ЭССЕ

Тақырыбы:

«Мектеп жасына дейінгі балаларды дамыту мен тәрбиелеудегі заманауи педагогтің рөлі»

Қазіргі заманда балабақшадағы тәрбиешінің рөлі өте маңызды деп ойлаймын. Себебі мектеп жасына дейінгі кезең – баланың ең тез дамитын, айналасындағы әлемді танып-білетін уақыты. Осы кезде балаға дұрыс тәрбие берілсе, оның болашағы да дұрыс қалыптасады. Сондықтан заманауи педагог тек білім беріп қана қоймай, балаға бағыт беретін, оның қабілетін ашатын тұлға болуы керек.

Менің ойымша, әр бала – жеке тұлға. Бірі белсенді, бірі тұйық, бірі тез қабылдайды, ал бірі уақытты қажет етеді. Осындай ерекшеліктерді ескеру өте маңызды. Бұл туралы ғалым Ян Амос Коменский: «Баланың табиғатына қарсы келмей, оның табиғатын дамыту керек» деген. Бұл сөздің мәні өте терең. Яғни, біз баланы өз қалпында қабылдап, оның қабілетін ашуға көмектесуіміз керек. Егер барлық балаға бірдей талап қойсақ, кейбір балалар өз мүмкіндігін толық көрсете алмай қалуы мүмкін.

Тағы бір маңызды нәрсе – балаға деген мейірім. Менің ойымша, бала ең алдымен өзін қауіпсіз сезінуі керек. Василий Сухомлинскийдің «Бала жүрегіне жол табу – педагогтың басты міндеті» деген сөзі осыны дәлелдейді. Шынымен де, балаға жылы сөйлеп, оны қолдап отырса, ол өзін еркін ұстайды, жаңа нәрселерді үйренуге қызығушылығы артады. Ал керісінше, қаталдық көп болса, бала тұйықталып қалуы мүмкін.

Сонымен қатар, балаға дайын нәрсені бермей, оны өз бетімен әрекет жасауға үйрету де өте маңызды. Бұл туралы Мария Монтессори: «Маған өзім істеуге көмектес» деген екен. Бұл сөзді мен баланың дербестігін дамыту деп түсінемін. Мысалы, бала өзі киініп үйренсе, өзі ойыншықтарын жинаса – бұл оның жауапкершілігін арттырады. Осындай қарапайым әрекеттер арқылы бала өмірге бейімделе бастайды.

Қазіргі заманда технологиялар да үлкен рөл атқарады. Педагогтер түрлі әдіс-тәсілдерді, ойындарды, интерактивті құралдарды қолдана алады. Бірақ менің ойымша, ең маңыздысы – баламен тікелей қарым-қатынас. Тәрбиешінің жылы сөзі, күлімсіреуі, қолдауы – бала үшін өте маңызды.

Қорытындылай келе, заманауи педагог – тек тәрбиеші емес, ол балаға дос, бағыт беруші және қолдаушы. Ғалымдардың айтқан ойларына сүйенсек, балаға еркіндік беріп, оны түсініп, мейіріммен тәрбиелеу қажет. Менің ойымша, осындай педагогтар не тәрбиешілер ғана баланың жан-жақты дамуына үлкен үлес қоса алады.