Функциялар мен процедуралар.

Программаның орындалуы барысында бiр ғана есептеу жұмысын әртүрлi мәндер үшiн бiрнеше рет орындауға тура келедi. Осы бiр есептеу жұмысын программада бiрнеше рет қайталап жазбай, қажеттi кезiнде қолдану үшiн программаның жеке бөлігі ретінде жазып қоюға болады. Қандайда бiр алгоритм бойынша жұмыс жасайтын және өзiне негiзгi программаның кез келген бөлiгiнен қатысуға болатын программаның жекелеген бөлiгiн iшкi программа деп атаймыз. Ішкі программа – бұл арнайы операцияларды орындау үшін қызмет ететін процедуралар мен функциялар. Барлық программалау тілдеріндегідей Python-да да процедура мен функция бар. Олар стандартты және пайдаланушы өзі анықтайтын стандартты емес топтарға бөлінеді. Стандартты функциялар мен процедуралар тілдің элементі ретінде өз аттары бойынша алдын ала нақтыланған қызметші сөздермен белгіленеді. Ал стандартты емес функция мен процедураларды әрбір программалаушы өзі жаңа атау беру арқылы анықтайды. Процедуралар мен функциялардың екеуімен де бірдей нәтижеге жетуге болады. Алайда олардың өзара айырмашылықтары бар. Процедура қажетті операцияларды орындап болған соң, тізімдегі параметрлерге нәтижені қайта жазады. Функция да осы айтылғандарды орындап, оған қосымша нәтижені өзіне меншіктелген мәнге қайтарады. Осылайша, функция – неғұрлым әмбебап нысан болып саналады. Процедура – белгілі бір әрекеттерді орындау мақсатында алдын ала бекітілген атау бойынша шақырып орындалатын программаның тәуелсіз бөлігі. Процедура параметрлі және параметрсіз болып бөлінеді.