Өсімдіктер мен жанууарлардың жойылып кетуі не себепті?

Жан-жануар, аңдар мен жәндіктер – табиғат деген алып үйдің бір кірпішін құрайтын бөлшектері, экологияда айрықша орны бар жаратылыстар. Бір кірпіші босаған үйдің уақыт өте келе өзге кірпіштері де кетіліп, ақырында үйді жарамсыз ететіні белгілі. Сол секілді жануардың бір түрін жою – өзге түрлердің өзгеруіне, азайып не көбеюіне алып келеді де табиғаттың тепе-теңдігі бұзылады. Осы орайда, қазіргі таңда өсімдіктер мен жануарлардың жойылып кетуіне не себеп?,-деген сұрақтың төңірегінде әңгіме қаузап көргенді жөн санадым.

Қазіргі кезде жануарлар түрлерінің азаюына, негізінен, антропогендік факторлар әсер етеді. Ондай факторларға шектен тыс аулау, тіршілік ететін орта жағдайларының өзгеруі, ретсіз жерсіндіру, судың, топырақтың ластануы жататыны бізге география пәнінен де мәлім. Десекте,бүгінгі таңда жануарларды шектен тыс аулау салдарынан 500 жылда 900-ден астам жануар мен өсімдік түрлерін жер бетінен жойылып қана қоймай, соңғы ғасырда адамзат аң мен малға азғындық жасауда шектен шықты. Оған дәлел, қазіргі қала тұрып, ауылдың сәнқой апалары мен әйелдеріне дейін киіп жүрген қара күзен (норка)үшін, бір тон жасауға 40-42 күзен ауланып, терісі тірідей сыпырылып алынады екен. Сонда ғана тері мен жүні жылтырап, тауардың  әрін келтіретінін газет беттерінен оқыған едім. Ал, ағаштарды кесіп, отын, құрылыс материалдары үшін пайдалану салдарынан қазіргі таңда сирек кездесетін өсімдіктер қатарына жататын Іле шыршасы, самырсын, шетен, долана, шырғанақ, емен, т.б. ағаштары қорғауды қажет етіп отыр. Бұның өзі саналы адамның жануарларды пайдаланумен бірге олардың кейбір түрлерінің жойылуына себепші болып отырғандығын айқындайды емес пе?

Қорытындылай келсем, адамның іс-әрекетінің жануарлар үшін қаншалықты қауіпті екендігі белгілі. Сондықтан, жануарларымыз мен өсімдіктерді қорғау және сақтау азаматтық парызымыз.