Б.Шалғынбаев атындағы №217 ІТ мектеп-лицей

Эссе тақырыбы: «Жан дүниемді түсінетін адам»

Автор: Мадиханқызы Аяжан

Сыныбы: 8

Байланыс телефоны: 8 705 510 14 40

Жетекшісі: Құлмырзаева А.Қ

Қызылорда 2025 ж

Жан дүниемді түсінетін адам

Психолог – адам жанының елшісі. Ол сөз арқылы жаралы көңілді жұбатады, ой арқылы өмірге деген көзқарасты өзгертеді. Бір жылы сөз адамның тағдырын да өзгерте алуы мүмкін. Менің де тағдырыма себепші болды десем артық емес сияқты. Сөз басын болашаққа саяхаттан бастасам. Елестетіңізші, 2035 жыл. Мен – мектеп оқушысы емес, психологпын. Психолог… Қарсы алдымда кішкентай ғана бала отыр. Бойы бала болғанымен, жан дүниесінде ересек адамның мұңы бар секілді. Өмір оны ерте есейтіп жібергендей. Ол ішіндегі ауыр сезімдерін ақтарыла бастағанда, оның жан жарасын сезіндім. Сол сәтте менің қасымда отырған маман емес, оған керек адам екенімді жүрегім терең ұқты. Үнсіз тыңдап, жылы қабақ танытқаным – оған сенімнің алғашқы сәулесін сыйлады. Уақыт өте келе ол ашыла бастады. Менің әр сөзім, әр әрекетім оның үмітін оятты. Бір баланың жүрегіне жарық ұялатып, сенім сыйлай алсам – психолог ретіндегі ең үлкен жетістігім осы. Себебі шын жүрегіңмен біреуге көмек беру – адамға бұйырған ең үлкен бақыттардың бірі. Сол сәтте мен түсіндім: мен тек маман емеспін, мен – оның үмітіне демеу, жанына тыныштық сыйлайтын жанмын. Болашақтағы Аяжан өзіне сенімді, әр сөзі нық, нақты әрекет ете алады. Себебі жақында өзімді көптен бері мазалап жүрген жеке мәселем туралы мектеп психологы Ақбота Қожахметқызының қабылдауында болдым. Бұл қадамды жасау оңай болмады, бірақ өз ойым мен сезімімді бөлісудің жеңілдік әкелетінін түсіндім. Психологтың сабырлы тыңдауы, жылы қарсы алуы мені бірден тыныштандырып, ашық сөйлесуге мүмкіндік берді. Кездесу барысында ішкі күйзелістерімді, түсіне алмай жүрген сезімдерімді бүкпесіз жеткіздім. Ол мені тыңдай отырып, еш сын айтпады, еш болжам жасамады. Бұл маған үлкен сенімділік берді. Психологтың қойған сұрақтары, берген бағыт-бағдары мәселенің түпкі себебін түсінуге көмектесті. Өзім байқамаған жайттарды сыпайы түрде көрсете отырып, ойымды жаңа қырынан қарауға мүмкіндік берді. Қабылдаудан алған ең маңызды көмектердің бірі – өз сезімімді түсіну және оны басқаруды үйрену болды. Ол маған тыныс алу жаттығуларын, эмоцияларды қауіпсіз жеткізу тәсілдерін, күйзеліс кезінде қолдануға болатын қарапайым да тиімді әдістерді үйретті. Сонымен қатар күнделікті өмірде өзіме уақыт бөлу, ойды реттеу, позитивті ойлау дағдыларының маңызын түсіндірді. Кездесуден кейін өзімді жеңіл, жинақы, сенімді сезіндім. Менің түсінгенім: қиындықтардан қашпай, оларды дер кезінде түсіну және көмек сұрай білу – әлсіздік емес, даналықтың белгісі. Бұл тәжірибе өміріме оң әсер етіп, ішкі тепе-теңдігімді қайта табуыма жол ашты. Мектеп қабырғасында жүргенде бізді жақсы көріп, сырларымызды тыңдайтын адам – психолог апайымыз болды. Ол ешқашан асықпайды, әр сөзімізге мұқият назар аударады. Ішіме сыймай жүрген сырларымды бөліскенде, оның сенімді серік болатынын білемін. Себебі ол тыңдайды, бағаламайды, ешкімге айтпайды. Адамның денсаулығы тек тәннің саулығымен өлшенбейді. Жан тыныштығы, ой тазалығы – бақыттың бастау бұлағы. Қиын сәтте сабыр сыйлайтын, сенім ұялататын – психологтар. Әр адамның жүрегінде айтылмай қалған сөз, жасырынып жатқан уайым болады. Сол сезімдерді реттеп, жанға жеңілдік сыйлайтын да – психолог. Психологтың кабинеті – қауіпсіз кеңістік. Бұл жерде сені ешкім сынамайды, сөкпейді. Ашық сөйлеп, ішкі әлеміңді еркін жеткізе аласың. Психолог дайын жауап ұсынбайды, бірақ ең дұрыс жауапты өз жүрегіңнен табуыңа жол ашады. Осы қасиетімен ол адамның ішкі әлемін реттейтін нәзік қолдар секілді. Сондықтан психолог кабинеті – жай бөлме емес, жүрек тыныштығы табылатын орын. Кейде адамдар «Психологқа бару – әлсіздік» дейді. Бірақ шын мәнінде, өзіңді тануға ұмтылу – үлкен күштің белгісі. Әр кездесу адамның ішкі шамын сәл болса да жарқыратып, өміріне жаңа тыныс сыйлайды. Сондықтан қоғамға аса қажет мамандық – психолог.

Енді мен бұл мамандыққа бұрынғыдан да сенімді, нық қадам басамын.