Мақала «Ең жақсы инвестиция – білімге салынған инвестиция»

«Ең жақсы инвестиция – білімге салынған инвестиция»

Елбасы Н.Әбішұлы Назарбаев «Қазақстан жаңа жаһандық нақты ахуалда: өсім.Реформалар.Даму.атты жолдауында «Ерінбей еңбек еткен, талмай ғылым іздеген, жалықпай техника меңгерген адам озады. Тұрмысы жақсы, абыройы асқақ болады...» деген. Осыған орай Үржар ауданы Шолпан аулындағы «Жүзағаш орта мектеп – бақшасында» «Менің мектебім» атты акция ұйымдастырылды. Ұядан ұшып, ат жалын тартып, азамат болып кетсе де туған жерге деген ыстық сезім әркімнің жүрегінде ерекше орын алатыны анық. Осы ретте мектеп әкімшілігі еліміздің түкпір – түкпірінде әртүрлі қызмет атқарып жүрген ел ағалары мен кәсіпкер түлектерге, қожалық басшылары мен барлық мектеп түлектеріне арнайы шақыртулар жіберген еді. Форумды мектебіміздің ұстазы Оспанов Еркін ашып, акцияның өтілу мақсатын айтып өтті, яғни бұл бастама кейінгі ұрпаққа үлгі-өнеге, патриоттық сезім екендігіне тоқталды. Ауыл әкімі Ибраев Дулат туған мектебін, туған жерін көркейтуге ниет білдіруші азаматтар қатары көбейіп, акцияға белсене қатысуға шақырды.Аулымыздың тумалары Баймұхамбетов Бекзат пен Құлахметов Секіманның мектеп есепшотына қомақты қаржы аударатынын жеткізіп, ризашылығын білдірді.Бұдан кейін аулымыздың имамы Жапеков Мақсат, зейнеткерлер Оспанов Аманғазы , Дария , Тұрарбаев Оңғарбек , жүргізуші Сағымбаев Самат сөз алып , акцияны қолдайтынын , ұйымдастырылып отырған форумның өтілу барысына өте риза болып отырғандықтарын айтып , арнайы жәшікке өз үлестерін салды. Мектеп директроы М.Н.Асанова мектеп өміріне бей-жай қарамай , өз үлестерін қосқан тұлғаларға алғыс айтты , бұл істің алдағы уақытта да жалғасын табатынын айтып өтті. Форум барысында мектеп оқушыларының әуелеген әсем әндері мен шалқыта билеген билері ,мектеп ұстаздарының ұйымдастыруымен жайылған ақ дастархан келген қонақтардың көңіліне нұр құя түскендей болды.

Үржар ауданы «Жүзағаш орта мектеп – бақшасы»КММ

Бастауыш сынып мұғалімі: Л.А.Узбаева