Физикадан КТК

Өтетін күні: 28.01.2017жыл

Мұғалім: Мухамет Жанаргул

Сыныптан тыс шара тақырыбы: Физикадан КТК

Сыныптан тыс шара мақсаты:

Білімділік: Оқушылардың физикадан алған білімдерін жинақтау, жүйелеу, қайталау, физикалық білім – біліктерін ортаға салу арқылы, басқа ғылымдармен байланысын ашу арқылы, физиканың тағы бір сыры – ойын түрінде сахнадағы физиканы ашу арқылы физикадан кім жүйрік екенін анықтау;

Дамытушылық: Оқушылардың пәнге деген қызығушылықтарын арттыра отырып, ойлау, есте сақтау, теория мен практиканы ұштастыра білу қабілеттерін физикалық дүниетанымдарын дамытып;

Тәрбиелік: Оқушыларды ұйымшылдыққа, топтық, жеке, жұптық жұмыстар жасауға, бәсекеге қабілетті, өз ойларын еркін жеткізе алатын, физиканы жетік меңгере алатын жан – жақты құзіретті өскелең ұрпақ тәрбиелеу.

Сыныптан тыс шара түрі: сайыс

Сыныптан тыс шара көрнекілігі: кітап көрмесі, оқулықтар, тәжірибе құрал-жабдықтары, плакаттар, слайдтар, бағалау парағы, марапаттау қағаздары, нақыл сөздер.

Сыныптан тыс шараның өту барысы:

І Ұйымдастыру бөлімі:

• Оқушылармен амандасу, сайысты ашу (сайысқа қатысатындар мен көрермендер)

• Ортаға топ мүшелерін шақыру

• Оқушыларды, қатысып отырған топ мүшелерін, мұғалімдерді шарт ережелерімен таныстыру

• Физикадан КТК-ның әділ қазы мүшелерімен таныстыру

Айдан хабар алғызған,

Зәулім сарай салғызған.

Теңіз суын каналмен,

Шөл далаға барғызған.

Бұл – қай ғылым, балалар? (Әрине физика)

Табиғат сырын аштырған,

Токпен қазан астырған.

Миллион гектар астықты,

Комбайнмен бастырған.

Бұл – қай ғылым, балалар? (Әрине физика)

Шындықты алғаш таратқан,

Жыл, күніңді санатқан.

Тауып ғажап жаңалық,

Жәйдан тезді жаратқан.

Бұл – қай ғылым, балалар? (Әрине физика)

Құтқарып ауыр бейнеттен,

Техниканы үйреткен.

Робот-темір адамды,

Тіл бітіріп, сөйлеткен.

Бұл – қай ғылым, балалар? (Әрине физика)

Білмегенді білгізген,

Білмегенді білгізер,

Барлық істі әлі атқарар,

ЭКСПО - ға да жаңалық енгізер,

Пайдасын елге әлі тигізер.

Бұл – қай ғылым, балалар? (Әрине физика)

Егеменді қазақтың біз ұланы,

Өз туы бар, Елтаңба, Әнұраны.

Уа, халайық! халайық!

Бәріне жар салайық.

Бүгінгі сайыс төрінде,

Физиканың елінде,

Физиканың тілінде,

Әзіл айтып жарысып,

Жұмбақ шешіп аңдысып,

Шабыттасып, шалқысып,

Физикамен ән салысып,

Көңілді сайыс жасайық!

Жаңалықтар ашайық!

Мұнда қызық табылар,

Басқа да ғылым тағы бар.

Ортаға топ мүшелерін шақырамыз:

1 – 11б сынып оқушылары «Болашақ»

2 – 10б сынып оқушылары «Ақтабан шұбырынды»

3 – 10а сынып оқушылары «Физ-мат сынып»

4 – 9 сынып оқушылары «Ауыл балалары»

5 – 8б сынып оқушылары «Ньютон немерелері»

6 – 8а сынып оқушылары «Физика жастары»

7 – 7 сынып оқушылары «Физик жастар»

Топтарға сахнаға шығу ретін белгілеу үшін спектрдің 7 түрлі түсін түрлі түсті қағаздарды қойып, топ басшыларына ұнайтын түсті таңдату. Содан

К – каждый (красный, қызыл)

О – охотник (оранжевый, қызғылт сары)

Ж – желает (желтый, сары)

З – знать (зеленый, жасыл)

Г – где (голубой, көгілдір)

С – сидит (синий, көк)

Ф – фазан (феолетовый, күлгін) ретімен сахнаға шығару

Топ мүшелерін сайыс ережелерімен таныстыру:

1 – Сахнада кішіге қамқор, үлкенге құрмет көрсету

2 – Сахна мәдениетін сақтау

3 – Тақырыптан ауытқымау

4 – Уақытқа жауап беретін адам сайлап алу

5 – Уақытқа сыйып жауап беру

Топ мүшелерін сайыс бағдарламасымен таныстыру:

1.Таныстыру (әр топ өздерінің топтарын физикамен байланыстырып таныстырады 2-3мин)

