«Ертегілер еліне саяхат, Мақта қыз бен мысық»

БҚО, Орал қаласы №8 «Сказка»

бөбекжайының қазақ тілі мұғалімі

филология ғылымдарының магистрі

Татаханова Айдана Сабырқызы

Ұйымдастырылған оқу қызметі «Ертегілер еліне саяхат, Мақта қыз бен мысық»

Пәні: қазақ тілі

Білім беру саласы: қатынас

Тақырыбы: Ертегілер әлеміне саяхат «Мақта қыз бен мысық»

Мақсаты: Балаларға жыл бойы өткенді қайталатып, білімдерін тиянақтау. Ойындар арқылы көктем мезгілінің ерекшеліктерін, орман және үй жануарларының айырмашылығын, пайдасын, дала және үй құстарының айырмашылығы мен пайдасын айтып, олардың дыбыстауларын сала білу. Заттарды салыстыру: ұзын, қысқа, дәмін пішінін, түсін ажырату. Көкөніс пен жемістерді ажырата отырып, олардың өсетін орнын таба білу. Балалардың адамгершілік қасиеттерін қалыптастыра отырып, айналадағы қоршаған ортаға көмек беруге, еңбек етуге, ұқыптылыққа, мейірімділікке, шапшаңдылыққа тәрбиелеу. Релаксация барысында балалардың қиялдарын дамыту, ермексазбен жұмыс жасау арқылы саусақ бұлшықеттерін дамыту. Логикалық ойлау қабілеттерін дамыту.

Көрнекіліктері: Қызыл телпек кейіпкері, Қасқыр ойыншық, шалшық су, көпір, көкөністер мен жемістер муляждары, бақша мен ағаш, орман және үй жануарларының ойыншықтары, үй және дала құстарының суреттері, мр 3 дыбыстары, ермексаз, ұзын, қысқа жолдар.

Оқу іс - әрекетінің кезеңдері

Мотивациялық – қозғаушылық

Психологиялық сәт.

- Балалар, қараңдаршы бүгінгі біздің сабағымызға апайлар келіп отыр. Олар сендердің қаншалықты ақылды екендеріңді көргілері келіп тұр. Сондықтан балалар, кәне бәріміз бір – бірімізге қарап, күлімсірейік. Көңіл күйіміз жақсарды ма?

-Балалар, қазір қандай жыл мезгілі?

-Көктем мезгілінде неше ай бар?

-Көктем мезгілінің ерекшеліктерін кім айтып береді?

-Ал кім бізге көктем мезгіліне арнап тақпақ айтып береді?

Балалар қонақтармен амандасып, бір - бірлеріне қарап күлімсірейді. Балалардың жауаптары.

-Көктем мезгілі.

-Көктемде 3 ай бар: наурыз, сәуір, мамыр.

-Көктемді күн жылынып, қар ериді, адамдар қалың киімдерін шешіп, жеңіл киім кие бастайды. Ағаштар бүршік жарады. Жылы жақтан құстар ұшып келеді.

Ұйымдастыру кезеңі

Ғажайып сәт. (Әуен қосылады) Залға мысық келеді.

-Саламатсыздар ма балалар?

Мұғалім: Балалар қараңдаршы бұл қай ертегінің кейіпкері?

Мұғалім: Дұрыс айтасыңдар. Мысық сен қайда бара жатырсың?

Мысық: Мен Мақта қызға ренжіп, қашып келемін.

Сол кезде Мақта қыз келеді. (әуен қосылады)

Мақта қыз: АААА, Мысық, қайда бара жатырсың? Құйрығынды кесіп аламын.

Мысық: Құйрығымды қайтаршы...

Мақта қыз: Мен саған тапсырмаларды дайындап қойдым. Солардан өтсең ғана құйрығынды қайтарып беремін.

Мысық: (көңілсіз) мен бұл тапсырмаларды жалғыз өзім орындай алмаймын ғой. Енді құйрығымды қалай қайтарамын?

Мұғалім : Жылама, мысық, біздің балалар саған тапсырмаларды орындауға көмектеседі.

1. Шалшық судан өту.

(балалар аяқтарын суламай шалшықтан секіруге тырысады)

2. Көпірден өту. (балалар тепе - теңдікті сақтап, ұзын орындықтан өтуге тырысады)

3. Бақтағы араласып кеткен көкөністер мен жемістерді айыру. (көкөніс пен жемістерді өсетін орындарына орналастырып, олардың түсін, дәмін, аз - көп ажырату).

Сергіту сәті

«Аяқпенен топ - топ - топ»

4. Ормандағы тапсырмалар.

-Балалар қараңдаршы, мына жерде Шопан атаның қорасындағы үй жануарлары орманда адасып кеткен. Соларды мына қораға апарып салайық. (үй жануарларын орман жануарларынан ажыратып бойларын салыстыру ұзын, қысқа; жануарлардың дыбысын салу, жануарлардың пайдасы)

Релаксация.

(Әуен қосылады) Балалар, біздер қазір ормандамыз. Орманның ауасы сондай таза. Кәне, бәріміз, көзімізді жұмып, таза ауамен терең тыныс алайық. Кеудеміз тазалыққа, мейірімділікке толы болды, құстардың үні сондай керемет естіледі. Осындай керемет сезімімізбен көзімізді жайлап ашайық. Құстардың үні шығады. Құстарды дыбыстары және сурет бойынша ажырату. пайдасын айту (аққу, тырна, қарлығаш, көкек, күркетауық, қаз, тауық, әтеш)

Шығармашылық жұмыс. (ермексазбен)

Мұғалім : Балалар, кәне бәріміз бірге құстарға арнап, ермексаздан құртшалар жасап берейік. Мұғалімнің көмегімен балалар құртшалар жасайды.

Балалар барлық тапсырмаларды орындап, Мақта қыз бен мысықты татуластырады.

«Достық» биін билейміз.

Қорытындылау.

- Балалар, бүгінгі сабағымыз ұнады ма?

-Біз кімге көмек бердік?

- Қандай тапсырмаларды орындадық?

-Құстарға ермексаздан не жасап бердік?

-Балалар, көңіл - күйлеріңіз жақсыма? Олай болса, жайлап тобымызға барайық.

Күтілетін нәтиже:

Біледі: Тепе - теңдікті сақтау, көкөніс пен жануарларды, дала мен үй құстарын ажырату

Қолданады: ҚМТҚ (ұзын, қысқа), заттардың дәмін, түсін, пішінін ажырату

Игерді: ермексазбен ұқыпты жұмыс жасау.