Математика мен психологияның тоғысуы: Күйзеліс жағдайын зерттеу мен басқару

Мен бакалаврда ғылыми математика мамандығын аяқтап, магистратураға қолданбалы математика мамандығына түсу туралы шешім қабылдадым. Бакалавриат кезеңінде алған білім мені математиканың теориялық аспектілерімен таныстырды, бірақ менің математикалық білімімді кеңейтіп, оны нақты өмірде, түрлі салаларда қолдана білуім маңызды болды. Қолданбалы математика — тек қана математикалық теорияларды зерттеу емес, сонымен қатар, сол теорияларды нақты мәселелерге, мысалы, геологиядағы геохимиялық деректерді модельдеуге, экономикадағы талдауларға немесе өндірістегі шешімдер қабылдауға қолдану мүмкіндігіне ие болу дегенді білдіреді. Магистратурада оқу мені осы мақсаттарға жетуге бағыттап, тереңірек зерттеу жұмыстарын жүргізуге мүмкіндік береді. Қолданбалы математика саласында білім алу менің ғылыми мансабым үшін дұрыс қадам болып табылады, өйткені бұл сала жаңа технологиялар мен инновациялық шешімдермен тығыз байланысты және менің болашақтағы кәсіби жетістіктеріме негіз бола алады.

Магистратура — менің білімімді тереңдетіп, ғылыми-зерттеу жұмыстарын жүргізуге мүмкіндік беретін кезең болып табылады. Қолданбалы математика мамандығында оқу барысында мен тек теориялық біліммен ғана шектелмей, практикалық тәжірибе жинақтауға да ерекше көңіл бөлемін. Бұл саладағы математикалық әдістер мен техникаларды үйрену мені жоғары деңгейдегі маман ретінде қалыптастыруға көмектеседі. Мысалы, математикалық модельдеу мен мәліметтерді талдау әдістері, үлкен деректерді өңдеу және машиналық оқыту сияқты маңызды дағдыларды игеру менің ғылыми жұмыстарыма тың серпін береді. Магистратураның академиялық деңгейі мені тек нақты проблемаларды шешу жолдарына үйретіп қана қоймай, ғылыми көзқарасымды дамытып, жаңаша ойлау қабілетін қалыптастыруға мүмкіндік береді. Осы білім мен дағдылар арқылы мен тек өз саламда емес, әртүрлі ғылыми бағыттарда да өз үлесімді қоса аламын. Магистратурада алған білімдер мен дағдылардың маңызы өте зор, өйткені олар менің ғылыми-зерттеу жұмыстарыма, сондай-ақ болашақтағы кәсіби мансабымдағы жетістіктеріме әсер етеді.

Қазіргі таңда магистратурада "Басқару психологиясы" пәнін оқып жүрмін, ол адамның мінез-құлқына әсер ететін факторларды, сондай-ақ ұйымдардағы психологиялық процестерді тиімді басқарудың әдістерін зерттейді. Бұл пән менің зерттеу бағытымды кеңейтті және мені психология мен математиканы біріктіретін жаңа мүмкіндіктерге ашты. Бүгінде күйзеліс (стресс) тақырыбы өте өзекті болып отыр, себебі ол жеке тұлғаның өміріне ғана емес, бүкіл ұйымның жұмысына да терең әсер етеді. Стресс пен күйзеліс жағдайларын математикалық тұрғыдан модельдеу және оларды басқару тәсілдерін іздеу менің қызығушылығымды арттырып, зерттеулерімнің негізгі бағытына айналды. Математикалық әдістерді қолдана отырып, күйзеліс факторларын сандық түрде бағалау, сол арқылы адамдардың психологиялық жағдайын зерттеу мен үшін өте маңызды. Осы тақырып бойынша жазылатын мақала менің ғылыми тұрғыдан жаңа көзқарас қалыптастыруыма көмектеседі және математикалық модельдеудің психологиядағы тиімділігін көрсетуге мүмкіндік береді. Білімімнің осы екі саласын біріктіре отырып, мен күйзеліс деңгейін төмендетуге бағытталған практикалық шешімдер ұсынуды жоспарлап отырмын.

Сейтмуратова З. И.

1 курс магистранты

Болтаева А.М.

психология ғылымдарының кандидаты

Әл-Фараби атындағы ҚазҰУ