Жұмыла көтерген жүк жеңіл

Жұмыла көтерген жүк жеңіл

Төрткүл дүниені дүрліктірген коронавирус пандемиясы бүгінгі таңда еліміздің өзекті мәселесіне айналып отыр. Індеттің таралуына байланысты елде төтенше жағдай енгізіліп барлық оқу орындары қашықтықтан жұмыс істеуге көшті. Бұл, әсіресе, мектеп бағдарламасына көбірек әсер етуде. Мектеп оқушылары 6 сәуірден бері жаңа жүйе бойынша өз үйлерінде білім алуда. Бұл тұрғыда айтылып жатқан сын - ескертпелер аз емес. Сан түрлі кемшіліктің де орын алуы заңдылық. Себебі бұл оқу жүйесі алғаш рет қажеттіліктен туындап отыр. Ең бастысы, оқушылар сабақтан қол үзбеулері тиіс.

Әрине оқушының алдында тұрып сабақ беру мен қашықтықтан оқыту екі бөлек нәрсе. Балалардың да қабылдау деңгейі әр түрлі. Мұғалімнің қас - қабағына қарап - ақ бір айтқанда түсіне қойатын зерек оқушылар бар. Ал кей балалар сабақты тәмпіштеп түсіндірген соң ғана әзер қабылдап жатады. Дегенмен мынадай қиын кезеңде баланы босансытпай, қалай да болмасын білім беру маңыздырақ. Бұл ретте бар салмақ ұстаз бен ата - анаға түсері анық.

«Жұмыла көтерген жүк жеңіл» дегендей, бұл қиындықты да еңсеріп. қалыпты өмірге ораламыз деп сенемін.

Осы орайда қауіпті індетпен бетпе - бет күресіп жүрген ақ халатты абзал жандарға алғысым ретінде жүрегімнен жарып шыққан төмендегі өлең жолдарын арнаймын:

Індетпен бетпе - бет күресер,

Ақ халат киген дәрігер.

Бар халық өзіңе сенеді,

Себебі Дәрігер - Нағыз ер!

Маңғыстау облысы, Маңғыстау ауданы,

Бекі бастауыш мектебінің мұғалімі

Жайлаубаева Жансая Төребайқызы