«Кітап мекеніне саяхат»

«Кітап мекеніне саяхат» танымдық экскурсиясы

Өнер мектебі жанындағы лагерь балаларының жазғы демалысын тиімді ұйымдастыру, оларды кітаппен қамтамасыз ету, кітап оқу мәдениетіне баулу және шығармашылық қабілеттерін дамыту мақсатында кітапханада «Кітап мекеніне саяхат» атты танымдық экскурсия ұйымдастырылды.

Іс-шара барысында балалар кітапхананың бөлімдерімен танысып, кітап қоры туралы қызықты мәліметтер алды. Кітапханашы Ташукова А.Н. жас оқырмандарға кітаптың адам өміріндегі маңызы, оны ұқыпты пайдалану және кітап оқу мәдениетін қалыптастыру жайында әңгімеледі.

Экскурсияның қызықты бөлігінде балалар «Кітап мекеніне саяхат» атты танымдық ойынға қатысты. Олар әдеби кейіпкерлер мен ертегілерге байланысты сұрақтарға жауап беріп, өз білімдерін сынады. Сонымен қатар мақал-мәтелдерді жалғастыру сайысында тапқырлық танытып, қазақ халқының даналық сөздерінің мән-мағынасын түсінді.

Балаларға ертегілер кейіпкерлерінің суреттері көрсетіліп, олардың қай ертегіден екенін табу тапсырмасы берілді. Бұл ойын олардың ойлау қабілетін дамытып, кітапқа деген қызығушылығын арттырды. Сондай-ақ сүйікті ертегілері туралы әңгімелеп, кейіпкерлердің жақсы қасиеттері жөнінде пікір алмасты.

Іс-шара соңында балалар өздеріне ұнаған кітаптарды таңдап, кітапхана қорымен жақынырақ танысты. Олар кітап оқу арқылы білім көкжиегін кеңейтіп, шығармашылық қабілеттерін дамытуға болатынын түсінді.

Мұндай танымдық кездесулер жас ұрпақтың кітапқа деген сүйіспеншілігін арттырып, рухани дүниесін байытады. Кітап – білімнің кілті, ал кітапхана – сол білімге бастар қасиетті мекен. Сондықтан кітаппен достасқан әрбір бала болашақта білімді, мәдениетті әрі шығармашыл тұлға болып қалыптасады.

Бөрлі ауданы, Ақсай қаласы.

Орталық балалар кітапханасының кітапханашысы:

Ташукова Айгул Нұрланқызы