Бекітемін:

«Успех GOLD-8» ЖШС

«Асыл бесік» балабақшасының

меңгерушісі

_________ А. Мамырбаева

«___»_________2023 жыл

«Құлыншақ» ересек тобы

«Құтты болсын, Жаңа Жыл!»

Тәрбиешілер: Тилейхан Катила

Даңғыл Зирагүл

Өскемен қаласы

2023-2024 оқу жылы

Құтты болсын, Жаңа Жыл!

Мақсаты: Балаларға қыс мезгілі, айлары, белгілері және жаңа жыл туралы түсінік беру. Қысқы мереке Жаңа 2024 жыл Ұлу жылы келе жатқандығын айтып түсіндіру.

Тақпақты, әнді мәнерлеп айтуға үйрету және сөздік қорларын дамыту. Ойынның мағынасын түсініп ойнай алуға және билей алуға үйрету. Сөйлеу, қиялдау, ойлау, қабылдау қабілеттерін дамыту.

Ұқыптылыққа, тазалыққа, жауапкершілікке, көпшілік ортада өздерін тәртіпті, инабатты ұстауға тәрбиелеу. Достыққа, адамгершілікке тәрбиелеу.

Өту орны, күні, уақыты: Музыка залы. 25.12.2023ж. 10:10.

Кейіпкерлер: Жүргізуші, Аяз Ата, Ақшақар, Қоян, Мұз, Боран, Ұлу және Балалар : Аққалалар, Сағаттар, Ұлпақарлар.

Қажетті құралдар: Күрек, шелек, қар түйіршіктері, сағаттар, ұлпақарлар, сыбыртқы, Сағат қорапқа салынған сыйлықтар.

Музыка залы мерекеге сай безендірілген. Музыка әуенімен балалар залға кіреді де дөңгеленіп отырады.

Жүргізуші: Сәлеметсіздер ме, құрметті қонақтар, әріптестер және балалар.

Жаңа жылды біз тойлап,

Шаттанамыз бәріміз.

Өлеңде әзір, әнде әзір,

Кел Жаңа Жыл біздерге.

Кел Жаңа Жыл, Жаңа Жыл деп, Жаңа Жыл мерекесін бастауға рұқсат етіңіздер.

Балалар, қараңдаршы жан жағымыз қандай тамаша болып кеткен?!

• Балалар, бізді қазір қай мезгіл?

• Қыс мезгілі.

• Қыстың неше айы бар?

• Үш айы бар.

• Қыс айлары қалай аталады?

• Желтоқсан, қаңтар, ақпан.

• Қыста қандай мерекелер болады, балалар?

• Тәуелсіздік мерекесі және Жаңа жыл мерекесі.

Дұрыс айтасыңдар балалар. Жаңа жылда жақындап қалған тәрізді. Аяз Ата келу үшін балалар өнерімізді көрсетейікші. Дауысымызды естіп келіп те қалар. Балалар жаңа жыл туралы тақпақтарымызды айтайық.

Тақпақтар

Аяла

Аппақ, аппақ жапалақтап,

Қар жауады тынбастан.

Қалың орман қар жамылған

Маужырайды түнгі аспан

Б. Темірлан

Жаңа жылда балалар,

Тек қуаныш көріңдер,

Ауырмаңдар ешқашан,

Мықты болып өсіңдер!

М.Дария

Ақ қар жапты даланы,

Ақ жамылды айнала

Жарқыратып шамдарын,

Шырша келді ортаға

Б.Ясмин

Жаңа жыл, Жаңа жыл

Жаңа жылға жаңа жыр

Жасыл шырша жанында

Билеп барлық бала жүр

Р. Галима

Тауда туып, тауда өсіп

Шырша келді ортаға

Қандай жақсы шыршамыз

Ән шырқайық баршамыз

Қ.Адина

Жасыл желек жамылған

Асыл моншақ тағылған

Міне сұлу шыршамыз

Көптен күтіп сағынған.

Б.Сұлтан

Тамаша. Тамаша!

Шыршамыз тұр жараса

Басында әсем жұлдызы

Көз тоймайды қараса.

С. Амир

Әдемілеп біз ілген

Ойыншықтар тізілген.

Қандай әсем шыршамыз,

Ән шырқайық баршамыз!

Жүргізуші: Жарайсыңдар, балалар! (Балалар орындарына барып отырады.)

Балалар қараңдаршы, қандай әдемі шырша. Бұл шыршаны Аяз ата орманнан жіберіпті, әдемі ойыншықтар тізілген. Осы ойыншықтар тізілген шыршаға арнап әдемі әнімізді орындайық. Бәлкім, Аяз атамыз да келер, шыршамыздың шамын жағып берер. Әнімізді қаттырақ айтайықшы.

