мақала "Өзін-өзі тану - өмірді тану"

Мақаланың авторы: Ескенова Бакытжамал Абеновна
Білім беру мекемесі: Қостанай облысы,

Лисаков қаласы әкімдігінің білім бөлімі «№ 3 орта мектебі» КММ
Лауазымы: өзін-өзі тану пәні мұғалімі

«Өзін-өзі тану-өмірді тану»

Өзіңді-өзің тану –

даналықтың бірінші белгісі.

К.Маркс.

«Жас бала-жаңа өркен жайған ағаш тәрізді», -дейді халқымыз. «Өзін-өзі тану» пәнінің мазмұны адамның өзін-өзі танып, өзін-өзі жетілдіруіне игі ықпалын тигізетін, адамгершілік қасиеттердің дара тұлғаны жетілдірудің мәні.

«Өзін-өзі тану» пәні арқылы оқушыларға берілетін рухани адамгершілік білім негіздері олардың өз құрдастары адамдар арасындағы жарасымды қарым-қатынасқа сай бақытты өмір сүруді қалайтын, өмірде кездесетін әр түрлі жағдаяттарда өзіндік көзқарастары мен дүниетанымы қалыптасқан болашақ ұрпақтың жеке тұлғалық қабілеттерін жетілдіруге қызмет етеді.

Әр бала өзінің руханилығымен, өзінің жүрегінің тазалығымен және өмірді таза күйінде қабылдай алуымен ерекшеленеді. Ұлттық тәлім-тәрбиесімен ерекше орын алатын халқымыздың салт-дәстүрі мен әдеп-ғұрпын сан ғасырлық тыныс-тіршілігімізде жасөспірімдердің жүрегіне ұялата білу біздің басты мақсатымыз деп ойлаймын.

Болашағын баласынан, жас жеткіншектерінен көретін халқымыз, еліміз үшін бала жанын жүдетпеудің маңыздылығы зор.

«Өзіңді-өзің танысаң – істің басы» деп Шәкәрім айтқандай өзін-өзі тану пәні арқылы балалар өмірде кездесетін түрлі жағдаяттарды шеше білуге, өз ойын ашық айтуға, пікірін, сезімін, көңіл-күйін жеткізе білуге, өз мүмкіндігін жүзеге асыруға, адами қарым–қатынас жасай алуға, өз денсаулығын сақтауға, жақсы қасиеттерін ашуға үйренеді.

Қазіргі тәуелсіз елімізде ғасырлар бойы халқымыздың ұлттық санасынан берік орын алған адамгершілік құндылықтарды, атап айтатын болсақ, қайырымдылық, риясыз сүйіспеншілік, әділеттілік, мейрімділік, жауапкершілік сияқты қасиеттерді, қоғамдағы болып жатқан өзгерістерге байланыстырып, жеткіншек ұрпақты тәрбиелеудің қайнар бастауы деп қарастыруға болады. Яғни «Тәрбиесіз қоғам, қоғамсыз тәрбие өмір сүрмейді» деген заңдылыққа сүйене келе, өскелең ұрпақтың бойына қоғам талабына сай адамгершілік құндылықтарды қалыптастыруды мақсат еткен тәрбие процесі ғана уақытпен үндесіп, қоғам мен тәрбиенің өзара байланысын түзетеді. Өзін-өзі тану пәні-жалпы адамзаттық құндылықтарға бастар жол.