Инновацияға бастар қадам: 3D модельдеу және ұстаздық қолдау

Қазіргі білім беру кеңістігінде инновациялық технологияларды меңгеру – болашақ маман үшін маңызды талаптардың бірі. Әсіресе, цифрлық дәуірде 3D модельдеу сияқты заманауи құралдар білім алушылардың кәсіби дамуына жаңа мүмкіндіктер ашады.

Мен, Сержанұлы Ералы, Сәрсен Аманжолов атындағы Шығыс Қазақстан университеті-нің 3 курс студенті ретінде B011 – Информатика мұғалімдерін даярлау білім беру бағдарламасы бойынша білім алудамын. Оқу барысында теориялық білімді тәжірибемен ұштастыру мен үшін басты қағидаға айналды. Осы бағытта 3D модельдеу технологиясына деген қызығушылығым артып, оны терең меңгеруге ұмтылдым.

3D модельдеу – үшөлшемді кеңістікте нысандарды құрастыру, оларды визуализациялау және түрлі мақсатта қолдану мүмкіндігін беретін заманауи технология. Бұл тек техникалық дағды ғана емес, сонымен қатар шығармашылық ойлауды, кеңістіктік елестету қабілетін дамытатын құрал. Атап айтқанда, мен Blender бағдарламасын пайдалана отырып, түрлі жобалар жасап, өз дағдыларымды жетілдіріп келемін.

Осы бағыттағы еңбегім өз нәтижесін де берді. Университет қабырғасында өткен “Ғылыми Start UP жобалар” байқауында “Amanzholov University” brand-shop жобасын ұсынып, жүлделі III орынға ие болдым. Бұл жетістік менің 3D модельдеу арқылы нақты өнім жасап, оны жоба ретінде қорғауға болатындығын дәлелдеді. Бұл жетістік мен үшін үлкен мотивация, әрі кәсіби дамуыма серпін болды.

Менің осы жетістіктерге жетуіме үлкен үлес қосқан ұстазым – ЖИ және ақпараттық технологиялар кафедрасының лекторы Серікова Жанетта Сұңғатқызы. Ұстазымның бағыт-бағдары, кәсіби қолдауы және заманауи технологияларды үйретудегі шеберлігі мені үнемі ізденіске жетелейді. Сабақ барысында тек теориямен шектелмей, тәжірибелік жұмыстарға басымдық беруі – менің 3D модельдеуге деген қызығушылығымды арттырды.

Ұстаз қолдауы мен студенттің ізденісі үйлескен жағдайда ғана нақты нәтиже болатынын өз тәжірибемнен байқадым. 3D модельдеу арқылы жасалған жобалар болашақта білім беру саласында да тиімді қолданылатынына сенімдімін. Мысалы, мектеп оқушыларына күрделі тақырыптарды визуалды түрде түсіндіру, интерактивті тапсырмалар құрастыру – қазіргі мұғалімнің жаңа деңгейі.

Қорытындылай келе, инновацияға бастар қадам – жаңа технологияны меңгеруден ғана емес, оны дұрыс бағыттай білетін ұстаздан басталады. Мен үшін 3D модельдеу – болашақ кәсібімнің маңызды бөлігі, ал ұстазымның қолдауы – сол жолдағы ең үлкен тірек. Алдағы уақытта да осы бағытта ізденіп, білімімді жетілдіріп, жаңа жетістіктерге жетуді мақсат етемін.

Сәрсен Аманжолов атындағы

Шығыс Қазақстан университеті

Бакалавр.Білім беру бағдарламараларың тобы:

Информатика мұғалімдерін даярлау

3 курс студенті Сержанұлы Ералы