эссе: "Арайлы алтын күзім!"

Арайлы алтын күзім!

Келді міне, алтын күз ,

Сары шашты жарқын жүз.

Қырман толы егіске,

Бағы толы жеміске.

Елді сыйға кенелтті

Күзгі сұлу періште,

-демекші мінекей арайлап атқан күз мезгілі де келіп жетті. Әр мезгілдің өзіне тән қасиеті бар. Бірі жаныңа жылулық сыйласа, бірі қайта туған жауқазындай бүршік атып жатады, ал бірі суығына үйретіп те үлгереді. Осы төрт мезгілдің ішінде ең кереметі күз болар.

Күз – адамзаттың сағыныш айы. Мектепке асыққан оқушының сағынышы, қара жерге асыққан жапырақтың сағынышы, егістіктегі мол жемісіне асыққан бағбанның сағынышы, алыстап кеткен достардың қауышуға деген сағынышы, бойжеткен мен бозбаланың махаббат сағынышы, ақынның қаламына, суретшінің күзгі эллегияға деген сағынышы...

Алтын күз бұл шынайы қанық түстерге боялған жыл мезгілі. Бұл кез өзінше қызыққа толы, табиғатқа әдемілік беретін, керемет мезгілдің бірі. Табиғаттағы болып жатырған өзгерістерді байқамау мүмкін емес. Айтар болсам, күн қысқарып, түн ұзарды. Жыл құстары жылы жаққа ұшып бара жатқан іздері көк аспанда байқалады. Сонымен қоса, күзде «Тілдер», «Мұғалімдер»  мерекесі және де «Алтын күз» мерекесі де  аталып, тойланып өтеді.

«Сұр бұлт түсі суық қаптайды аспан, Күз болып, дымқыл туман жерді басқан» -деп Абай Құнанбайұлының айтпағы дөп түскен. Бұл осынау мезгілдің пейзаждық анық үлгісі. Жер-Ананың сарқылмас алтын түске боялған пейзажының өзі бір керемет сезімге бөлейді емес пе? Сол себептен, алтындай сап-сары, табиғатқа әдемі сән беретін солтүстіктің күз мезгілі маған қатты ұнайды.