Мақала "Біздің басты мақсатымыз – білім сапасын жақсарту."

Біздің басты мақсатымыз – білім сапасын жақсарту.

Қандай байлық болмасын, оның түбі бір

сарқылатыны хақ.

Сарқылмайтын, терең бойлаған сайын, керісінше,

еселеп арта беретін бір байлық бар, ол – білім.

Ал білім негізі – мектепте.

Н.Ә.Назарбаев.

Мемлекетіміз тәуелсіздік алғаннан бері республикамызда болып жатқан саяси, экономикалық және рухани өзгерістер Қазақстандағы оқу – ағарту саласының дамуы мен педагогика тарихының қалыптасуының күрделі, әрі түйінді проблемаларын жан – жақты қарастыра отырып, бүгінгі заман талабына сай жаңа білім беру жүйесін дамытуды талап етеді. Себебі, бүгінде біз ақпараттық қоғамда өмір сүрудеміз. Қазіргі дәуірдің әлеуметтік және экономикалық даму ерекшеліктерінің бірі ретінде автоматтандырылған және ақпараттық технологиялардың тегеурінін атауға болады. Бұл ерекшелік тұрақты кәсіптердің өз қасиеттерін жоғалтып өзгерістерге ұшырап, уақытша сипаттарды иеленуіне әкелуде. Мұндай жағдайда үйрене білу және үйренуге ұмтылу адамның ең басты қабілеттеріне айналуда. «Өмір бойы үйрену» идеясының қазіргі білім жүйесінің негізгі тұжырымдамаларының біріне айналып кетуінің себебі осындай жәйттермен байланысты.

Білім - ел қазынасы, халқымыздың білімділігі еліміздің байлығының ең маңызды бөлігі десек, білімнің негізі мектепте, яғни бар ғылымның бастауы – мектеп, «Елдің келешегі бүгінгі жастардың қолында, ал жас ұрпақтың тағдыры – ұстаздың қолында» деп Елбасы бізге үлкен міндет артып отыр. Егемен еліміздің болашағы, оның әлемдік өркениеттегі өз орны, ең алдымен білім мен тәрбиенің бастауы болатын – ұстаз қолында, сондықтан да біздің басты мақсатымыз – білім сапасын жақсарту.

Білім беру жүйесінің басты міндеті – ұлттық және адамзаттық құндылықтар, ғылыммен практика жетістіктері негізінде жеке адамды қалыптастыруға, дамытуға және кәсіби шыңдауға бағытталған білім алу үшін қажетті жағдайлар жасау, оқытудың жаңа технологиясын енгізу, білім беруді ақпараттандыру. Қазіргі кезеңде білім беру жүйелерінде қайта құру жүріп жатыр, білім беру жүйелерінің жаңа ұлттық моделі құрылуда.

Қай салада болмасын ондағы жұмыстың нәтижесі сапамен өлшенеді. Сапалы оқыту және өздігінен оқып білім алып алуға баулу негізінде ғана оқушылардан парасатты азамат тәрбиелеп шығаруға болады. Білімнің сапалы болуы тікелей мұғалімге, оның білім дәрежесі мен іздену шеберлігіне байланысты. Сапаны көтерудегі ең өзекті мәселелердің бірі – мұғалімдерді даярлау және шыңдау мәселесі болып отыр. Жаңа заман мұғалімі «дайын» білім көзі ғана болмай, оқушылардың танымдық іс – әрекетінің ұйымдастырушысы және үйлестіруші бола білуі, білімнің құндылық ретіндегі сипатына терең мән беруі, нәтижеге бағытталған білім беруде жаң жолдар мен әдістер табуға дағдыланған маман болуы қажет.

«Жетіжал ота мектебі» педагогтары осы бағытта жүргізіліп жатқан жұмыстардың негізгілерінің бірі, сапалы білім беруде оқушылардың шығармашылық қабілеттерін арттырудағы басты бағыт болып табылады.

Мектеп үйлестірушісі: А.Т.Фазилова