Ерлік — ел мұрасы, ұрпаққа үлгі

Ерлік — ел мұрасы, ұрпаққа үлгі

Қазақтың бағалы асыл сөзі, өшпес өнегесі – ерлік. «Ерлік елге мұра, ұрпаққа үлгі» деген нақыл сөзде үлкен мағына жатыр. Батыр бабаларымыздың отан үшін жанын беріп, намысын қорғауы – бүгінгі тәуелсіз елдің негізі. Ұрпақ бойына отансүйгіштік пен ерлік қасиетін сіңіру – ұлттық тәрбиенің басты ұстанымы.

Баршаға мәлім, сонау Қазақ хандығы құрылған кезден бастап, халқымыз сан түрлі қиын-қыстау кезеңдерді бастан өткерді. Шапқыншылық, отаршылдық, қуғын-сүргін жылдары, Ауған соғысы мен 1986 жылғы Желтоқсан оқиғасы — осының бәрі ел үшін жанын қиған ерлердің есінде қалған естелігі. Сол бір кезеңдердегі ағаларымыздың ерен ерлігі, бүгінгі бейбіт өмірдің негізіне айналды.

Қазіргі таңда елімізде отаншыл, ұлттық рухы биік ұрпақ тәрбиелеу – басты міндет. Білім беру жүйесіне енгізілген жаңа реформалар мен бағдарламалар жастардың жан-жақты дамуына жол ашады. Әсіресе, мектеп қабырғасындағы «Алғашқы әскери және технологиялық дайындық» пәнінің орны ерекше. Бұл пән – оқушыларды ел қорғауға, тәртіпке, батылдық пен жауапкершілікке тәрбиелейді. Әрбір жас отанды қорғау – қасиетті борыш екенін осы пән арқылы терең түсінеді.

Сабақ барысында оқушылар әскери істің негіздерімен, төтенше жағдайлардағы іс-әрекетпен танысып, өмірде өз орнын таба білетін, білімді әрі патриот азамат болып қалыптасады. Сонымен қатар бұл пән ата-баба ерлігін үлгі етіп, жас буынның бойында адамгершілік, жігер, батылдық пен отансүйгіштік қасиеттерді қалыптастыруға ықпал етеді. Осылайша, өскелең ұрпақ – ел болашағы. Ұлттың тірегі болатын жастардың бойына ерлік пен елдік рухын сіңіру – біздің міндетіміз. Сондықтан әрбір ұрпақ бабалар жолын жалғап, ел қорғаны болуға тиіс. Ерлік – ұмытылмас мұра. Ал сол мұраны ардақтап, жүректе сақтау – ел болашағына жол ашатын тәрбиенің бастауы.