Эссе: "Мамандығым - мақтанышым"

Эссе.

«Мамандығым - мақтанышым».

КММ№14 мектеп-бақшаның

қазақ тілімұғалімі

Қайыржанова Гүлмира Тоқтамысқызы.

Ана тілің арың бұл,

Ұятың боп тұр бетте.

Өзге тілдің бірін біл,

Өз тіліңді құрметте!

(Қадыр Мырза Әлі)

Жүрек түбінен ақтарылып шыққан осы сөз маржандары арқылы мемлекеттік тілдің мәртебесінің өсуі мен бала болашағы менің қолымда екендігі туралы ой өрбітпекпін.

Бала болашағы менің қолымда! Мемлекеттік тілді қолдану мен оны дамыту - менің басты міндетім, адами және кәсіби борышым! Себебі: мен тәрбиешімін, ұстазбын. Әр күні менің алдымда көздеріндегі нұрларынан таудан биік, сүттен таза армандары оқылатын елдің болашақтары, бүгінгі балалар ертеңгі болашақтар отыр. Оқу мен тәрбие атты егіз ұғымды оқушы бойына ата-баба қанымен тараған ана тіліміз арқылы сіңіріп, ертеңімізге қол жеткіземіз. Ертеңгі армандарға қол жеткізуде ата-ана, оқушы, мұғалім үштігінің бірлігі қажет. Біз ертеңге бірге барамыз. Санасында арман, жүрегінде қайраты жоқ жаннан ештеңе шықпайды. Біз араманға жол сілтейміз! Арман ұрламаймыз, бала бойына арман ұялатамыз. Себебі: біз ел болашағын кішкентайынан тәрбиелеп жүрген бағбанбыз.

Ақылгөй Жүсіп Баласағұн: «Адамның мінезді, білімді, болып өсуіне үш жағдай: қоршаған орта, достары, тәрбиеші ұстазы әсер етеді» деген екен. Өзімнің ар жолында, адамдық жолында, ауыр да, құнды жолда жүргеніме қуанамын. Қуанам да мәңгілікке жалғасқан, арманменен астасқан, мұраттарға бастатқан ұстаздық ісіме құлшына, мейірлене кірісем. Бір күні бір оқушым: «Мұғалім, мен де сіз сияқты екі тілде сөйлей аламын ба?» деп сұрады. – Иә, сөйлейсің, сөйлей аласың, ол үшін жақсы оқып, аянбай еңбек ету керек дедім. Ол мәз болды. Мен де қуандым. Шәкірттеріме сенемін, олар ойға алғандарына жетеді. Өйткені, олардың армандары – мемлекеттік тілді еркін меңгеріп,ел үшін еңбек ету. Сенім бізді болашақтағы армандарға жетелейді. Олар армандарына жетеді. Себебі: олар өздеріне сенімді, еліміздің болашағы. Біздің шәкірттеріміз елімізді гүлдендіретін, тіліміз бен үнімізді келешектің шыңына жеткізеді. Олар армандарды жүзеге асырады. Әрбір шаңырақта келешекке үмітпен қарайтын балалардың қаулап өсіп келе жатқаны тәуелсіз Қазақстанның мәңгілік ертеңінің кепілі деп білемін. Қазақстанның өсуі, болашағының жарқын болуы – қазақ тілінде және жас жеткіншектердің қолында. Осы жас жеткіншектерді жан-жақты дамыған тұлға етіп қалыптастыру, сол үкілі үміттердің түзу өсуі - ұстаз деген –ұлы есімге ие болып жүрген мына біздердің қолымызда.

Бала болашағы – елдің болашағы. Бала болашағы – менің қолымда! Барша ұстаздар солай түсініп, солай тәрбиелеуге міндетті. Бұл – менің ұстанатын басты қағидам.

ХХІ ғасырдың ұрпақтары ана тілін, тарихын біліп, қазіргі заманға сай озық біліммен қарулануы, отаншыл болуы керек. Меніңше, еліміз алдыңғы қатарлы дамыған елу елдің қатарына енуі үшін – «кішкентай жүректерден», яғни бала болашағынан бастауымыз керек.

Бала болашағының бір тұтқасы менің қолымда екенін ойлағанда, бойымды мақтаныш сезімі билеп, өзімді бақытты сезінемін. Көкірегімді кернеп, қиялыма қанат бітірген мынадай жыр шумақтармен ойымды аяқтағым келеді.

Тек білімге жұмсап қуат күшін де,

Жас өркендер ҚАЗАҚ ТІЛІН құрметте!

Мен ұстазбын- нардың жүгі мойнымда

Мақтанамын сол тағдырым үшін де.

Мен өзімді мемлекеттік тілді үйретудегі мың қарлығаштың бірімін және бірегейімін деп білемін!