МАГИСТРАТУРА – КӘСІБИ ЖЕТІЛУ МЕН ҒЫЛЫМИ ДАМУДЫҢ ЖАҢА БАСПАЛДАҒЫ

Әл-Фараби атындағы Қазақ ұлттық университетіне магистратураға түсуімнің басты себебі – бұл университеттің ғылыми базасы мен зертханалық жабдықталуы, тәжірибелі профессорлық-оқытушылық құрамы және фармацевтикалық ғылымға арналған кең ауқымды мүмкіндіктері. ҚазҰУ-дың ғылыми ортасы жас зерттеушілерге бағыт-бағдар беріп, инновациялық идеяларды жүзеге асыруға қолайлы жағдай жасайды. Университеттің халықаралық стандарттарға сай білім беру жүйесі мен ғылыми мектептері маған кәсіби тұрғыда дамуға, жаңа дәрілік формаларды әзірлеу мен зерттеуге тереңінен ден қоюға мүмкіндік береді. Сондықтан ҚазҰУ-да оқу – менің кәсіби және ғылыми мақсаттарымды жүзеге асыруға арналған ең дұрыс таңдау деп білемін.

Магистратураға түсуімдегі басты мақсатым – таңдаған мамандығымды тереңінен меңгеріп, фармацевтика саласындағы білімімді жаңа деңгейге көтеру. Ғылым мен тәжірибені ұштастыра отырып, еліміздің фармацевтика өнеркәсібіне инновациялық жаңалықтар енгізуге бар күшімді салғым келеді. Бұл бағытта жаңа технологияларды, заманауи зерттеу әдістерін игеру мен үшін аса маңызды.

Болашақ кәсібім – тек теорияны білумен шектелмейтін, үнемі зерттеуді, ізденуді және жаңа ғылыми идеяларды талап ететін сала. Магистратурада сапалы білім алу арқылы мен инновациялық әдістерді терең меңгеруге, жаңа дәрілік формаларды әзірлеуге және фармацевтикалық ғылымға нақты үлес қосуға мүмкіндік аламын. Сондықтан бұл білім деңгейі – менің кәсіби және ғылыми мақсаттарымды жүзеге асырудың маңызды қадамы.

Менің ойымша, бакалавриат пен магистратура арасындағы негізгі айырмашылық олардың мақсатында және академиялық тереңдігінде. Бакалавриат – таңдалған мамандықтың жалпы теориялық негіздері мен базалық білімін қалыптастыратын алғашқы саты. Бұл кезеңде білім алушы жалпы ғылыми түсініктерді игеріп, кәсіби бағдар алады.

Ал магистратура – осы білімді тереңдетіп, нақты ғылыми бағытта мамандануға мүмкіндік беретін жоғары деңгей. Мұнда білім алушы өздігінен ізденуді, ғылыми талдауды, ғылыми дәлелдер келтіруді үйренеді. Зерттеу жұмыстарын жүргізу, ғылыми мақалалар жазу, практикалық эксперименттер жасау сияқты талабымен магистратура – болашақ ғылыми әлеуетті қалыптастыратын маңызды кезең.

Осыған байланысты мен үшін магистратура – кәсіби жетілудің сапалы деңгейі, ғылыми ойлауды қалыптастыратын орталық және болашақта өз саламда бәсекеге қабілетті маман болуға берік негіз.

Басқару психологиясы пәні менің ой-өрісімді кеңейтіп, адамдармен жұмыс істеудің жаңа қырларын түсінуге көмектесті. Бұл пәнде мен басшы мен қызметкер арасындағы қарым-қатынастың маңызын, ұжымдағы психологиялық ахуалдың жұмыс нәтижесіне қалай әсер ететінін жан-жақты меңгердім. Маған ерекше ұнаған және көп нәрсе үйреткен тақырып – басқару стилдерінің ұжымдағы психологиялық ахуал мен ұжымдық қарым-қатынасқа әсері. Әр түрлі басқару стильдерінің (авторитарлық, демократиялық, либералды) ұжымдағы атмосфераға, мотивацияға және қызметкерлердің белсенділігіне тигізетін әсерін нақты мысалдар арқылы талдау маған терең түсінік берді. Бұл сабақ маған жақсы басшы болудың басты шарты – адамдардың психологиялық ерекшеліктерін түсіну, олармен дұрыс қарым-қатынас орната білу, ортақ мақсатқа жұмылдыра алу екенін көрсетті. Басқару психологиясы пәні болашақ кәсіби жолымда маған үлкен пайдасын тигізді деп сеніммен айта аламын.

Жалпы алғанда, магистратурада білім алу – менің кәсіби даму жолымдағы ең маңызды қадамдардың бірі. Бұл деңгей маған тек теориялық білімді тереңдетіп қана қоймай, ғылыми зерттеулер жүргізуге, басқару дағдыларын қалыптастыруға, жаңашылдыққа ашық болуға мүмкіндік берді.

Фармацевтика саласында өз орнымды табу, инновациялар енгізу және еліміздің ғылымына үлес қосу – менің алға қойған басты мақсатым. Осы жолда алған білімім мен тәжірибем, соның ішінде басқару психологиясы пәнінен үйренгенім, болашақта білікті маман ретінде қалыптасуыма зор ықпалын тигізетініне сенімдімін. Магистратура – тек оқу емес, өзіңді дамыту, жаңа мүмкіндіктерді көру және болашақ мамандығыңды лайықты деңгейде меңгерудің кең өрісі.

Тағабай Әдемі Қайратқызы

1 курс магистранты,

Болтаева Алия Масакбаевна

психология ғылымдарының кандидаты

Әл-Фараби атындағы Қазақ ұлттық университеті