Логикалық ойын: "Заттарды салыстыру"

Мақсаты: Балалардың ойлау қабілетін дамыту. Балалардың көңіл-күйін сергітіп, ерік-жігерін дамыту. Ойынға қызығушылығын ояту, белсенділігін арттыру. Балаларға ойынның шартын түсіндіру.

Негізгі бөлім: - Балалар, сендер кітапты білесіңдер ме?

- Ия.

- Ал, дәптерді ше?

- Ия, білеміз.

- Ендеше, кітап пен дәптер ұқсайды ма, кім айтады?

- Ұқсайды.

- Қалай ұқсайды, олар неден жасалған?

- Екеуі де төртбұрышты.

- Тағы да қандай ұқсастығы бар?

- Кітап та, дәптер де қағаздан жасалған.

- Ал, кітап пен дәптердің айырмашылығы қандай, білесіңдер ме? Кітапты не істейміз, ал дәптерді не істейміз?

- Кітапты оқимыз, дәптерге жазамыз.

- Ия, кітаптан әр түрлі әңгімелерді, ертегілерді оқимыз, әдемі суреттерді көреміз, ал дәптерге әріптерді, жазуларды жазамыз екен. Ал енді, тағы бір сөздің жұбын салыстырайық. «Су мен сүт» қане, кім айтады? Бұлар ұқсайды ма?

- Ұқсамайды.

- Неге ұқсамайды? Қане Диас, айта ғой, су мен сүт қалай ұқсамайды?

- Сүттің түсі ақ, ал су басқа.

- Тағы кім айтады балалар, қане су мен сүтті көз алдарыңызға елестетіп, салыстырып көріңдерші, екеуінің ұқсастығы бар ма?

- Екеуі де құйылады, сұйық.

- Өте дұрыс, су да, сүт те сұйықтық.

- Тағы қандай ұқсастығы бар, немесе екеуінің айырмашылығы бар ма?

- Суды да, сүтті де ішеміз.

- Ия, дұрыс, екеуін де ішеміз.

- Ал сүтті қайдан аламыз, суды қайдан аламыз. Бұлар қайдан шығады?

- Сүтті малдан аламыз.

- Ия, сүтті малдан аламыз, яғни, сиырдан, түйеден, ешкі, қой, осы үй жануарларында сүт болады. Ал, суды жер астынан сорып алады, оны тазартады. Содан соң бізге кранмен келеді.

Қорытынды: - Сонымен балалар, бүгін біз кітап пен дәптерді, сүт пен суды салыстырдық, олардың ұқсастығы да, айырмашылығы да бар екенін білдік. Ойынға қатысқан балаларды мадақтау.