Ән: «Шырша жыры»

(балалар орындарынан тұрып орындайды)

Жүргізуші: Балалар, қардың сықырлаған дауысы естіледі, бізге Аяз Ата қонаққа келе жатқан сияқты. Құлақ түрелік, кім екен?

Әуен ырғағымен Ақшақар мен Қоян келеді.

Ақшақар:

Жаңа жылды қарсы алуға 

Кімдер мені шақырған?

Армысыңдар, достарым,

Сендерге мен қуанам!

Үлкенің де, кішің де

Ерінбей еңбек еттіңдер.

Шыршамызды әсемдеп, 

Құлпыртып, көркейттіңдер. 

Біз ертегі елінен келдік,

Ән айтайық, би билейік.

Шеңбер құрып тұрайық,

Жаңа жылды қарсы алайық!

Жүргізуші: Біз шақырдық. Бірақ Аяз Ата келе ме деп едік?

Ақшақар: Иә, Аяз Ата келеді әрине. Балалар күтіп қалмасын деп қоян екеумізді жіберді. Ол балаларға сыйлық алуға кетті. Жолда келе жатқан болар. Оған дейін балалар қоян екеумізге өнерлерін көрсетсінші. Балалар тақпақ біледі ме?

Жүргізуші: Әрине, біздің балалар тақпақ айтып береміз дейді.

Тақпақтар

Ерасыл

Оралдың өлкеме,

Жаңа жыл, армысың.

Оранды ақ көрпеге

Асқартау қарлы шың

Ермек

Әкелсін жыл ырыс-құт,

Әлемде болсын тыныштық

Ән салайық жаңаша

Жаңа жылым тамаша!

Жансұлу

Жаңа жылды қарсы алып,

Жасаймыз той жылда біз.

Жарқын, жарқын ән

салып,

Жалғасады жырға жыр.

Нұржігіт

Жаңа жылмен, Жаңа жылмен

Құттықтаймыз әрине.

Әкемізді, анамызды

Қонақтардың бәрінде!

Батырхан

Жаңа жылым мол болсын

Басқан қадам оң болсын

Төрле, төрле Жаңа жыл

Бізге құтты жыл болсын

М. Сафия

Тілеймін мен бар әлемге,

Дос көп болсын Жаңа жыл.

Ата-әже, ата-әже,

Құтты болсын Жаңа жыл.

Перизат

Сақалы аппақ күмістей

Тістері аппақ күріштей,

Қызыл ала шапаны

Сағындым аяз атаны!

Қоян: Балалар сендер, Ақшақарға тақпақ айтып өнерлеріңді көрсеттіңдер. Маған да арнап өз өнерлеріңді көрсетсеңдер жақсы болар еді. (бұртиып)

Кәне, мен сендерге жұмбақ жасырайын, тауып көріңдерші.

Қыста ғана болады,

Ұстасаң қолың тоңады. (қар)

Гуілдеген дауысы, дүрілдеген дыбысы бар,

Қыс болса қыр мен ойды аралайды,

Жаз болса қозғалуға жарамайды. (боран)

Суға батпайды, отқа жанбайды. (мұз)

Жүргізуші: Қоян біздің қыздар саған арнап Ұлпақарлар биін билеп бермекші.

Қоян: Жақсы, ендеше тамашалайық.

Би: «Ұлпақарлар»

(Ұлпақарлар биінен кейін Мұз музыка ырғағымен кіріп келеді)

Мұз: Мына Ұлпақарлардың жауғаны қандай жақсы болды?! Бұл ұлпақарлардан қар түйіршігін жасап, Аяз атаның жолын жабайын. Сыйлығын балаларға бермей өзім алып алайын.

Қоян: Мұз сенің бұның жарамайды. Балалар сондай өнерлі екен. Одан да өнерлерін тамашалап, балалардан жақсылықты үйренгенің дұрыс болар.

Мұз: Ол қандай жақсылық? Мен жақсылық дегенді білмейді екенмін.

Қоян: Ендеше балалардан үйренгенің дұрыс болар. Қар түйіршіктері адамдарға жүруге кедергі жасайды ғой. Балалар ауланы қардан тазартайықшы. (Күректерімен шелектерге жинайды)

Ойын: «Ауланы қардан тазарту»

Мақсаты: Балаларды ептілікке, тазалыққа, шымырлыққа, шапшаңдыққа баулу. Қысқы қарлар және қар түйіршіктері туралы түсініктерін кеңейту.

Қажетті құралдар: Шелек, күрек және қар түйіршіктері.

