Мен - қазіргі заман педагогімін

«Алақай, музыка апай келе жатыр» , «жаңа ән үйрететін шығар»,

«сен өткендегі әнді жаттап келдің бе?» деген нәп - нәзік бүлдіршіндердің дауысы мен сабаққа кіріп келе жатқанда жарқын – жарқын шықты.

Иә, бүлдіршінмен жұмыс жасау – мен үшін үлкен бақыт.Соның ішінде балабақша балдырғандарымен жұмыс жасау қандай керемет десеңші.Сөзбен жеткізіп те айта алмаспын....

Мен кішкене кезімде мектеп сахнасында әнімді айтып, көпшілік алдына шығып, сайыстардан бұйырған орындарды алып жүрдім.Осылайша бала кезден басталған арманым Орал қаласындағы педагогикалық университеттің музыка факультетіне оқуға түсірді. Құдіретті музыканың ырғағымен бес жылдың қалай өтіп кеткенін білмей, өз ауылым Форт –Шевченко қаласына қайтып келіп, «Айгөлек» балабақшасына музыка пәнінің мұғалімі болып жұмысқа қабылдандым.Шын жүрегіміммен қалаған мамандығымның иесі болып, сары уыз балапандарға ән үйреткенімде, менен бақытты адам болмайтын.Өйткені, кішкене баланың ниеті де, жүрегі де аппақ емес пе?

Не айтсаң да , «Апай, апайлап»,бірден үйреніп алатын.

Балабақшадағы бүлдіршіндерді аппақ қар немесе аппақ мақта дер едім.Оларды кірлетуге ешқашан жол жоқ.Өйткені, оларды тап – таза күйінде тәрбиелеп келе жатырған бірінші ата – анасы болса, екінші, балабақшадағы тәрбиеші апайлары мен сабақ беретін пән мұғалімдері бар.

Алдымдағы кішкентай бүлдіршіндердің дауысы үйге барсам да, құлағымнан кетер емес.Қазір өзімнің жанұям, екі балам болғандықтан, оларға да музыканың қыр – сырын үйретуден бір жалыққан емеспін. «Үйде – бала, жұмыста тағы бала, қалай қиын болмайды? » деген құрбыларымның сөзіне мен өзімнің сүйікті қызметіммен мақтанамын, баламен жұмыс жасау – бақыттың бақыты деп жауап беретінмін.

Әлемдік деңгейге жету үшін президентіміз мұғалімдер мен тәрбиешілерге жағдай жасап, жаңаша бағдарламаларды ұсынып жатыр емес пе?

-Әркімді заман сүйремек, 

заманды қай жан билемек, 

заманға жаман күйлемек,

замана оны илемек - ұлы Абай айтпақшы, көштен қалмай заман ағымымен балабақшадағы бүлдіршіндерге сабақтарымды түрлендіріп өткізіп,құрастырмалы керемет домбыра, электронды киіз үйді тиімді пайдаланып, топтық, жұптық жұмысты бала деңгейіне қарай жүргізіп келемін.Еңбек ете жүріп, жас болсам да, небір сайыс, байқауларға да бағымды сынап қатысып, алдыңғы орындарды да алып жүргендігімді үлкен мақтанышпен айтар едім.

«Музыка – халық жанының, оның дерті мен қайғысының, ұмтылысы мен
шабытының көрнісі» деп ұлыларымыз айтпақшы, музыкасыз өмірді көз алдымызға елестетудің өзі қиын. Ал сол музыканы буыны қатпаған балапандарға үйрену – ол нағыз қазіргі заман педагогының ерен еңбегі деп бағалар едім.

Музыканы сүю арқылы бүлдіршіндер бір – бірін, Отанын, бауырларын, жерін сүю сияқты аса құнды қасиеттерді бойына дарытып, нағыз патриот болып тәрбиеленеді. Ендеше, мен өзімді аз да болса, қоғам үшін, ел үшін қызмет көрсетіп келе жатырған нағыз заманауи үлгідегі педагогпын деп үлкен әріппен айтар едім.Білмеген тоқсан тоғызымды жетілдіруде әлі де еңбектеніп, семинар, сайыстарға қатысып, заман атты теңіздің толқынында кемемді есе берер едім.Сол кеменің кедергіге ұшырауына жол бермес едім, қажырлы күш – қуатымды тек еңбектену жолында аямас едім.

Қазақстанның көк туын желбірете білетін қазіргі заман педагогтары жасасын!