сабақ барысын талдау:

4.Дәйексөз

Еңбек тҥбі – береке
Халық нақылы

Нақыл сөзде не айтылған?

Дәйексөз оқушылармен бірге талданып, мәні түсіндіріледі. Дәптерге жазып, 2 рет қыздарға айтқызу 2 рет ұлдарға айтқызу. Барлығы бірге 4рет айтып шығады .

5.Оқиға айту. Мұғалімнің сыйы.

«Еңбексіз өмір- сүрсеңіз»

(Мысал әңгіме. Б.Әділов).

Мысал әңгімені мұғалім оқып береді.

Қара пышақ дүкеннен шығып, ас үйге келген соң тыным таппады. Нан турады, пияз аршыды, әйтеуір тамақ дайындалып, ас қамдалса, қолдан түспейтін болды. Ол жалқау еді. Бала кезіндегі «шалқайып жатсам» деген арманы есіне түсіп, жылап та алатын.

Бір күні Қара пышақ ауыр еңбектен құтылудың оңай жолын тапты. Иесінің көзін ала беріп, еденнің жырығына қойды да кетті. «Болды, - деді ол қуанып. - Енді еңбекті желкемнің шүкіры көрсін!...

Ай өтті, жыл өтті. Қара пышақ орнынан қозғалған жоқ. Оның қайда жатқанын ешкім білмейтін еді.

Бір күні:

Әй, туысқан, - деген дауысқа елең етіп қараса, еденнің жарығынан жылтылдаған көз сығалап қарап тұр екен. Бірден таныды, баяғы өзімен бірге жасалған Сары пышақ. Өзі ете көңілді, жүзі жарқ-жұрқ етеді. Сұлуланып кетіпті.

-Төмен секір, - деді Қара пышақ. - бірге жатайык. Бізді ешкім білмейді.

-Ол жерде не бар?

-Жатамыз, ұйықтаймыз, демаламыз. Ой, қандай рақат!

-Ал жұмысты кім істейді?

-Жұмыс бізсіз де істеледі.

-Рақмет! - деді Сары пышақ. - Еңбектен қашқанша, тер төгіп өлгенім артық. Еңбексіз өмір - сүрсеңіз. Өзің-ақ жата бер, рақатына бата бер.

Қара пышақ орнынан тұрайын деп еді, тұра алмады. Өне бойын тот басқан. Барлық жері сынып бара жатқандай сезінді.

1. Мысал әңгімедегі Қара пышақ қандай адамға ұқсайды?

2. Сары пышақтың қандай ісі сендерге ұнады?

3. Еңбек адамға не үшін қажет деп ойлайсыңдар?

4. Осы әңгіме неге тәрбиелейді ?

5. Өздерің еңбектің қай түрлерімен айналысқанды ұнатасыңдар?

6.Шығармашылық жұмыс.

1-топқа: мәтіндегі қара пышақпен сары пышақты салыстыру

2-топқа: еңбек жайлы мақал- мәтелдерді теріп алу.

3- топқа : сурет бойынша әңгіме құрастыру.

4-топқа. «Қайдан келдің, бауырсақ?» сахналау.

7.Топпен ән айту.

«Жақсы адамдар» 

Қалдыбек Талқанбаев

                                       Әні мен сөзі: А. Оралов

Сендер аман болыңдар жақсы адамдар,

Жақсы адамдар – бұзылмас тас қамалдар.

Табаныңның астында жатады әлі

Пенделіктен өресі аспағандар

Қайырмасы:

Жақсы адамдар, жақсы адамдар,

Сендер аман болыңдар жақсы адамдар.

Жақсы адамдар, жақсы адамдар,

Сендер аман болыңдар жақсы адамдар.

Жақсы адамдар.

Жақсы көрем сендерді жақсы адамдар,

Жүрегіңде өйткені аппақ ар бар.

Сендер жайлы шырқалар асқақ ән бар,

Жолы болсын ақ ниет бар адамдар!

Қайырмасы:

Жақсы адамдар, жақсы адамдар

Күйіп кетсін көре алмас бәтшағарлар

Жақсы адамдар, жақсы адамдар,

Жолы болсын ақ ниет бар адамдар!

Жақсы адамдар.

Сендер жайлы шырқалар асқақ ән бар,

Жолы болсын ақ ниет бар адамдар!

Сендер аман болыңдар жақсы адамдар,

Қарап өтсін сендерге басқа жандар.

8.Үй тапсырмасы.

14 – сабақ. 60-61 бетке дейін оқып, түсінік айтып келу.

9.Қорытынды сәтi. Ыңғайланып отырыңыздар, көздеріңізді жұмыңыздар. Бүгінгі сабақта не үйренгендеріңізді іштеріңізден қайталаңыздар. «Мен сабырлымын , ұстамдымын. Мен үйде де, аулада да, мектепте де өзімді сабырлы ұстаймын, еш нәрсеге ренжімеймін. Маған сабырлы, ұстамды болған өте ұнайды» деп қайталаңыздар. Әуен дауысы бәсеңдегеннен кейін көздеріңізді ашуларыңызға болады.

Сабақ аяқталды. Сау болыңыздар!