МЕКТЕПКЕ ЖОЛ ҚАЙЫРЫМДЫЛЫҚТАН БАСТАУ АЛАДЫ

БАЙШИКОВА АЙЖАН НУРМУХАНБЕТОВНА

Алматы қаласы Жетісу ауданы

№57 ЖББ мектебінің әлеуметтік педагогы

Алғашқы қоңырау соғылып, балалардың мектепке барар сәті де алыс емес. Жыл сайын бағасы шарықтай түсетін оқу – құралдары мен мектеп формасын сатып алуды баршаның қалтасы бірдей көтере бермейтіндігі рас. Ал, жаңа оқу жылына даярланып жатқан ата – аналар мен балалардың осынау қарбалас сәтінде азаматтық қоғам қандай көмек қолын соза алады?!

Жыл сайын дәстүрге айналған «Мектепке жол» республикалық акциясы мектеп оқушыларының осы сәттегі қиыншылықтарын жеңуге бағытталған игі шара.

Әлеуметтік жағынан қорғалмаған отбасы балаларына қолдау көрсету мақсатында дәстүрге айналған «Мектепке жол» республикалық акциясы жалғасын табуда. Аталған акция еліміздің барлық өңірлерінде ағымдағы жылдың 1 тамызы мен 30 қыркүйек аралығында өтеді.

Акцияның мақсаты: жаңа оқу жылына дайындық уақытында аз қамтамасыз етілген және көпбалалы отбасылардан шыққан оқушыларға қолдау көрсету; баланың әлеуметтік себептермен мектепке келмей қалуының алдын алу; жетім балаларға, ата – анасының қамқорлығынсыз қалған балаларға, көп балалы, тұрмыс жағдайы төмен отбасыларына нақты көмек көрсету болып табылады.

Осыған орай 2025-2026 оқу жылы қарсаңында «Мектепке жол!» атты республикалық акциясы мектебімізде дәстүрлі түрде бастау алды. Мектеп әкімшілігі тарапынан әлеуметтік желіде, мектеп сайтына акцияға белсене қатысу туралы хабарландыру беріліп көңілі жомарт жандарды акцияға белсене қатысуға шақыруда. Мектебімізде акция бойынша арнайы ақпараттық бұрыш жасалып, баннер,плакат,стендтер жасақталды.

Бұл акция көптеген бүлдіршіндерге шапағат нұрын себуде. Бұл бір реттік қана көмек емес, жыл бойы жалғасып отыратын үрдіс. Осы ретте акция кезінде ғана емес, басқа уақытта да тұрмысы төмен отбасынының балаларын мектеп формасымен, оқу-қаралдарымен, қыстық киіммен қамтамасыз етіп, көмек қолын ұсынатын, демеушілік көрсетіп тұратын жандардың бары қуантады.

Акция аясында оқушылар оқуға қажетті құрал-жабдық, мектеп формасы, спорттық киімдермен қамтылып келеді. Бұл іске аудандық әкімдіктен бастап, түрлі мекеме, ұйымдар белсенді түрде атсалысып келе жатқанын айта кеткен орынды.

Сонымен қатар ата-аналар, ұстаздар да демеушілік көмек көрсетуде. Олар мектеп оқушыларына көмек қолын ұсынып, балаларға қуаныш пен күлкі сыйлауда. Осындай жақсылықты істің ұйытқысы болып жүрген ұстаздар қауымына алғысымыз шексіз.

Акцияның алғашқы айында бірқатар оқушы мектепке қажетті құрал-жабдықпен қамтылды. Жаңа оқу жылы басталғанша 40 баланы толықтай мектепке даярлаймыз. Ол үшін әлі де демеушілер іздестіріп жатырмыз.

Бүгінгі күнге дейін үлес қосқан жандар да баршылық.

Акция аясында халқымыздың салт-дәстүрін қастерлеу, үлкенге құрмет, кішіге – ізет көрсету, жас ұрпақ бойына рухани адамгершілік дәндерін себуге бағытталған шаралар жүргізіледі. Халқымызға тән ұлттық ерекшеліктерді, мейірімділік, қайырымдылық, әділдік сынды ең асыл қасиеттерді насихаттау кеңінен өріс алады.

Жаңа оқу жылының қарсаңындағы игі бастама елімізде дарынды, білімді, алғыр, дені сау ұрпақ өсуіне ұйытқы болмақ.