«Жасыл мектеп» жобасы аясындағы экологиялық тәрбие жұмыстары

«Жасыл мектеп» жобасы аясындағы экологиялық тәрбие жұмыстары

Табиғатты аялау – болашаққа жауапкершілік.

Қазіргі таңда әлем алдында тұрған өзекті мәселелердің бірі – экологиялық тепе-теңдіктің бұзылуы. Адамзаттың тұрмысы мен өндірісінен туындаған экологиялық дағдарыстың салдарын жұмсарту үшін табиғатпен үйлесімді өмір сүру мәдениетін қалыптастыру аса маңызды. Осы орайда елімізде қолға алынған «Жасыл мектеп» жобасы — жас ұрпақтың бойына экологиялық тәрбие мен жауапкершілікті сіңіруге бағытталған нақты әрі нәтижелі бастама.

Табиғатты қорғайтын ұрпақ — ел болашағы.

Біздің мектебімізде «Жасыл мектеп» жобасы аясында жыл сайын көптеген іс-шаралар ұйымдастырылып келеді. Оқушылар тек білім алып қана қоймай, өз қолымен табиғатты көркейтуге, тазалықты сақтауға белсенді түрде атсалысуда.

Ағаш отырғызу – келешекке көгалды аманат

Көктемгі және күзгі сенбіліктер аясында оқушылар мен ұстаздар бірігіп мектеп ауласына ағаш көшеттерін отырғызу жұмыстарын ұйымдастырды. Әр сынып өзіне бекітілген ағашты күтіп-баптап, суарып, жыл сайынғы өсуін қадағалап отырады.

Гүлзарларды күтіп-баптау — сұлулыққа деген сүйіспеншілік.

Оқушылар жаз мезгілінде гүлзарларды ретке келтіріп, гүл егу, арамшөптерден тазарту жұмыстарын жүргізді. Бұл тек еңбек дағдысын қалыптастырып қана қоймай, табиғаттағы сұлулықты сезінуге баулиды.

Арық тазалау мен су жүйесін қалпына келтіру.

Мектеп ауласындағы көгалдандыру жұмыстарының нәтижелі болуы үшін арық жүйесі тазартылып, су ағатын бағыттар қалпына келтірілді. Бұл жұмысқа оқушылар мен ерікті ата-аналар атсалысып, табиғатпен бірлесе еңбек етудің маңызын ұғынды.

Сенбілік – тазалық пен тәртіп кепілі.

Күзгі және көктемгі мезгілдерде мектеп ұжымы мен оқушылар сенбіліктерге белсене қатысып, мектеп ауласын, көше бойын және қоршаған ортаны қоқыстан тазартып, қалдықтарды сұрыптап жинауға дағдылануда.

Экологиялық тәрбие — болашақтың кепілі. «Жасыл мектеп» жобасы оқушылардың бойына табиғатқа деген сүйіспеншілікті, жауапкершілікті, еңбекқорлықты қалыптастыруда үлкен рөл атқаруда. Аталған жұмыстар — жас ұрпақтың табиғатты қорғауға деген нақты іс-әрекеті.

Осындай іс-шаралар арқылы біз жасыл болашаққа сенімді қадам басып келеміз.

Жетісу облысы Көксу ауданы

МЖШО бар Қызыларық орта мектебінің

география пәнінің мұғалімі Ш.Б.Ербаева