Шарты: Ауланың іші толған қар түйіршіктері. Екі бала қолдарында күрегі мен шелегі бар ортаға шығып ауланы қардан тазартуға болысады.

Мұз: Осы ма сендердің өнерлерің? Достым Боран қайдасың? Тез көмекке кел. Әйтпегенде Аяз атаның сыйлығын мына балалар алып қоятын болды.

(Осы кезде боран гуілдеп, қолында таяғы бар кіріп келеді)

Боран: Ооо, достым мұз қалың қалай? Мені шақырдың ба?

Мұз: Иә, шақырдым. Мен жаңа жауған қарларды мұзға айналдырған едім. Мына балалар, бәрін жинап Аяз Атаның жолын ашып қойды, сыйлықты өздері алып алмақшы.

Боран: Саспа мен қазір борап Аяз атаның жолын жауып тастаймын. (Музыкамен 1-2 айналып боран болып соғады)

Мұз: (қуанып) Ой, қандай жақсы болды!

Ақшақар: Ауламыз әлі де қардан тазармай тұр. Аяз Ата мен Жаңа жыл да келетін уақыт жақындады. Аяз Ата мен Жаңа жылдың жолын қардан қалай тазартсақ екен?!.

Жүргізуші: Уайымдама Ақшақар, ауланы қардан қазір біздің Аққалалар әп сәтте жинап, тазартады.

Би. «Аққалалар»

Қоян: Сендердің бұларың жарамады. Мен биылғы жылды, Ұлуға тапсырып, басқа да жұмыстарымды бітіремін бе деп едім. Байқамадыңдар ма, біздің балаларымыз қалай жақсы өнер көсеткенін?! Одан да бізбен дос болғандарың дұрыс болар еді!

Боран: Расында да, балалар өнерлі екен. Мен сендермен дос боламын.

Ақшақар: Иә, әп сәтте Аяз Ата мен Жаңа жылдың жолын қардан тазартып жинап тастады. Балалар, Аяз ата мен Жаңа жыл жақындап қалған сияқты. Ендеше кәне, барлығымыз дауыстап Аяз Ата мен Жаңа жылды шақырайық! «Аяз Ата, Ауу!, Аяз Ата А,уууу! (залға Аяз ата мен Жаңа жыл кіреді.)

Аяз ата:  Амансың ба, ұлдарым, 
Амансың ба, қыздарым?! 
Қандай жарқын жүздерің, 
Қандай әсем билерің. 
Аталарың сендерге, 
Асау желмен алысып, 
Шаршап келді алыстан. 
Балаларым балғыным 
Өмір гүлім шалғыным 
Тілейтінім жыл бойы 
Сендердің денсаулығын!

Жүргізуші: Ооо, Аяз Ата, Жаңа жыл қош келдіңіздер! Төрлетіңіздер! Жоңғары шығып, демалыңыздар. Балаларымыздың өнерін тамашалаңыз. Шаршаған боларсыз?

Ұлу жылы:Сәлеметсіңдер ме, балалар және қонақтар. Иә, Аяз Ата екеуміз көптеген балаларға барып өнерін тамашалап, сыйлықтарын тараттық.

Мұз: О, сыйлық. Мен қазір сыйлықты алып алу үшін не істесем екен? О, таптым. Балаларды мұз қылып қатырайын.

Аяз Ата: Мұз оның жарамайды, аптығыңды бас. Мында да шетінен өнерлі балалар жиналғанға ұқсайды. Одан да бәріміз бірге балалардың өнерін тамашалайық.

Жүргізуші: Әрине, балаларымыздың сізге дайындаған әндері, тақпақтары, билері бар. Солай ғой иә, балалар?!

Балалар: Иә

Жүргізуші: Ендеше балалар, Аяз Атаға тақпағымызды айтып берейікші.

Тақпақтар

М. Айсұлтан

Қараңдар мынау шыршаға,

Неткен әсем көрікті.

Жаңа жылдық думанға,

Аяз ата келіпті.

М.Малика

Тамаша сый алып,

Келді Аяз атамыз

Шаттанып, қуанып

Шырқап ән айтамыз.

Т. Алихан

Келіңдер, келіңдер,

Тақпақ айтып беріңдер.

Жомарт Аяз атадан,

Сыйлық алып көріңдер!

Т. Айя

Ақ қырауға малынған

Сақалы да, мұрты да,

Аяз ата сағынған

Сәлем берді жұртына

Д.Дінмухаммед

Аппақ тоңға оранып

Базарлықты мол алып,

Келді алыс сапардан

Аяз ата оралып.

А.Асылым
Ақ таяғын таянып,

Таңмен бірге оянып.

