Эссе «Менің болашақ мамандығым-әлеуметтік қызметкер»

Менің ойымша мамандықтың бәрі жақсы. Кез келген саланың, кез келген мамандықтың өзінің қызығы мен қиындығы қатар жүреді.

Менің таңдауым – әлеуметтік қызметкер мамандығына түсті. Жалпы ол қандай мамандық және қандай қызмет атқарады? Менің пайымдауымша, әлеуметтік қызметкер өмірлік қиын жағдайда жүрген адамдарға, мүмкіндігі шектеулі жандарға, өзіне қызмет көрсете алмайтын, біреудің көмегіне мұқтаж жандарға қол үшін созады.

Осы уақытқа дейін әлеуметтік қызметкер болып жұмыс жасағалы өмірдегі басты құндылықтарды бірінші орынға қойып, бағалауды үйрендім. Себебі тәжірибе жүзінде, жұмыс кезінде көмекке мұқтаж жандарды көріп, басты байлық, баға жетпес қазынамыз - денсаулық екенін еріксіз ұғындыратыны анық. «Адамзат жақсыға тез үйренеді»,- деп текке айтылмаған екен. Себебі, қазіргі таңда өкінішке қарай, көп жағдайда аяқ-қолымыз сау, бауырларымыз бүтін, ата-анамыз аман екеніне қарамастан, оны аздық етіп барымызды бағаламай, мансап, дүние қуып кетіп жатқан адамдар саны қатары көбеюде. «Алтын көрсе-періште жолдан таяды»,- демекші дана халқымыз мұндай жағдайлар адамды қынжылтады.

Әлеуметтік қызметкер мамандығы ең алдымен үлкен жауапкершілікті, төзімділікті, сабырлықты, мейірімділікті, байқампаздықты, жанашырлықты және де ең басты адагершілікті қажет ететіні сөзсіз деп есептеймін. Қазіргі таңда аса қажетті мамандықтардың бірі. Әлеуметтік қызметкер басқа салалармен байланысқан сегіз түрлі бағыт бойынша қызмет көрсетеді. Ол қандай болуы керек?

Менің көзқарасым бойынша, жан-жақты, әр түрлі салалардандан хабардар, идеяларға толы, ізденімпаз, жаңашылдықты ұнататын, адамдарға шынайы жаны ашып, көмектесуге дайын тұратын, адамды тыңдай білетін, алға жетелейтін, жүзі жылы, сенімді, тиянақты болуы маңызды деп есептеймін. Қызмет алушыларды тұрмыстық әдеттерге, тазалыққа, ұқыптылыққа үйретіп, еңбекке баулып, қоғамдық, мәдени шараларға қатысуына ат салысып, әлеуметтік ортаға бейімдеу және адамдармен үнемі қарым-қатынаста болуына ықпал жасау, өмірге деген, білімге деген құлшынысын арттыру әлеуметтік қызметкердің жұмыынң басты міндеттерінің бірі деп айтсам артық болмас.

Әлеуметтік қызметкер болу - мен үшін үлкен мақтаныш. Себебі көмекке мұқтаж жандардың өмірінің сапасының жақсаруына аз да болсын үлесімді тигізіп, игі істер жасауға үлкен мүмкіндік. Сондықтан да жұмыстан тас психологиялық тренингтер, әр түрлі мәдени, спорттық шаралар мен ойындарды жиі ұйымдастыруға тырысамын. Байқауымша осындай шаралардың әсері ерекше. Олардың көңіл-күйі көтеріліп ғана қоймай, шығармашылық және ойлау қабілеттері арта түседі. Демек, еңбегіміздің нәтижесі зая емес екендінінің дәлелі.