«ЛОГИКА ЛАБОРАТОРИЯСЫ: ОЙЛАН. ШЕШ. ДАҒДЫЛАН» АВТОРЛЫҚ БАҒДАРЛАМАСЫНЫҢ БАЛА ДАМУЫНДАҒЫ МАҢЫЗЫ

Авторы: Зорбаева Дина Максудовна, бастауыш сынып мұғалімі

Қазіргі таңда білім беру үдерісі оқушының шығармашылық, логикалық және функционалдық дағдыларын дамытуға бағытталуда. Осы бағытта жасалған авторлық бағдарламалардың маңызы зор. Солардың бірі – «Логика лабораториясы: Ойлан. Шеш. Дағдылан» атты авторлық курс бағдарламасы.

Бұл бағдарлама бастауыш сынып оқушыларының логикалық ойлауын, зеректігін, талдау қабілетін дамытуға бағытталған. Бағдарлама 4-сынып оқушыларына арналған, жалпы 34 сағатқа негізделген. Жас ерекшеліктері ескеріліп, өмірмен ұштастырылған, қызықты логикалық тапсырмалар мен жаттығулар топтамасы арқылы оқушының интеллектуалдық әлеуетін арттыру көзделген.

Бағдарлама мазмұнына логикалық есептер, комбинаторика элементтері, сандар мен фигуралармен жұмыс, графикалық тапсырмалар және ұлттық құндылықтарға негізделген танымдық есептер енгізілген. Бұл оқушылардың шығармашылықпен ойлауын дамытуға, қоршаған ортаны зерделеу қабілетін жетілдіруге ықпал етеді. Оқыту үдерісі бірнеше кезеңнен тұрады:

– Қызығушылықты ояту;

– Жаңа білімді меңгеру және қолдану;

– Білімді бекіту, рефлексия жасау.

Бағалаудың қалыптастырушы, өзара және жиынтық түрлері арқылы оқушының жеке жетістігі анықталып отырады. Сонымен қатар, оқытуда АКТ құралдары, ойын әдістері, жұптық және топтық жұмыстар тиімді қолданылады.

Бағдарламаның ерекшелігі – оқушыны тек есеп шығаруға үйретіп қоймай, шешімін негіздеуге, логикалық дәлел келтіруге, өз көзқарасын айтуға тәрбиелеуінде. Яғни, бұл бағдарлама – білім берудің жаңа сапасына көшу жолындағы тиімді әдістемелік бастама.

Қорытындылай келе, «Логика лабораториясы» – оқушылардың логикалық ойлауын дамытудың, ойлау мәдениетін қалыптастырудың және білімге қызығушылығын арттырудың тиімді құралы. Бағдарламаны білім беру ұйымдарында кеңінен қолдану бастауыш сынып оқушыларының зияткерлік әлеуетін арттыруға сеп болары сөзсіз.