Аяз ата келіп тұр,

Ақ көрпеге оранып.

М. Дамир

Ал, балалар билейік,

Ойнайық та, күлейік.

Аяз ата қуансын,

Тақпақ айтып берейік!

В. Жасмин

Келді міне Жаңа жыл,

Қарсы алайық бәріміз.

Күліп ойнап, би билеп,

Ән салайық бәріміз.

Жүргізуші: Ендеше балалардың орындауында ән

Ән: «Аяз ата»

Аяз Ата: Балалар менің сендерге дайындаған ойыным бар. Одан да мұз сен бізге қысқы мүсіндерді жасауға болысқаның дұрыс. Сен қардан мүсін жасауда өнерлісің, бізге осы тұста нағыз керексің. Бізбен ойнағың келеді ме?

Мұз: Иә

Ойын: «Қысқы мүсіндер»

Мақсаты: Балаларды, қысқы ойындар түрлерімен таныстырып, оны дұрыс меңгеруге үйрету. Мұз туралы түсіндіру, ойын арқылы көңілдерін көтеру, балаларды шапшаңдыққа, бірлесе әрекет етуге баулу.

Шарты: Балалар шеңберге тұрады. Аяз атаның Мұз болып қатыңдар деген нұсқауымен алақандарын, маңдайын, тізесін және арқаларын түйістіріп тұра қалады. Музыка қосылғанда билейді.

(балалар орындарына отырады)

Аяз Ата: Балалар, мұз сендер жақсы ойнайды екенсіңдер. Мұз, боран сендер бізбен дос болатын шығарсыңдар.

Боран мен Мұз: Балалар сендерге рахмет. Өнерлі, жақсы балалар екенсіңдер. Енді сендермен дос боламыз. Қоян мен бірге біз үйімізге қайтайық. Сау болыңдар балалар! Рахмет сендерге балалар!

(Қоян, Боран мен Мұз үшеуі балалармен қоштасып шығып кетеді)

Аяз Ата: Жарайсыңдар. Жаңа жылдың тілегін тыңдап, мына шыршаның шамын жағайық. Сағат тілі де Жаңа жылға жақындап қалды.

Ұлу жылы: Иә, Аяз ата, балалар және қонақтар. Биылғы Жаңа 2024 жыл Ұлу жылы мен боламын. Биылғы жылмен барлығымызды құттықтаймын. Аспанда күн күліп, Жерде шаттық болсын, әрқашан береке бірлік пен достық болсын. Менің дос қыздарым «Сағаттар» биін билемекші.

Би. «Сағаттар»

(Биден кейін сағаттың соғылған музыкасы қосылады. Осы кезде сағат тілі 12-ні көрсетіп, сағаттың ішінен Аяз Ата мен Ұлудың әкелген сыйлықтары көрінеді. Аяз Ата сағаттың жанына жақындап)

Аяз ата: Міне, міне жаңа жылда келді. Шыршаның шамдары да жанды. Сағатымыз да өздігінген ашылды. ( Сағаттың ішінен бір сыйлықты алып, тәрбиешіге береді.)

Жүргізуші: Аяз ата, Ақшақар балалар сіздерге рахмет айтып барлығы бірге би билеп бермекші.

Би. Карновал биі»

Аяз ата: Ал, балалар, біз Ақшақар екеуіміз тамаша демалдық. Жарайсыңдар, балаларым! Мені бүгін бір қуантып, алыс жерден шаршап келгенде көңілімді көтердіңдер. Барлықтарың да ақылды, білімді де өнерлі екенсіңдер.

Киген киімдерін қандай әдемі! Солай емес пе қызым? Біздің сыйлығымызға риза болыңдар. Ал енді біз жолға шығайық. Басқа да балалардың өнерін тамашалайық. Ал,балаларым, сендер өсе беріңдер, өркеңдей беріңдер. Аспандарың ашық болсын! Қош болыңдар!

Балалар: Сау болыңыздар!

(Музыка әуенімен қолдарын былғап Аяз ата мен Ақшақар, Ұлу залдан шығып кетеді)

Жүргізуші:

Жаңа жылым төрле, бізге нұр болып,

Жақсылықтың жаршысы боп, бақ болып.

Құрметті, қонақтар! Сіздерді, келе жатқан Жаңа Жылдарыңызбен құттықтаймыз, келесі жылға дейін аман сау болайық. Сау болыңыздар!

Келісілді:

«Асыл бесік»

балабақшасының әдіскері

Еркешева Ж.К. _________

«Құтты болсын, Жаңа Жыл!» атты ертеңгілік

«Құлыншақ» ересек тобы 4-5 жас

2023-2024 оқу жылы