ЖУРНАЛИСТИКАДАҒЫ ЖАРТЫ ҒАСЫР

Қазанның 13-ші жұлдызы қасиетті жұма күні елбасымыз Н.Ә.Назарбаевтың «Болашаққа бағдар: рухани жаңғыру», мақаласына және «Туған жерге тағзым» атты акцияларына сәйкес «Шағын жинақталған Саржыра негізгі орта мектебі» КММ-де журналист, ҚР журналистер одағының, жазушылар одағының мүшесі; Зайсан ауданының, Өскемен қаласының құрметті азаматы, Егемен Қазақстан республикалық газетінің ШҚО-дағы меншікті тілшісі, профессор Оңдасын Елубай атамызбен кездесу болып өтті. Кештің шымылдығы үш тілде ашылып, оқушылар аталарына арнап жазған арнау-тілектерін оқыды. Алғашқы құттықтау сөз аудандық ішкі саясат бөлімінің басшысы Дүйсенбаева Зұмрат ханымға берілді. Атамыздың журналистика саласындағы 50-жылдық мерейтойымен Кеңсай ауылдық округінің әкімі Тауасаров Ринат Әдембекұлы құттықтады. Қадірлі қонақтардың қатарында атамызбен бірге Катон-Қарағай ауданынан арнайы келген құрметті қонағымыз Садуов Қайыржан, Зайсан ауданының құрметті азаматы Қинашев Болат ағаларымыз да қатысты. Кешіміз әрі қарай концерттік бағдарламамен жалғасты.

Туған ел – тұғырың ,

Туған тіл – қыдырың ,-

деп дана халқымыз айтқандай қаламы қарымды қаламгер өзінің жарты ғасырлық ғұмырлы еңбегінде еткен еңбектері мен «журналистика» атты қиын да қызық мамандықтың қыры мен сыры туралы тамаша әңгіме өрбітті. Өзінің сыныптастарымен кездесіп туған топырақтарында балалықтың балғын күлкісіндей, тату достықтың құпия сырларындай болып сырғып өте шыққан балдәурен шақтарын көздеріне жас алып сағына еске алысты. Рухани жаңғыруды, әрине, кітапсыз, газет-журналсыз елестету, әсте, мүмкін емес. Осы орайда атамыз кешке құр алақан келмей, соңғы шыққан «Алатауды дүбірлеткен он бір күн», «Жанарымда жасыл құрлық», «Аялайық, Алтайды», «Жеңіс жалауын желбіреткен жетеу» атты кітаптарын кітапханамызға тарту етті. Бұл кездесу кіндік қаны тамған туған топырақ пен қоғам қайраткерлерінің арасындағы ұрпақтар сабақтастығын жалғайтын алтын көпір іспетті. Жас ұрпақты тәрбиелеу мақсатында мұндай кештердің ұстаздар қауымы үшін көмегі ұшан теңіз. Осындай рухани тәлімі мол кештер ауыл мектебінде жиі өткізілсе нұр үстіне нұр болар еді?

Әлжапаров Нұржан

Шағын жинақталған Саржыра негізгі орта мектебінің мұғалімі