2.Үй тапсырмасы (әр топ үйден физикалық құрал жасап, оның жасалуын түсіндіреді 3мин)

3. 3 сұрақ дайындау (әр топ физикаға байланысты, термин, ұғым, заңдылықтарды пайдаланып 3 сұрақ жауабымен дайындайды, әр топ жауап берген соң өздерінің жауабын оқиды, ойлануға 30с)

4.Физика – әзіл әлемінде (әр топ «әзілің жарасса атаңмен ойна» қағидасымен физикалық заңдылық, термин, формулаларды пайдаланып әзіл өнер көрсетеді 3-4мин)

5. «5 жаңалық»+(Физикадан 5 жаңалық айта отырып, физиканы жырға қосып аяқтайды 3-4мин)

Әділ қазы мүшелерімен танысайық

1. Ж.Н.Мұқанов – физика пәнінің мұғалімі

2. А.С.Бекмуханбетова – ИФМ бірлестігінің бірлестік жетекшісі

3. Ж.С.Жалмуханбетова – ағылшын пәнінің мұғалімі

4. Г.Т.Дүйсенбаева – бастауыш сынып мұғалімі

5. Е.Е.Ибраемов - студент

ІІ Сайыс бөлімі:

Ғылым сырын ұғына,

Шығып әзіл шыңына.

Қаныңыздар сусындап,

Физиканың сырына.

Соныменен бүгінгі,

Сайысқа қатысушы топтарға,

Биіктерге самға!

Біз айтамыз сіздерге,

Тек қана алға!

• рахмет! (оқушылар хормен жауап береді)

1 – кезеңге жол берейік

1.Таныстыру (әр топ өздерінің топтарын физикамен байланыстырып таныстырады 2-3мин)

Әр топты хабарлап отыру

Топтардың бағаларын сұраймыз әділ қазы мүшелерінен

Әр топтың бағаларын оқып айтып шығу

Сырлары көп білімнің,

Шешілмеген әлі де.

Тереңдігі білімнің,

Керек екен бәріне – деп келесі кезекті сайысымыздың 2-кезеңіне береміз

2.Үй тапсырмасы (әр топ үйден физикалық құрал жасап, оның жасалуын түсіндіреді 3мин)

Әр топты хабарлап отыру

Топтардың бағаларын сұраймыз әділ қазы мүшелерінен

Әр топтың бағаларын оқып айтып шығу

Ойла – ойла тереңнен,

Жақсы емес көп бөгелген.

Физиканы білмесең,

Таяқ жейсің өмірден! – деп келесі сайысымызға жол берейік.

3. 3 сұрақ дайындау (әр топ физикаға байланысты, термин, ұғым, заңдылықтарды пайдаланып 3 сұрақ жауабымен дайындайды, әр топ жауап берген соң өздерінің жауабын оқиды, ойлануға 30с)

Әр топты хабарлап отыру

Топтардың бағаларын сұраймыз әділ қазы мүшелерінен

Әр топтың бағаларын оқып айтып шығу

Қалжыңдалық, қатты ойналық,

Күлгенді де, ілгенді де қоймалық.

Қай – қай кезде айту үшін жаралған,

Бірақ соны айту керек ойланып. – деп сайысымыздың келесі бөлімінде

4.Физика – әзіл әлемінде (әр топ «әзілің жарасса атаңмен ойна» қағидасымен физикалық заңдылық, термин, формулаларды пайдаланып әзіл өнер көрсетеді 3-4мин)

Әр топты хабарлап отыру

Топтардың бағаларын сұраймыз әділ қазы мүшелерінен

Әр топтың бағаларын оқып айтып шығу

Жас достарым,

Мұны жақсы ұғайық.

Физика – құрметтеуге лайық,

Дүниедегі құбылыстың мәніне,

Табиғаттың, қозғалыстың бәрін де,

Мүмкін емес физикасыз түсіну,

Физикаңыз – дүние кілті әлі де. – деп сайысымыздың соңғы 5 – бөлімін тамашалауға шақырамыз.

5. «5 жаңалық»+(Физикадан 5 жаңалық айта отырып, физиканы жырға қосып аяқтайды 3-4мин)

Әр топты хабарлап отыру

Топтардың бағаларын сұраймыз әділ қазы мүшелерінен

Әр топтың бағаларын оқып айтып шығу

ІІІ қорытындылау:

Әділ қазы мүшелерінің қорытындысын тыңдап, топ мүшелерін марапаттап, оқушыларға, мұғалімдерге, студенттерге рахмет айту.

Марапаттау грамоталары:

Әділ қазы шешімімен Бас жүлде, І орын, ІІ орын, ІІІ орын тағайындап және төмендегідей номинацияларына Мадақтама грамота беру:

«Жаңалыққа жаны құмар» номинациясы

«Физика шешендері» номинациясы

«Көрермендер көзайымы» номинациясы

«Үздік ойыншы» номинациясы

Сау болыңыздар!