Өмірдегі ең қымбат жан

Өмірдегі ең қымбат жан

(Анамыз Бақтылы Отарғалиқызына)

Әрбір адамның өмірде өзіне ең жақын адамы болады, ол жаны жайсаң, жүрегі мейірімге толы менің алтыннан да ардақты анам. Олай дейтін себебім, ол маған жарық дүние сыйлады. «Анаңды меккеге үш рет арқалап апарсаң да , оның алдындағы қарызыңды өтей алмайсың» деген халық мақалы бар емес пе? Мен сенің алдындағы балалық пәк перзенттік сезімімді еш уақытта да жоғалтқан емеспін. Анашым сенің аялы алақаныңды, еркелете сөйлеген асыл сөзіңді сағынамын. Әттең сұм ажал сені ортамыздан ерте алып кетті. Сен мен үшін даналықтың көзі болып табыласың. Бала болсам да, осы бауырларыңа бас көз болатын сенсің деп барлық жөн-жоралғыларды, салт-дәстүрді, кісілікті, кішілікті, қарапайым нәрсенің өзіне үлкен мән беруді үйреттің. Еңбекқорлығың, мейірімің, алғырлығың, әншілігің -бәрі көз алдымда, бүкіл ауылға көрік, сән беретін едің ғой... Орның толмайды, өмірден өткеніңе де 22 жыл өтіпті.

Өмір деген ағыс қой, тоқтамай ағып жатыр. Бәріміз сені сағынамыз, еске аламыз. Осы бауырларыңды сен аяқтандырасың, құда-құдагиларыммен төрде сен отыратынсың дейтінсің. Шынында да солай болды. Шіркін балалық –ай, сол сөздеріңнің астарына ерте түсінсемші.... Менің алтын құрсақты жан анам - өмірде он балаға жарық дүние есігін ашып, күн сәулесінің шапағын сыйлаған аяулы жан. Жастайыннан ата-анасынан айырылып,қанша қиыншылықтарды басынан өткізсе де, біздің әрқайсысымызды бағып-қағып тәрбиелеп өсірді.

Асыл ана тіршіліктің қайнар көзі, махаббаттың шуақ күні, мейрімнің кәусар бұлағы- анадан асыл қасиетті ештеңе жоқ. Бүгінде кешеге бала қыз, өзі де ана атанды. «Ата-ананың қадірін, балалы болған да білерсің» демей ме дана халқымыз. Ана баланы тоғыз ай көтеріп, дүниеге келтіріп қана қоймайды, көзінің қарашығындай қорғап, аялап, өсіріп, аяғынан тік тұрғызатын да ана. Халықтың халықтығының басты нышаны туған елінің тілін үйретіп, халықтың күй сазын үретеін де ана. Нәресте өмірінің нәрі ана сүті арқылы ана тілін халқымыздың байырғы дәстүрлерін бойына сіңіреді. Бала үшін анасы бармайтын құрбандық бар ма?

Ана болу бүкіл өміріне кететін ұлы рухани күш пен ерең еңбек. Өз баласын бағып қағуда, ана өзін-өзі ұмытып барлық күш жігерін балуыз балапандарына жұмсайды. Бұдан оның жаны жасарып,нәрлене түседі. Егер ата-анаң бір мезгілде үн қатып қалса, әуелі анаңа жауап бер деген ұлылардың ұлағатты сөзі бар. Кімде кім ата-анасының ризашылығын алған болса, бала соның өмірін ұзартады делінген, сондықтан да саялы бағым, мөлдір суым, жылы жүректі анашымды мақтан тұтамын, ұлылықтың жаршысы, кәусар бұлағы деп танимын. Бүгін де немере, жиендерің де аяқтанып, шөберелерің алаңсыз өсіп жатыр. Сенің берген тәрбиең, ұрпағыңды биіктетеді. Сен бізді әрқашан желеп-жебеп жүресің аяулы анашым. Сені мақтан етемін. Сен ешқашан өлмейсің, мәңгі бізбен жасай бересің. Сен бізге күш беретін жарық сәулесің...