Ғажайып математика

Күні: 11.01.2019 жыл

Білім беру саласы: Таным

Бөлімі: ҚМҰҚ

Тақырыбы: Ғажайып математика

Мақсаты: 1 ден 5 ке дейін тура және кері санау, геометриялық пішіндерді ажыратып, түр – түсін айту, миға шабуыл, яғни логикалық тапсырмаларды орындау арқылы балалардың ой – өрісін, ойлау қабілетін дамыту, ұйымшылдыққа, достыққа тәрбиелеу және қызығушылығы мен тапқырлығын арттыру.

Өтпелі тақырып: Табиғат әлемі.

Көрнекіліктер: Үйшіктер, сандар, санға байланысты суреттер, құстар ілінген бұтақ.

Билингвальды компонент: Пішін – фигура, түс – цвет.

Әдіс – тәсілдер: Сөйлеу, ойлау, әңгімелеу, дидактикалық ойындар, сұрақ – жауап, өлең оқу.

Шаттық шеңбер:

Біз әдепті баламыз,

Айтқан тілді аламыз.

Тәрбиенің басы ғой,

Сәлем дейміз баршаңа.

Ойын: «Түсін тап»

Шарты: Шеңберде тұрған балаларға қызыл, сары, көк түстер тарқатып беріледі. Музыка тоқтаған сәтте қолдарындағы түстерге қарап, өз шеңберлерін табады.

Тәрбиеші: Балалар, бүгінгі оқу қызметінде сандарды тура және кері санаймыз. Беске дейін санаймыз. Санамақ айтамыз.

Аружан:1 дегенім білім,

Білім жарық күнім.

Алуа: 2 дегенім еңбек,

Еңбек бәрін жеңбек.

Абдурахман: 3 дегенім үміт,

Үміт артар жігіт.

Темірлан: 4 дегенім төзім,

Төзе білем өзім.

Нұрсұлтан: 5 дегенім бесік,

Шықтық содан өсіп.

Ойын: «Суретпен сәйкестендір»

Шарты: Суретте бейнеленген заттардың санын, тақтада ілініп тұрған сандармен сәйкестендіріп іледі.

Тәрбиеші: Ал балалар, дайын пішіндерден сандарға үйшік жасайық. «Үлкен», «орташа», «кіші» үйшіктер. Пішіндеріміздің тақпақтарын айтайық.

Алинұр: Шуақ шашқан күнге ұқсаймын көбірек,

Менің атым дөңгелек.

Ақнұр: Барлық шатыр ұқсайды тек өзіме,

Бірден білер құлақ асқан сөзіме

Менің атым үшбұрыш.

Бағым: Теледидар таныс екен баршаға.

Ал пішінім ұқсайды ғой партаға

Менің атым төртбұрыш.

Сергіту сәті:

Аққу болып ұшамыз,

Көлге келіп қонамыз.

Көлдің бетін құшамыз,

Қайта самғап ұшамыз.

Тәрбиеші: Балалар, біз логика сабағын өтеміз бе?

Балалар: Иә.

Тәрбиеші: Мен қазір дүкеннен доп аламын. Біреуі үшбұрыш, біреуі төртбұрыш, біреуі жұлдызша.

Балалар: Доп үшбұрыш, төртбұрыш, жұлдызша болмайды. Доп домалақ болады.

Тәрбиеші: Балалар, қараңғыда аспанда қанша жұлдыз шығады?

Балалар: Көп жұлдыз.

Тәрбиеші: Ал түсте қанша жұлдыз шығады?

Балалар: Шықпайды.

Тәрбиеші: Балалар, бір қоянда қанша құлақ бар?

Балалар: Екі құлақ.

Тәрбиеші: Ал екі аюда қанша бас бар?

Балалар: Екі бас.

Тәрбиеші: Балалар, мына ағашта неше торғай бар?

Балалар: Бес торғай.

Тәрбиеші: Балалар, біз ертегіні түсінеміз бе?

Балалар: Иә.

Тәрбиеші: Ал өлеңді ше?

Балалар: Иә.

Тәрбиеші: Мына бір шумақ өлеңмен жақсы сурет бейнелеуге болады екен.

Алинұр: Жоғарыда ақша бұлт күлімдеген,

Арсен: Арасында күн нұрын жасырады.

Абдурахман: Ал төменде айдын көл мөлдіреген,

Ақнұр: Жағасында қос аққу орын табады.

Балалар сандарды 10 ға дейін 3 тілде санайды.

Тәрбиеші: Балалар, бүгінгі оқу қызметіміз ұнады ма, біз смайликті білеміз бе?

Балалар: Иә.

Тәрбиеші: Қалай көрсетеміз?

Балалар: Во!

Марапаттау.