Концерттік орындаушылыққа әзірлік

Концерттік орындаушылыққа әзірлік

Қазіргі кезеңде баяншылардың ұстаздық және орындаушылық шеберліктерін арттыру үшін мол тәжірибе жинақталады. Алдыңғы қатарлы музыкант-баяншылар ұстаздық, орындаушылық, ғылыми және қоғамдық жұмыстарды абыроймен атқарып, үлкен жетістіктерге жетуде.

Баян аспабында жеке орындаушының алдында тұратын басты жұмыс-репертуар таңдау. Барлық орындаушыларға бірдей репертуар ұсыну мүмкін емес. Әрбір орындаушы өзінің орындаушылық қабілетіне, талғамына қарай өзі реперуар құрастырады. Әр орындаушының сахнада орындаушылық бағдарламасын құрастыруына қарай олардың деңгейін білуге болады. Ал, әр түрлі ал-құла шығармалардан құрастырылған бағдарлама орындаушыға абырой әкелмейді.

Негізінен баянға арналып жазылған шығармалардың басым болуы баян аспабын халыққа танытуда үлкен әсер қалдырады. Концерттік бағдарлама екі бөлімнен тұрса, бірінші бөлімде қазіргі батыс европа композиторларының классикалық композиторлардың, ал екінші бөлімде еліміздегі баянға жазып жүрген композиторлардың және халық музыкасынан өңделген, лайықталған шығармаларынан құрастырған тиімді.

Осы бағдарламаның ішінде баян аспабында тамаша естілетін органға арналған шығармаларды енгізген жөн. Кейде жеке бір бөлімді халық музыкасына немесе классикалық композиторлардың баянға лайықталған шығармаларынан құрастырған дұрыс. Орындаушының бағдарлама құрастырудағы басты міндеті тыңдаушыны бірдей тақырыптағы, темптегі шығармалармен жалықтырмай оларды әр орындалған шығармамен қызықтырып отыруға тырысу.

Репертуарды жаңа шығармалармен, жаңа орындаушылық әдістермен толықтырып отыру сол орындаушы-баяншының өсуіне жол ашады. Соңғы жылдары баянның орындаушылық репертуарлары баянға арналып жазылған шығармалармен көптеп толығуда. Әрбір ұстаз өз сабағының үстінде шәкіртінің музыкалық қабілетін, орындаушылық техникасын арттырумен қатар, олардың музыкалық мәдениеттілігін, танымын дамытып, концерттік орындаушылыққа әзірлеуі қажет.