Мінез -адам көрсеткіші

Сабақ мақсаты: оқушыларға мінез-құлық туралы түсінік бере отырып, ішкі тыныштық құндылығының мәнін ашу.

Міндеттері:

-оқушыларды іс-әрекет кезінде сенімділікке, ұстамдылыққа үйрету;

- оқушылардың жағымды ойлау қабілеттерін дамыту;

-Адам бойындағы құмарлықты шектеу, өзін-өзі құрметтеуге, қарапайымдылыққа тәрбиелеу;

Ресурстар:(құралдар, мәлiметтер)

Сабақ барысы:

1.Ұйымдастыру кезеңi. 5Т. 5 жұмыс құралын түгендеу: күнделік, оқулық, жұмыс дәптері, қаламсап, қарындаш

Тыныштық сәтi. «Нұрға бөлену»

1.Үй тапсырмасын тексеру №13 сабақ. «Дән мен тас» (ертегі) М.Тиесов.

• Тастың мазасын алған қандай ой?

• Дәннің бойындағы қасиеттер қандай?

• Бақытты болу дегенді қалай түсінесіңдер?

Сабақ барысын талдау:

Дәйексөз.

«Мінезі бірқалыпты адамдардың өмірі де жайма-шуақ болады.»

Демокрит ( 460-370 б.э.д.)

- Мінез ерекшеліктері туралы не айтар едіңіз?

-Егер адамның бойында ұстамдылық, жағымды ой ұяласа қандай құндылыққа жатады?

-Өз бойымыздағы өзімшілдік пен қалауды тежей алсақ, жүрегімізде не орнайды?

(Философ, адамдардың бірігуін, бір-біріне көмектесуін, қорғауын қолдады.)

Оқиғаларды әңгімелеу.

«Тату ағайындылар» ел аузынан

Өте ертеде бір патшалықта екі ағайынды өмір сүріпті. Екеуінің үйі таудың екі жағында болса да, олар бір-біріне көмектесіп, тату-тәтті өмір сүреді.

Бір күні ағайындылар егінді жинап алып, теңдей бөліп алады. Сол күні түнде үлкен ағасы ойлайды: «Біз егінді бірдей етіп бөліп алдық, бұл дұрыс емес. Інім жаңа ғана шаруашылығын бастап жатыр. Оған маған қарағанда көбірек керек».

Ағасы тұрып, түнде інісіне бір қап бидайды апарып тастайды.

Ал бұл кезде інісі жатып, ол да ойлап жатады: «Жоқ, біз егінді дұрыс бөліскен жоқпыз. Ағамның отбасы үлкен, жасы да менен үлкен. Оған маған қарағанда көбірек керек».

Таңға жақын інісі де білдіртпей бір қап бидайды ағасына апарып тастайды.

Таңертең ағайындылар өз қамбаларына қарап, таң қалады: «Бұл қалай? Кеше бір қап бидайды ағама апарып беріп едім ғой, ал бидай азаймапты». Олар қаптарды қайта-қайта санайды да, таң қалады: «Бұл не ғажайып?!»

Түн болысымен ағасы мен інісі бір бидай қапты арқалап, үйлерінен шығады. Толық ай туып жарықтандырып тұрған. Осы жерде қарағайдың түбінде екі ағайынды кездесіп қалады. Ағасы сұрай бастайды:

-А, бұл сен бе? Кештетіп қайда бара жатырсың?

Інісі айтады:

-А, бұл сен бе едің? Ал сен қайда бара жатырсың?

Екеуі де үндемей қалды, бір-бірін түсіне қояды да, қарқылдап күліп жіберді. Осыдан кейін екеуі бір-бірін одан да қатты жақсы көріп кетеді?

• Екі ағайындының іс-әрекетін калай түсінесіңдер ?

• Ағайындыларды не мазалады ?

• Қай кезде адамда «ішкі тыныштық» сақталады?

Өзін-өзі тану журналы. 2014. №10

Шығармашылық жұмыс, топтық жұмыс.

Оқушыларға баяу әуен қосылып, ішкі тыныштықты сақтай отырып, бір-біріне сызықтар жалғау арқылы сурет салғызу. Әр топ өз суреттерін түсіндіреді.

Өзара топта сұрақ қойылып, талқыланады.

Үй тапсырмасы. №14. Сухомлинскийдің өсиет әнгімелерін оқып келу.

Топпен ән айту

Дуние керуен (Жігіттер тобы)

1. Өтетін сейілмен,

Ей, дүние базарсың.

Пенделік пейілден,

Жүрегім тазарсын.

Қайырмасы:

Адамға бақ берер тек қана Аллам екен,

Өмірдің қызығы біреуге арман екен.

Мәңгілік тұрағың болатын бар ма мекен?

Бес күндік бұл дүние расында жалған екен!

2. Қуаныш, қайғының,

Бәрі де бітеді.

Бұл дүние таусылса,

Шын дүние күтеді.

Қайырмасы:

Адамға бақ берер тек қана Аллам екен,

Өмірдің қызығы біреуге арман екен.

Мәңгілік тұрағың болатын бар ма мекен?

Бес күндік бұл дүние расында жалған екен!

3. Амал қыл фәниде,

Иманның жолында.

Бәрі де, бәрі де,

Алланың қолында.

Қайырмасы:

Адамға бақ берер тек қана Аллам екен,

Өмірдің қызығы біреуге арман екен.

Мәңгілік тұрағың болатын бар мА мекен?

Бес күндік бұл дүние расында жалған екен!

Әндер жинағы.

Соңғы тыныштық сәтi.

Жайлана отырып, өзіміздің ішкі тыныштығымызды бақылаймыз. Көзімізді жұма отыра, үнемі ұстамды болуға, жағымды ойлауға дағдыланамыз. Ойша ұжымға жылы нұр жібереміз. Рахмет! Көзімізді ашамыз.