Ересек тобы Ашық ұйымдастырылған оқу қызметі

Қостанай облысы әкімдігі білім басқармасының «Әулиекөл ауданы білім бөлімінің» Құсмұрын «Қарлығаш» балабақшасы» коммуналдық мемлекеттік қазыналық кәсіпорны

Ересек топтың ұйымдастырылған оқу қызметінің технологиялық конспекті

Өткізу күні: 21.01. 2022 ж

Тәрбиеші: Асанова К.Р.

Білім беру саласы: «Таным» «Математика негіздері» Өтпелі тақырып: «Біз еңбекқор баламыз»

Мақсаты:

Тәрбиелік: математика негіздері ұйымдастырылған оқу қызметіне деген қызығушылықты, шыдамдылықты тәрбиелеу.

Дамытушылық: Балалардың кеңістікті, уақыты бағдарлауын , 5-ке дейін санауын, геометриялық пішіндер туралы білімдерін дамыту.

Оқыту: Реттік санауды, уақытты (таң, күн, кеш, түн), кеңістікті бағдарлай алу (оң жақта, сол жақта, ортасында), геометриялық пішіндерді білу, 5-ке дейінгі сандарды ретімен санауға, үйрету.

Ресурстармен қамтамасыз ету: сандар, пішіндер, жіптер, бейнебаян.

Билингвалдық компонент: пішіндер-фигуры, оң-правый, сол-левый.

Сөздік жұмыс: таң, күн, кеш, түн, оң жақта, сол жақта, ортасында.

Ұйымдастырылған оқу қызметінің барысы

1.Ұйымдастырушылық кезеңі:

Шаттық шеңбері:

Біз қандаймыз қандаймыз

Шұғылалы таңдаймыз

Күлімдеген күндейміз

Ренжуді білмейміз

Қуанамын менде

Қуанасың сен де

Қуанайық достарым

Арайлап атқан күнге

Сәлеметсіздерме апайлар!

- Балалар, бүгін мен таңертең жұмысқа келе жатқанда, пошташы маған хат әкелді , бірақ хаттың кімнен келгенін білу үшін мына бейнебаянды көру керек деп айтты. (диск көрсету).

Күлшеқыз туралы бейнебаян қосу.

Балалар сендер таныдыңдарма? Бұл бейнебаян кім туралы екен?

-Әрине Күлше қыз туралы екен.

Балалар неге оны Күлшеқыз деп атаған, кім біледі?

Иа, ол өте еңбекқор, ақылды қыз болыпты.

Ал ендеше мен сендерге Күлше қыздан келген хатты оқып берейін.

«Қымбатты балалар! Мен сендердің ақылды, еңбекқор бала екендеріңді білемін. Сондықтан сендерден көмек сұрағым келіп тұр. Мен бүгін кешкі балға барайын деп едім, бірақ мен математика патшалығында болғанда хрусталь кебісімді жоғалтып алдым. Оны табу үшін көптеген тапсырмалар орындау керек екен. Ал менің тапсырмаларды орындауға мүлдем уақытым жоқ. Өйткені өгей анам маған көп жұмыс берді».

Көмектесесіңдерме маған балалар?

Балалар, көмектесемізбе Күлшеқызға?

-Иә, әрине көмектесеміз.

Балалар математика патшалығына қандай көлікпен баруға болады?

Балалар өз жауаптарын ұсынады.

Балалар мен таптым, математика патшалығына тез жету үшін бізде мынандай сиқырлы кілем бар. Сонымен барайық.

Бірақ ол кілем ескіріп, тесіліп қалыпты, оны жамау керек екен.

Геометриялық пішіндермен кілемді жамайық.

Жарайсыңдар, кілемді жамадық, енді кілемге бір –бірден тұрайық.

«Өз орныңды тап» ойыны

Мақсаты: Балалардың кеңістікті бағдарлай білуін дамыту.

Ерасыл кілемнің ортасына тұр.

Алдияр Ерасылдың сол жағына тұр.

Алина Ерасылдың оң жағына тұр.

Даурен Ерасылдың алдына тұр.

Раяна Ерасылдың артына тұр.

Балалар кеңістікті бағдарлап кілемге тұрады.

Музыка ойналады.

Міне балалар, біз математика патшалығына да келіп жеттік.

Ал енде тапсырмаларды орындауға көшейік.

Ал біз бірінші тапсырманың қайда екенін қайдан білеміз? Қане бір санын тауып алайық.

1-тапсырма:

"Шатасу" дидактикалық ойыны:

Мақсаты: Тәулік бөліктерін атай алуын дамыту.

"Балалар, патша бәрін шатастырды, оның не айтқанын тыңдаңдар:

Таңертең балалар ұйықтайды.

Түнде балалар серуендеуге барады.

Кешке балалар балабақшаға келеді.

Күндіз таңғы ас ішеді.

Балалар дұрыс жауаптарын айтады.

Жарайсыңдар балалар дұрыс жауап бердіңдер.

Енді екі санын тауып алайық.

2-тапсырма:

«Шатасқан сандар» ойыны.

Мақсаты: 5-ке дейін санай алуын дамыту.

5-ке дейін сандарды тура және кері санау.

Санамақ айту.

Ал, санайық санамақ,

Саусақтарға қарап ап.

Кәне,кәне санайық,

Санын біліп алайық.

1,2,3,4,5-еу,

Қолымда сонда саусағым нешеу?

Бесеу.

Жарайсыңдар балалар, енді үш санын тауып алайық.

3-ші тапсырма:

Геометриялық пішіндерді жіппен салу.

Жарайсыңдар балалар, енді төрт санын тауып алайық.

4-ші тапсырма:

Монтессори ойыны «Пішінді моншақтар»

Балалар қане Күлше қызға түрлі-түсті моншақтарды тізіп өзімізбен бірге алып кетіп, оған сыйлық жасайық.

Ой балалар қараңдаршы, Күлшеқыздың хрусталь кебісі де табылып қалды.

Хрусталь кебісті таптық, енді сиқырлы кілемшемен тобымызға оралайық.

Топқа оралу.

Күлшеқыздың хрусталь кебісі мен моншақтарын мен беріп жіберейін.

Қорытынды:

Балалар біз қайда бардық?

Немен бардық?

Математика патшалығында біз не орындадық?

Нешеге дейін санадық?

Моншақты неден жасадық?

Тапсырмалар қиын болды ма?

Біз кімге көмектестік?

Жарайсыңдар балалар. Біз бүгін көп еңбектендік, сол үшін Күлшеқыз сендердің еңбекқор, ақылды екендеріңді біліп, сендерге рахметін айтып жатыр, және сендерге сыйлық беріп жіберіпті.Ол сендерге сыйлыққа жаңғақтар беріп жіберіпті.