«Жемқорлықсыз бақытты балалық шақ»

8 – сынып білім алушысы

Өмірзақов Нұрдәулет Рұсланұлы

Ақтөбе қаласы

Әл-Фараби атындағы №21 мамандандырылған гимназия

Камбарова Салтанат Аманжоловна

Аға әлімгер

Балалық шақ – адам өміріндегі ең мөлдір, ең қымбат кезең. Бұл шақта жүрекке үміт ұялап, арман қанат қағады, ал әлем бізге әділетті әрі мейірімді болып көрінеді. Алайда сол балалықтың шынайы бақытқа толы болуы тек ойын мен күлкіге ғана емес, біз өмір сүріп отырған қоғамның тазалығына да тікелей байланысты. Өйткені әділдік үстемдік құрмаған жерде баланың сенімі де, болашаққа деген үміті де әлсірейді. Сондықтан «Жемқорлықсыз бақытты балалық шақ» – бүгінгі күннің ең өзекті, ең маңызды тақырыптарының бірі деп ойлаймын.

Жемқорлық – қоғамның дамуын тежейтін, адам бойындағы сенімді әлсірететін қауіпті дерт. Ол көзге бірден көрінбеуі мүмкін, бірақ оның салдары әр баланың өміріне әсер етеді. Мысалы, егер біреу өз пайдасын ойлап, пара беріп немесе таныстық арқылы жетістікке жетсе, адал еңбектеніп жүрген басқа балалардың мүмкіндігі шектеледі. Бұл әділетсіздік бала санасында «еңбек емес, айла үстем» деген қате түсінік қалыптастырады. Қазіргі таңда елімізде жемқорлыққа қарсы бағытталған маңызды бастамалар жүзеге асырылуда.

Мектептерде адалдыққа тәрбиелейтін тәрбие сағаттары өткізіледі, «Адал ұрпақ» қозғалыстары жұмыс істейді. Біздің мектебімізде де сенімге негізделген «адалдық дүкені» бар: мұнда оқушы алған затына өз еркімен ақы төлейді. Осындай қарапайым, бірақ тәрбиелік мәні зор істер бізге адалдықтың адамгершілік құндылық екенін жүрекпен сезінуге үйретеді. Сонымен қатар, цифрландыру да әділдікті нығайтуға үлес қосып келеді. Құжаттардың электронды түрде тапсырылуы, мемлекеттік қызметтердің онлайн көрсетілуі – бәрі ашықтықты арттырып, заңсыз әрекеттерге жол бермеуге бағытталған. Бұл – болашақта қоғамымыздың бұрынғыдан да таза, сенімді, әділ болуына жасалған берік қадам. Жемқорлықсыз ортада әр бала өзінің қабілетіне сеніп өседі. Білімде – табандылықпен, спортта – жаттығумен, өнерде – талантымен биікке жетуге болатынын ұғынады. Мұндай қоғамда қорқыныш емес, әділдік билік етеді. Ал әділдік бар жерде бала жүрегінде сенім, ал сенім бар жерде шынайы бақыт орнайды. «Тазалық – болашаққа апарар ең қысқа жол».

Қорытындылай келе, менің ойымша, «жемқорлықсыз бақытты балалық шақ» – қиялдағы арман емес, бірліктің, адалдықтың және жауапкершіліктің нәтижесінде қол жеткізуге болатын асқақ мақсат. Ол әрқайсымыздың өзімізден басталады: өтірікке жол бермеу, әділетсіздікке бейжай қарамау, өзгенің еңбегін қадірлеу. Бүгінгі адал оқушы – ертеңгі әділ азамат. Егер біз қоғамымызды тазалық пен шынайылыққа негіздей алсақ, болашақ ұрпақтың балалығы да жарық, арманы да биік, өмірі де мағыналы болары сөзсіз.