Эссе "Ұстаз - ұлы тұлға"

Ұстаз – ұлы тұлға

(Эссе)

«Ұстаз болу – жүректің батырлығы,

Ұстаз болу- сезімнің ақындығы.

Ұстаз болу- мінездің күн шуағы,

Азбайтұғын адамның алтындығы»,-деп ақын Ғафу Қайырбеков жырлағандай, сөзі маржан, үні ән ұстаз – ұлағатты есім. Шәкірттеріне білім нәрі мен тәлім-тәрбие беру, жақсы қасиеттерді бойына дарытып, адамгершілік рухта бағыт-бағдар беруде ұстаздың еңбегі зор. Ол тек оқу, жазу үйрететін мұғалім ғана емес, қиналған сәтте қол ұшын беретін – қамқоршы, көмекші. Іздеген сұраққа, бастаған іске ақыл-кеңес беретін ақылшы, бірге еңбек ететін дос.

Ұстаз – шәкірт алдында сыйлы адам. Ол жайлы айтылатын сыр да, жыр да көп. Ұстаз сенімін ақтау адамгершіліктің белгісі.

«Ұстаздық – ұлы құрмет, себебі ұрпақтарды ұстаздар тәрбиелейді. Болашақтың басшысын да, данасын да, ғалымын да, еңбекқор егіншісін де, кеншісін де ұстаз өсіреді. Өмірге ұрпақ берген аналарды қалай аррдақтасаң, сол ұрпақты тәрбиелейтін ұстаздарды да сондай ардақтауға міндеттіміз» - деп халқымыздың батыры Бауыржан Момышұлы айтқандай, ғылымның иесі ғалым да, ел қорғаған батыр да, тілінен бал тамған ақын да, тегеуріні темір балқытқан жұмысшы да, егін салған дихан да, мал бағып, терін төккен шопан да, ғарышкер де – бәрі-бәрі ұстаздан білім, тәлім алған. Мұғалімнен өнеге, білім алып, өмір теңізіне құлаш ұрған кез-келген шәкірт ұстазымен мақтанады.

Ұстаз – ұлағатты ұлы есім.

«Нағыз ұстаз өзінің білімділігімен, жүріс-тұрысымен, жайдары мінезімен, тіпті, сырт пішіні, киген киімімен де шәкіртіне жақсы мағынада қатты әсер етеді» - деген Мәлік Ғабдуллиннің сөзінен көп нәрсе аңғаруға болады. Қазіргі заман мұғалімнің мәртебесі өздігінен келетін нәрсе емес, ол – көп еңбектенуден туындайтын күрделі мәселе.

Егер мұғалім білімді де білікті болса, ол мәртебелі де болады. Оның мәртебелі болуына тек білім мен біліктілік қана емес, мінезі мен ел ішіндегі қадір-қасиет те себепші болмақ. Ұстаздың сыншысы – алдындағы балалар. Біздің алдымыздағы жас буын өсіп келе жатқан жас шыбық сияқты. Жас шыбықтың түзу өсуіне жауап беретін бағбаны – мұғалім.

Шәкірттерім – еңбегімнің жемісі,

Шәкірттермен айқындалар игі ісім.

Шәкірттерім озып келсе бәйгеден,

Ол да менің рухани жеңісім!