Өмірдің өз сынағы бар

Өмірдің өз сынағы бар

Ұбт-ны өмірге теңесек қалай? Әрқайсымыздың өміріміз ұбт іспеттес деп алып көрелік. Білім деңгейін тексеретін ұлттық бірыңғай тесттілеуде қойылған сұрақта, нақты төрт нұсқалы жауап бар, ал өмірдің ұбт-сында ше? Өмірде жауап жоқ, ештеңе анық емес, керісінше шатастыратын нұсқа көп. Өмірде тек таңдау ғана бар. Бәлкім, сол үшін де адам, өмірде келетін кез-келген аласапыран сұрақтар мен таңдауға дайын болуы керек шығар. Сол таңдауды саналы қабылдауда адам бойындағы қай қасиет ерекше ескеріледі деп ойлайсыз?

Дисциплина мен жүйелік-өміріңді жетістікке жетелейтін басты құралдар. Ұбт-дан жоғарғы баллға тәртіп пен ерең еңбектің, аянбай тер төгудің арқасында ғана жетесің. Дәл солай өмірде де, мақсатқа жету үшін адам бойында тәртіп пен табандылық үлкен рөл ойнайды. Әр адам өз-өзіне жауап беріп, жасаған ісі мен өз өмірінің салмағын сезіне алуы қажет, қайратын қамшылау керек.

Сабырлық пен шыдамдылық. Бәрінің бірден болып кетпейтінін, жетістіктің оңай жолмен келмейтінін түсіну. Ұбт ға бір ай дайындалып қалаған балл-ыңды ала алмайсың, дәл солай өмірде де бірден дегеніңе жете алмайсың. Мақсатқа жету жолында келетін түрлі сынақтарға сабырлық таныта алсаң ғана, жемісін көресің. Бақ-қиындықпен келсе ғана қадірлі деп бекер айтпаған. Биік белестерді бағындырам десең ешнәрсеге сынбай, құласаң-қайта көтеріле алатындай қажымас қайратың, талмас қанатың болуы керек. Шыдамсыз адам алдынан шыққан сынаққа төзе алмай қолын бір сілтеп кете салады, ал ондай адам нәтижеге жете алады деп ойлайсыз ба?

Қателіктен сабақ алу. Қателіктерді жақсы жағынан қарсы алып, бұл арқылы маған қандай белгі келіп тұр? Бұл арқылы бойымда нені дамытып, немен жұмыс жасауым қажет деп өзіңізге сұрақ қоя біліңіз. Өмірден түңіліп, налып, қолыңызды бір сілтеудің орнына бәріне жеңіл түрде позитивті қарап үйреніңіз. Сәтсіздіктер бізді сындыру үшін емес керісінше шыңдалу үшін берілетінін ойдан шығармаған жөн.

Бәрінен бірдей лидер болу мүмкін емес. Ұбт-да келген сұрақтың бәріне дерлік дұрыс жауап беру қиындық туғызуы мүмкін. Өмірде де дәл солай, барлық салада үздік болып, бәріне үлгеру мүмкін емес. “Сенде бір кірпіш дүниеге-кетігін тап та бар қалан”-демекші өмірден өз орныңды тауып сол арқылы қоғамға пайдалы болуды ойлау керек.

Өмірдің біз қиын көретін кезеңдері-нағыз өмірдің бір бөлшегі. Сол кезеңдердегі қалыптастырған әдеттерімізді өмірлік жолымызда да пайдамызға жарата алсақ сол біздің жеңісіміз. Қателесу-норма, кейде қанша тырысып бағып, дайындалсақта бәрі біз қалағандай болмайды. Қателіктен сабақ алып әрі қарай мақсатына ұмтылған жан ғана соңында өзін дәлелдейді. Өмірдің өзі-ҰБТ. Себебі бұл ҰБТ-ның нәтижесі өз қолыңызда!