Күні: 15.12.2021

Тақырыбы: «Менің елім- Қазақстан».

Сабақтың мақсаты: Балаларға Отан, Рәміздер, Елтаңба, Тәуелсіздік күні туралы түсініктерін қалыптастыру.

Білімділік: Балалардың Отан, Рәміздер, Елтаңба, Тәуелсіздік күні туралы түсініктерін қалыптастырып, дамыту.

Түзете- дамытушылық: Ойлау, есте сақтау, қабылдау және ұсақ қол моторикасының икемділігін дамыту.

Тәрбиелілік: Патриоттық сезімдерін оятып Отанын, елін, жерін сүюге тәрбиелеу.

Құрал- жабдықтар: Тақырыпқа арналған суреттер, түрлі-түсті доптар, желім, дайын қима қағаздар.

Топ: «Күншуақ» мектепке дейінгі күндізгі тобы.

Сабақ барысы

Ұйымдастыру

Балалармен сәлемдесу

Педагог- психолог: Сәлеметсіңдер ме балалар, көңіл-күйлерің қалай? Тамаша! Олай болса балалар біз Қазақстан Республикасының тәуелсіздік мерекесіне арналған тақырыптық сабағымызды бастаймыз.

Негізгі бөлім

Педагог- психолог: Балалар біздің Отанымыз қалай аталады?

Балалар: Қазақстан.

Педагог-психолог: Жарайсыңдар балалар, Қазақстан тәуелсіз, егеменді мемлекет.

• Балалар біздің ең алғашқы президентіміз кім? Нұрсұлтан Әбішұлы Назарбаев (суретін көрсету)

• Еліміздің елордасы қай қалада орналасқан? Нұр-Сұлтан қаласында (суретін көрсету);

• Нұр-Сұлтан қандай қала? Әдемі, үлкен қала.

Біз бүгін тәуелсіздік алған күнімізді мерекелеудеміз. Біздің еліміз тәуелсіз болғандықтан өзіміздің мемлекеттік Әнұранымыз, Елтаңбамыз және Мемлекеттік туымыз бар (суреттерін көрсету).

Қазақстан Республикасының Мемлекеттік әнұраны 2006 жылдың 7 қаңтарында Қазақстан Республикасының жаңа әнұраны қабылданды. Ш. Қалдаяқовтың «Менің Қазақстаным» әні Қазақстан Республикасының Әнұраны деп жарияланды. Балалар Әнүранды айтқанда оң қолымызды кеудемізге қойып тұрып айтамыз.

Қазақстан Республикасының Мемлекеттік елтаңбасы- дөңгелек нысанды және көгілдір түс аясындағы шаңырақ түрінде бейнеленген. Шаңырақты айнала күн сәулесіндей тарап уықтар шаншылған. Шаңырақтың оң жағы мен сол жағында аңыздардағы қанатты пырақтар бейнесі орналастырылған. Жоғарғы бөлігінде- бес бұрышты көлемді жұлдыз, ал төменгі бөлігінде «Қазақстан» деген жазу бар.

Мемлекеттік ту- Қазақстан Республикасының мемлекеттік туының ортасында шұғылалы күн, оның астында қалықтап ұшқан қыран бейнеленген тік төртбұрышты көгілдір түсті мата. Тудың сабының тұсында ұлттық оюымыз бейнеленген (суретін көрсету).

Балалар қазір біз суретпен жұмыс жасайтын боламыз, ал оған дейін бір сергіп алайық, жарай ма?

«Кім жылдам?» қимылды ойыны.

«Біздің ту» түрлі-түсті қағазбен жұмыс жасау.

Педагог-психолог: Олай болса балалар біздің ұлттық рәміздеріміздің бірі- көк ту. Ал енді мына дайын қима қағаздардан көк туымызды жабыстырып құрастырайық.

Сабақты бекіту

Д/О: «Өз туымызды тап». Партаның үстіне көптеген елдердің туының суреттері шашылады, балалар сол суреттердің ішінен өз елінің туын табулары қажет.

Қорытынды

Педагог- психолог: Жарайсыңдар балалар, сендер бүгін сабаққа өте жақсы қатыстыңдар. Қазақ халқының «Шашу» деп аталатын жақсы бір ырымы бар. Балалар бүгінгі келіп жеткен Тәуелсіздік мерекеміз құтты болсын, денсаулығымыз мықты болсын, еліміз тыныш болсын. Шашууу, шашшууу (балаларға бауырсақтар мен тәттілер таратылады).

• Сау болыңдар балалар!