Эссе.

Әуелеген әуеннің жетегінде...

Ән, әуен, саз. Бұл маған бала кезден –ақ таныс. Жалпы қаны қазақ баласының әнге жақын емесі жоқ-ау. Ал маған ол тек қызығушылықпен ғана емес әкемнің де, шешемнің де қанмен де келген. Әкем Қабиболла Әлесов өңірімізге белгілі сазгер болса, анамның ағасы Ермек Қазиев республикаға белгілі музыка ғылымының профессоры, дәулескер күйші.

Қазақтың маңдайына біткен біртуар ұлы Жүсіпбек Аймауытовтың: «Діндар елдің баласы дінге, сауықшыл елдің баласы сауыққа бейім келеді» дегеніндей біздің отбасындағы балалардың барлығы музыкаға әуес болып өсті. Ол ,әрине, отбасындағы тәрбиенің ықпалы болса керек.

Мен орта мектепті бітірісімен спортқа қызығушылығым мен икемім бола тұрса да, әке жолын қуып музыка саласын таңдап, Дәулеткерей атындағы өнер институтының саз факультетіне оқуға түстім. Оқуымды ойдағыдай аяқтап күні бүгінге дейін осы салада жемісті еңбек етіп келе жатқаныма 20 жылдан астам уақыт өтті. Жеткен жетістіктерім де аз емес. «Ұстазынан шәкірті озса, ол ұстаздың мәртебесі» демекші, мені қуантатыны шәкірттерімнің жетістігі. Көптеген шәкірттерім облыстық, қалалық, республикалық байқаулардың жеңімпаздары мен жүлдегерлері атанып жүр. Ол- менің еткен еңбегімнің, төккен терімнің зая кетпегені.

«Өнер сатылмайды, бағаланады» дегендей 2018 жылы республикалық «Өнерге қосқан үлесі үшін» медалімен марапатталдым.

«Өлі риза болмай, тірі байымас дегендей» 2016 жылы әкемнің қалған мұралары-жазылған әндерін жинақтап, «Бұйратты құмында ізі бар» атты жинақтың шығуына мұрындық болдым. Бұл- әке рухы алдындағы алғысқа толы парызым еді.

Адамға ең бастысы- рух байлығы. Адалдық, арлылық, абыроймен бірге, әнге әуестік, әуенге құмарлық әке қанымен, ана сүтімен бойыма сіңгенін мен мақтан етемін

Орал «Сервис» технологиялық

колледжінің музыкалық жетекшісі Алесов Ғабит Қабиболлаұлы