эссе "Отан оттан да ыстық"

Эссе«Отан оттан да ыстық!»

Менің кіші Отаным-Қанай ауылы. Бұл ауыл туралы айтсам,ауылым бес-ақ көшеден тұрады. Ауылдың ортасында, білім ордасы Қанай мектеп балабақша кешені орналасқан. Оның жанында ауылдық Мәдениет үйі, фельдшерлік пункті,саябақ, «Отан-Ана» ескерткіші бар. Өткен жылдары көшелердің атаулары өзгертілді, біз егеменді, тәуелсіз елде тұрып жатқанын білдіреді деп ойлаймын.Қазір көшелердің аттары: Маншүк Маметова, Құрманғазы Сағырбайұлы, Бейбітшілік, Достық, Бірлік деген әдемі аттары бар. Қазіргі таңда біз тәуелсіз елде тұрамыз, еліміз бейбіт өмір сүріп келе жатыр, осының себебі елімізді сауатты басқарып отырған елбасшымыздың арқасы. Бір мың тоғыз жүз тоқсан бірінші жылы желтоқсанның он алтыншы күні еліміз тәуелсіздікке жетті. Дәл осы күні менің нағашы ағам Азамат дүниеге келді, ол тәуелсіздіктің жандай құрдасы. Біздің үйімізде тәуелсіздік күнін жыл сайын тойлап өтіледі. Нағашымон жасқа толғанда, сол жылы болған облыс әкімі Қ.Көшербаев қалаға тәуелсіздік құрдастарын жинап, елбасы атынан компьютер сыйлады. Нағашым мені сол компьютермен сурет салуға, мәтіндерді теруге үйретті. Азамат нағашы мектепті бітіріп, колледжге түсті, содан кейін әскери борышын атқарды.Тек оның өмірі өте қысқа болды. Жыл сайын 16 желтоқсан күні оның туған күнің және де еліміздің тәуелсіздік күнін атап өтеміз.

Кішкентай ауылымыздың тарихы бар. Ауылдың ортасында орналасқан ескерткіште Ұлы Отан соғысы ардагерлерінің тізімі жазылған,біз жыл сайын 9 мамыр күні ескерткішке гүл шоқтарын саламыз,митинг жасап,еске аламыз. Қазіргі таңда ардагерлер жоқ болса да,біз олардың жесірлерін,тыл қызметкерлерін құттықтап,қолымыздан келген көмегімізді көрсетеміз.Біз үшін соғысқан,бейбіт елде тұрған үшін,олардың ерлігі ешқашан ұмытылмайды.

Өз ауылым,алтын бесігім десем, жаным көкке көтерілгендей болады. Ауылымыз Жайық өзенінің бойында орналасқан. Ауылдың жанында Қанай көлі болғандықтан,ауылдың атауыҚанай деп аталған. Мен төртінші сыныпта оқығанымда, осы көл туралы эссе жазып, облыстық эссе сайысынан жүлделі орын алдым. Сол жылдары көктемдегі судың молшылығы-ай, ауылымыз аралда тұрғандай болды. Осы үш жылдың ішінде көліміздің суы тартылып,көліміз кеуіп қалды. Біз үшін ол экологиялық апат деуге болады, өйткені көлдің суымен ауылымыздың тұрғындары бақшаларын , малдарын суарды. Жаз мезгілінде балалар суға түсе алмады. Көктемде аққулар ұшып келетін көл жоқ. Қазіргі кезде жері жарылып,кеуіп тұр. Ауылдың ересектері бұл жағдайды жиналыстарда айтса да, ешқандай өзгеріс болмай тұр. Табиғатымызды сақтауға үйренейік, көліміздің мәселесін шешуге тырысайық. Көлмен бірге ауылымызды жоғалтып алмайық, бір-бірімізге қолдау көрсетіп,кішкентай отанымыздың ыстығына бөленіп жүрейік. Еліміз аман, табиғатымыз бай, тәуелсіздігіміз мәңгі болсын!

Батыс Қазақстан облысы

№13 ЖББМ Орал қаласы

«Отан оттан да ыстық!» эссе

13 жас, 8 «А» сынып

оқушысы Ердаулетова Римма Азаматовна

+77767436312

Мұғалімі: Ердаулетова Гулнара Жолаушиновна