ОҚУШЫЛАРҒА ПАТРИОТТЫҚ ТӘРБИЕ БЕРУДІҢ МАҢЫЗДЫЛЫҒЫ

Санақ Берік Серікұлы

Алматы облысы, М.Түймебаев ауылы

«№20 орта мектеп» мкм-нің АӘжТД пәнінің мұғалімі

ОҚУШЫЛАРҒА ПАТРИОТТЫҚ ТӘРБИЕ БЕРУДІҢ МАҢЫЗДЫЛЫҒЫ

Патриоттық тәрбие – мемлекеттің тұрақтылығы мен қауіпсіздігін қамтамасыз ететін маңызды факторлардың бірі. Бүгінгі оқушы – ертеңгі ел қорғаушысы, қоғамның белсенді мүшесі. Сондықтан мектептегі алғашқы әскери дайындық пәні жастарға тек әскери білім беріп қана қоймай, оларды патриотизм рухында тәрбиелеуге, ұлттық құндылықтарды бойына сіңіруге ықпал етеді. Осы бағытта мұғалімдер, ата-аналар және қоғам бірлесе жұмыс жасағанда ғана толыққанды нәтижеге қол жеткізуге болады. Жастар – елдің болашағы, мемлекеттің негізгі қозғаушы күші. Тұлғаның азаматтық ұстанымы мен патриоттық санасының қалыптасуы оның қоғамға қосатын үлесін, елінің дамуына деген көзқарасын айқындайды.

Елінің тарихын, мәдениетін, тілін қадірлейтін, Отан қорғауға дайын, жауапкершілігі жоғары азаматтарды қалыптастыру – білім беру жүйесінің негізгі бағыттарының бірі болып табылады. Осы орайда, мектептерде оқытылатын алғашқы әскери дайындық пәнінің маңызы зор.

Бұл пән оқушыларға әскери білім мен дағдыларды ғана емес, сонымен қатар тәртіптілік, жауапкершілік, ұжымшылдық сияқты қасиеттерді де үйретеді. Бұл пәннің патриоттық тәрбиедегі рөлі төмендегідей бағыттар бойынша көрініс табады:

1. Әскери-патриоттық білім беру: Оқушыларға Қазақстанның Қарулы Күштері, олардың құрылымы мен қызметі туралы мағлұмат беріледі.

2. Практикалық дайындық: Жас сарбаз курстары, әскери-далалық оқу-жаттығулары арқылы оқушылар әскери өмірге бейімделеді.

3. Тарихи сананы қалыптастыру: Ұлы Отан соғысы, Желтоқсан көтерілісі сияқты тарихи оқиғаларды насихаттау арқылы жастарға отансүйгіштік рух сіңіріледі.

4. Ерлік пен батырлыққа баулу: Қазақтың батыр тұлғалары мен заманауи әскери қызметкерлердің ерліктері оқушыларға үлгі етіп көрсетіледі.

5. Дене шынықтыру мен әскери тәртіп: Саптық дайындық, тактикалық жаттығулар, төтенше жағдай кезіндегі әрекеттерді үйрету арқылы жастардың физикалық және психологиялық дайындығы нығайтылады.

ХХІ ғасырда жаһандану үрдісі қарқын алғандықтан, ұлттық құндылықтарды сақтау, жастарды елжандылық пен жауапкершілікке тәрбиелеу мәселесі өзекті болып отыр. Осыған орай, мемлекет, білім беру жүйесі, қоғамдық ұйымдар мен отбасы жастардың бойына патриоттық сезімді сіңіруде маңызды рөл атқарады. Сонымен қатар, ата-ана баланың бойына туған жерге, ұлттық салт-дәстүрлерге деген құрметті сіңіруі керек. Үйдегі тәрбие – патриотизмнің негізі.

Жастарды патриотизмге тәрбиелеудің маңызы қандай? Патриотизм – адамның өз Отанына деген сүйіспеншілігі, оны қорғауға және дамытуға деген ұмтылысы. Патриоттық тәрбие келесі міндеттерді қамтиды:

• Жастардың ұлттық рухын, елдік санасын қалыптастыру;

• Мемлекеттік рәміздерге, Тәуелсіздік тарихына құрмет сезімін арттыру;

• Отан алдындағы жауапкершілікті нығайту;

• Ұлттық бірегейлікті сақтау және дамыту;

• Әлеуметтік белсенділік пен азаматтық ұстанымды қалыптастыру.

Жастарды патриотизмге тәрбиелеу олардың елдің болашағына сеніммен қарауын, ұлттық мұраға құрметпен қарауын және болуын қамтамасыз етеді.

Жастарды патриотизм мен азаматтық жауапкершілікке тәрбиелеу – қоғамның тұрақты дамуының кепілі. Бүгінгі жас буынның рухани құндылықтарға берік, ұлттық сана-сезімі жоғары болуы – ел болашағының жарқын болуын қамтамасыз етеді. Сондықтан, патриоттық тәрбие мен азаматтық ұстанымды қалыптастыруда білім беру мекемелері, қоғамдық ұйымдар, отбасы және мемлекеттің үйлесімді жұмыс істеуі аса маңызды.

.