Эссе "Менің шынайы көшбасшым"

Эссе

«Менің шынайы көшбасшым»

Галешова Насип Ержанқызы

Атырау облысы, Индер ауданы

Мұқанғазы Сиранов атындағы орта мектебінің өзін- өзі тану пәні мұғалімі

Ұстаз! Осы бір сөздің өзінде қаншама мән-мағына, қасиетті ұғым жатыр. Ұстаз алдынан өтпейтін ешкім жоқ. «Жақсы мұғалім – мектептің жүрегі» деген Ыбырай  атамыз. Жүрексіз өмір болмаса, мұғалімсіз білімнің, тәрбиенің іске аспайтыны белгілі.

Менің шынайы өмірдегі көшбасшым- қолыма алғаш қалам ұстатып, жазу жазғызып, әріп үйреткен Қабиева Раш апай. Бала күнімнен Раш апайдың әрбір айтқан сөздерін санама тоқып, «ұстаз болсам» деген арман мені болашаққа жетеледі.

Әліппенің бетін ашқанда әрбір суреттің мән-мағынасын талдап түсіндірген кезде мен де осы апай сияқты "оқушылардың алдында тұрып сабақ берсем..." деп армандайтынмын.

Раш апайдың қара костюмі, оқтаудай түзу аяғы, қара туфлиі, шашын төбесіне түйіп қойған жазық маңдайы, әрбір оқушыға мейірлене қараған көзқарасы дәл бүгінгідей көз алдымда. Апай еш уақытта оқушыларға дауыс көтермейді. Бойындағы ибалылығы, қарапайымдылығы біздің де тәртіпті, тәрбиелі болып өсіп, ер жетуімізге зор ықпалын тигізді.

Осы асқақ арман мені мектеп бітіргеннен кейін 1982 жылы Алматы қаласына жетеледі. Алматыға барып Қазақтың қыздар педагогикалық институтының жаратылыстану- география факультетінің химия- биология бөліміне емтихан тапсырып, сол жылы осы институттың студенті атандым.

Жоғарғы оқу орынында оқып жүрген кезімде қазақтың маңдайына біткен қазақ қыздарының арасындағы дара тұлғасы, биология оқулықтарының авторы, доцент Рысбала Әлімқұловадан тікелей дәріс алғанымды мақтан тұтамын. Арманның жетегінде жүріп 1987 жылы институтты аяқтап, өзімнің туған ауылыма оралдым.

Ұстаздық еңбек жолымды Индер ауданының Аққала орта мектебінен бастадым.

Жанұя жағдайына байланысты тұрмыс құрып,1995 жылдан бастап мамандығым бойынша Мұқанғазы Сиранов атындағы орта мектепке ұстаз болып орналастым. 2010 жылдан бастап осы мектепте өзін-өзі тану пәнінен дәріс беріп келемін.

Осы ұстаздық еткен еңбек жолымда балаға тек білім беріп қана қоймай, тәрбиеге мән беріп, әр баланы сүйіспеншілікке бөлеп, жан дүниесімен сырласып, рухани болмысын терең түсініп, риясыз махаббатқа үйреткен көшбасшым апайды бірде - бір ұмытқан емеспін.

     Алғашқы ұстазым Раш апай балалармен риясыз еңбек етсе, сол риясыз еңбегін өмір бойы өзіме ұстаным етіп, шын ықыласыммен өз өмірімнің көшбасшысы деп өзім де кейінгі ұрпаққа жалпы адамзаттық құндылықтарды жеткізуде риясыз сүйіспеншілікпен қызмет етуге күш-жігерімді арнаймын.