«Менің мамандығым» және басқару психологиясының рөлі

Қазіргі таңда әрбір жас өз жолын іздейді. Менің мамандық таңдауым да кездейсоқ емес деп айта аламын. Қолданбалы және есептеу математикасы – бала кезден қызықтырған сала. Мектепте есеп шығаруды ерекше жақсы көретінмін, ал күрделі мәселелерді талдау, шешім табу маған әрдайым шабыт беріп, әрі қарай осы салаға деген қызығушылығымды одан сайын арттырды. Сол себепті нақты ғылымдарға сүйенетін, аналитикалық ойлауды талап ететін осы мамандықты таңдадым. Бұл – болашақта үлкен жобаларда жұмыс істеуге, қоғамға нақты үлес қосуға мүмкіндік беретін бағыт деп толықтай айта аламын.

Университетке магистратураға түскеннен кейін білімнің мүлде жаңа әлемі ашылып, өзімді дамытуға көптеген мүмкіндіктер туды. Тек математикалық талдау мен теңдеулер ғана емес, алгоритмдер, модельдеу, машиналық оқыту, деректерді талдау сияқты қазіргі заманға сай пәндер оқып жатырмын. Әрбір сабақ болашақ кәсіби қабілеттерімді нақты қалыптастырып, теорияны практикамен ұштастыруға жол ашып келеді.

Магистратураға түспес бұрын психологиямен, оның ішінде басқару психологиясымен таныс едім, алайда магистратураға келгеннен кейін бұл пәннің шын мәнінде қаншалықты қажет екенін тереңірек түсіндім. Жалпы курс барысында көптеген маңызды тақырыптарды өттік, олардың ішінде мені ерекше ойландырғандары — көшбасшылық стильдері, қарым-қатынас психологиясы, мотивация және стрессті басқару.

Тұлға ретінде мен күнделікті өмірде мотивацияны басқару және стресстің алдын алу тақырыптарын жиі қолданамын. Сабақ, ғылыми жұмыс, спорт, жеке тәртіп – бәрі өзін-өзі басқаруға тікелей байланысты. Ал мамандығыма қатысты ең қажеті – коммуникация психологиясы мен командалық жұмыс. Ғылыми жобаларда немесе есептеу жұмыстарында әріптестермен дұрыс сөйлесу, ойды нақты жеткізу, ортақ шешімге келу – нәтиженің сапасын айқындайтын негізгі факторлар деп есептеймін.

Мен ерекше назар аударған тақырып – мотивация теориялары. Бұл тақырып адамның ішкі және сыртқы қозғаушы күштерін түсінуге көмектеседі. Әр адамның іс-әрекетінің артында белгілі бір қажеттілік, мақсат немесе эмоция тұратынын түсіну – басқару процесін едәуір жеңілдететіні айдан анық. Әсіресе, командамен жұмыс істегенде әркімнің неге мүдделі екенін білу тиімділікті арттырады. Пән барысында түрлі мотивациялық модельдермен танысып, оларды өмірде қолдануға болатынын түсіндім.

Осы пәннен алған білімімді өмірде де, болашақ қызметімде де пайдалану – менің нақты мақсаттарымның бірі. Өмірде оны өз уақытымды дұрыс жоспарлау, эмоцияларды бақылау, мақсат қою және қиын сәттерде сабыр сақтау үшін қолданамын. Ал жұмыс барысында бұл білімдер әріптестермен тиімді байланыс орнатуға, күрделі жағдайларды дұрыс шешуге, топты ынталандыруға және ойды нақты жеткізуге көмектеседі.

Қорыта айтқанда, «басқару психологиясы» тек менеджерлерге емес, кез келген маманға керекті пән екеніне көзім жетті. Ол адамды жан-жақты түсінуге, өзіңді де дамытуға көмектеседі. Болашақта қандай салада жүрсем де, бұл білімдер менің кәсіби имиджімді қалыптастырып, тұлға ретінде өсуіме ықпал етеді деп сенемін.

Абайұлы Тұрмұханбет

1 курс магистранты,

Болтаева Алия Масакбаевна

психология ғылымдарының кандидаты

Әл-Фараби атындағы Қазақ Ұлттық университеті