Жақсылық Қарақат. Ұлттық тарихпен жүздесу

Әл-Фараби атындағы Қазақ Ұлттық Университеті

Мәдениеттану 3 курс студенті Жақсылыққызы Қарақат

Қазақстанның Орталық мемлекеттік мұражайындағы әсерлі тәжірибе: Ұлттық тарихпен жүздесу

Әр адам өзінің тамырын, ұлттың бастауын, елінің өткені мен бүгінін білуге тиіс. Бұл — болашаққа сенімді қадам басудың алғышарты. Менің Қазақстан Республикасының Орталық мемлекеттік мұражайына жасаған сапарым дәл осы ұстанымның шынайы көрінісіне айналды. Бұл саяхат тек көрме көру емес, тарихпен тілдесу, бабалармен үнсіз сырласу болды.

Мұражай – уақытпен жарысқан тарих қоймасы. Оның әр бұрышында ғасырлар үнсіз сыр шертеді. Экспозиция залдарына кіргеннен-ақ, өзімді мүлде басқа әлемге түскендей сезіндім. Мұнда көне дәуірдегі тас құралдардан бастап, сақ пен ғұндардың жауынгерлік киімдері, орта ғасырлардағы архитектуралық үлгілер, сондай-ақ тәуелсіздік жылдарындағы маңызды оқиғалар қамтылған. Әсіресе, «Алтын адамды» көру – сөзбен жеткізу мүмкін емес әсер қалдырды. Ол – біздің ұлтымыздың бай рухани, мәдени мұрасын дәлелдейтін символ.

Мұражайдағы тағы бір ерекшелік – заманауи технологиялардың кеңінен қолданылуы. Интерактивті карталар, аудиогидтер мен 3D-модельдер арқылы көрермендерге ақпараттар қызықты әрі түсінікті түрде беріледі. Бұл — жастарды тарихқа тартудың жаңа әрі тиімді жолы деп санаймын.

Мен үшін бұл сапар өзімнің қазақ екенімді, осындай бай тарихтың мұрагері екенімді терең сезінуге мүмкіндік берді. Ата-бабаларымыздың батырлығы, даналығы, шежірелі жолы – бәрі де бүгінгі ұрпаққа аманат. Бұл аманатқа лайық болу – бізге артылған зор жауапкершілік.

Қорытындылай келе, Орталық мемлекеттік мұражай – ел тарихының қазынасы ғана емес, болашаққа бағдар беретін шамшырақ. Ондағы әрбір жәдігер — бір тарихи кітап, ал соларды көзбен көріп, жүрекпен түйсіну — шынайы білім мен тәрбиенің көзі. Бұл сапар менің дүниетанымымды кеңейтіп, тарихи сана-сезімімді қалыптастырды. Мұндай тәжірибені әр жас қазақстандық бастан өткеруі керек деп ойлаймын.