Оң жақ, сол жақ

Білім беру саласы: Таным

Бөлімі: Математика негіздері

Тақырыбы: «Сол жақ – оң жақ. Дөңгелек».

Мақсаты: оң жағы мен сол жағын ажырата алу білігін бекітуді жалғастыру; шеңбер– геометриялық пішіні туралы білімдерін нақтылау.

Міндеттері: өзінің маңындағы кеңістік бағыттарын ажырата білу; оң қолы мен сол қолын ажырата алу білігін дамыту; логикалық ойлауын дамыту; геометриялық пішіндер туралы білімдерін бекіту; қоршаған ортадан шеңбер пішінді заттарды таба білу білігін бекітуді жалғастыру.

Күтілетін нәтижелер:

Біледі: өз айналасындағы кеңістікте: «оң жақ, сол жақ, ортасында» сөздерін пайдаланып, бағдарлауды;

Түсінеді:өзінің айналасында сол жағы, оң жағы қайсысы екенін ажыратуды; Қолданады: өзінің айналасында бағдарлауды; сол жақ, оң жақ, ортасындағы заттарды салыстыруды,оң жағы мен сол жағын ажырата алу білігін;

Құрал-жабдықтар мен материалдар: үйшік, «Бауырсақ» ертегісі кейіпкерлерінің макеттері, демонстрациялық материал; үлестірмелі материалдар: жұмыс дәптері, жай қарындаш.

Әдіс-тәсілі: Сұрақ-жауап,  әңгімелету,  сергіту  сәті, ойын.

Сөздік жұмыс: сол жақ, оң жақ, шеңбер.

ҰІӘ-нің барысы

Шаттық шеңбері

Үлкенге де сіз,

Кішіге де сіз,

Баршаңызды құрметтеп,

Бас иеміз біз.

1.Кіріспе.

-Балалар қазір жылдың мезгілі?

-Қыс мезгілінде қанша ай бар?

- Қане атап айтайық.

2. Негізгі кезең. Ойын: «Сол жақта, оң жақта».

- Балалар, мына кейіпкерлерге қараңдаршы, бұл қандай ертегі.

Балалардың жауаптары.

- Балалар, бұл ертегіде бауырсақ атасы мен әжесінен қашып, алдымен қандай аңға жолығады?

Балалардың жауаптары. / Қоянға/

-Қоян бауырсақтың қай жағында тұр?

Балалардың жауаптары. /Оң жағында/

-Балалар, қоян бауырсақты жеп қоймас үшін біз тапсырма орындауымыз қажет.

-Онда дәптердегі бірінші суретке қарайық.

1-тапсырма:

-Балалар дәптердегі суретке назар аударыңдар.

Балалар ойнап жатқан ойын қалай аталады?

Балалардың жауаптары. /Арқан тартыс /

Арқанды сол жақтан кімдер тартып жатыр, ал оң жақтан кімдер тартып жатыр.

Балалардың жауаптары. /сол жағында ұлдар, оң жағында қыздар/

-Балалар, жарайсыңдар! Бауырсақты қояннан құтқардық. Бауырсақ әрі қарай домалап, тағы қандай аңға кездесті?

Балалардың жауаптары. /Қасқырға/

-Қасқыр бауырсақтың қай жағында тұр?

Балалардың жауаптары. / Қасқыр бауырсақтың сол жағында/

-Енді қасқырдан құтқару үшін біз екінші тапсырманы орындауымыз керек.

2-тапсырма

-Мына пішіндердің ішінен дөңгелекті тауып қоршап сызыңдар.

-Бұл қоршаған пішіндерің қандай кейіпкердің пішініне ұқсайды?

Балалардың жауаптары. / Бауырсақтың пішініне ұқсайды/

-Балалар, жарайсыңдар! Бауырсақты қасқырдан құтқардық. Бауырсақ әрі қарай домалап, тағы қандай аңға кездесті?

Балалардың жауаптары. /Аюға/

-Аю бауырсақтың қай жағында тұр?

Балалардың жауаптары. /Аю бауырсақтың оң жағында/

-Енді аюдан құтқару үшін біз үшінші тапсырманы орындауымыз керек.

Сергіту:

Орнымыздан тұрамыз,

Қолды белге қоямыз.

Бұрыламыз оңға бір,

Бұрыламыз солға бір

Біздер тату баламыз.

Гүл – гүл жайнап жанамыз.

Жаттығулар жасасақ,

Жақсы сергіп қаламыз.

3-тапсырма

-Мына суретте бауырсақтар қыздардың бәріне жете ме? Суретте неше қыз? Санайықшы. Неше бауырсақ? Санаңдаршы. Осы бауырсақтарды қыздармен сызып қосыңдар.

-Бауырсақ қандай геометриялық пішінге ұқсайды?

Балалардың жауаптары. /Дөңгелекке/

-Балалар, жарайсыңдар! Бауырсақты аюдан құтқардық. Бауырсақ әрі қарай домалап, тағы қандай аңға кездесті?

Балалардың жауаптары. /Түлкіге/

-Түлкі бауырсақтың қай жағында тұр?

Балалардың жауаптары. /Сол жағында/

-Енді түлкіден құтқару үшін біз «Қандай зат дөңгелекке ұқсайды?» ойынын ойнаймыз.

Ойынның мақсаты: дөңгелек пішіндерді басқа пішіндерден ажырату.

Шарты: суреттегі бейнелердің ішінен дөңгелекке ұқсас заттарды тауып атайды.

-Балалар, жарайсыңдар! Бауырсақты түлкіден де құтқардық. Бауырсақ сендерге рахметін айтады. Сендерге көңілді смайликтер сыйлағысы келеді.

Балаларға смайлик тарату.

3. Рефлексия. Қорытынды жасап , балаларды мадақтаймын.

- Біз нені аңдардан құтқардық?

-Бауырсақ пішіні қандай геометриялық пішінге ұқсайды?

– Қандай геометриялық пішінді қоршап сыздыңдар? Топтағы дөңгелекке ұқсайтын заттарды атаңдар.

-Балалар, сонымен қатар біз оң жақ, сол жақты ажыратып үйрендік.